މަޝްހޫރު ބައިނަލްއަގުވާމީ ހޮޓެލް ޗެއިން ފޯސީޒަންސް ރިސޯޓްސް އޮޕަރޭޓް ކުރާ ސިންގަޕޫރުގެ ހޮޓެލް ޕްރޮޕަޓީސް ލިމިޓެޑް ކުންފުންޏަށް މިދިޔަ އަހަރު ސާފު ފައިދާގެ ގޮތުގައި 90 މިލިޔަން ޑޮލަރު ލިބިއްޖެ އެވެ.
ކެނެޑާގެ މަޝްހޫރު ހޮޓެލް ޕްރޮޕަޓީސް އިން އަންނަނީ ރާއްޖޭގެ ފަސް ރިސޯޓެއް ހިންގަމުންނެވެ. އެއީ ފޯސީޒަންސް މޯލްޑިވްސް ކުޑަހުރާ، ފޯސީޒަންސް ލަނޑާ ގިރާވަރު، ހޮލިޑޭ އިން ކަނޑޫމާ މޯލްޑިވްސް، ގިލި ލަންކަންފުށި އަދި ސިކްސް ސެންސެސް ލާމު އެވެ. އޭގެ އިތުރުން ރ. އަތޮޅާއި ވ. އަތޮޅުގައި އެ ކުންފުނީގެ ދެ ފަޅުރަށް އޮވެ އެވެ.
އެޗްޕީއެލްއިން އެ ކުންފުނީގެ މިދިޔަ އަހަރުގެ އަހަރީ ރިޕޯޓާއި މާލީ ބަޔާންތައް އާންމުކޮށްފައިވާ އިރު، އެ ބަޔާނުގައި ބުނާ ގޮތުގައި އެކުންފުނިން މުޅި ދުނިޔޭގައި ހިންގާ އެކިއެކި ވިޔަފާރިތަކުން، މިދިޔަ އަހަރު ޖުމްލަ 579 މިލިޔަން ޑޮލަރު އާމްދަނީގެ ގޮތުގައި ލިބިފައިވެ އެވެ.
އަދި ފައިދާގެ ގޮތުގައި 115،941،000 ޑޮލަރު އެކުންފުންޏަށް މިދިޔަ އަހަރު ލިބުނު އިރު، ޓެކްސްއަށް ކެނޑުމަށް ފަހު ސާފު ފައިދާގެ ގޮތުގައި 90،731،000 ޑޮލަރު އެކުންފުންޏަށް ލިބިފައިވެ އެވެ.
އެޗްޕީއެލްއަށް އާމްދަނީގެ ގޮތުގައި ލިބުނު 570 މިލިޔަން ޑޮލަރުގެ ތެރެއިން، 196،955،000 ޑޮލަރަކީ ރާއްޖޭގައި އެ ކުންފުނިން އޮޕަރޭޓު ކުރާ ފަސް ރިސޯޓުން ލިބިފައިވާ ފައިސާ އެވެ. މިއީ 2014 ވަނަ އަހަރާ އަޅާ ބަލާއިރު ދަށް އަދަދެކެވެ. އެ އަހަރު އެޗްޕީއެލް ކުންފުންޏަށް ރާއްޖޭގެ ރިސޯޓުތަކުން 199،496،000 ޑޮލަރު ލިބިފައިވެ އެވެ.