މި ދުނިޔޭގެ އެއް ބިތުގައި ހުރި މީހަކު އަނެއް ބިތުގައި ހުރި މީހަކާ ވާހަކަ ދެއްކޭ މަގު ފަހުކޮށްދިނީ މުއާސަލާތެވެ. މުއާސަލާތީ ގުޅުންތަކެވެ. އެއް ގައުމެއްގައި ހުރި މީހަކު، ނުވަތަ އެއް ރަށެއްގައި ހުރި މީހަކު ކަނޑު ހުރަސްކޮށް އަނެއް ރަށުގައި ހުރި މީހަކަށް ވަގުތުން ވާހަކަދެއްކޭނެ މަގު ފަހު ކޮށްދިނީ ވެސް މުއާސަލާތެވެ.
މިއަދަކީ ދުނިޔޭގެ މުއާސަލާތާ ބެހޭ ދުވަހެވެ. ނުވަތަ ވޯލްޑް ޓެލެކޮމިއުނިކޭޝަން އެންޑް އިންފޮމޭޝަން ސޮސައިޓީ ޑޭ އެވެ. މިއަދު މުޅި ދުނިޔޭގައި ވެސް ފާހަގަ ކުރަނީ މުއާސަލާތީ ގުޅުންތަކެވެ.
މި ދުވަސް ފާހަގަ ކުރުމުގެ މައިގަނޑު މަގްސަދެއްގެ ގޮތުގައި ކަނޑައަޅާފައި ވަނީ، އިންޓަނެޓާ އެހެނިހެން މުއާސަލާތީ ގުޅުންތަކާ ޓެކްނޮލޮޖީގެ ޒަރިއްޔާއިން ގެނުވާފައިވާ އިޖްތިމާއީ ބަދަލުތަކާ މެދު ހޭލުންތެރިކަން އިތުރު ކުރުވުމެވެ.
ރާއްޖޭގައި މުއާސަލާތީ ޚިދުމަތް ދިނުމުގެ ހުއްދަ، ކޮމިއުނިކޭޝަންސް އޮތޯރިޓީ އޮފް މޯލްޑިވްސްއިން ޖުމްލަ ތިން ކުންފުންޏަކަށް ދީފައި ވެ އެވެ. އެއީ ދިރާގު، އުރީދޫ މޯލްޑިވްސް އަދި ފޯކަސް އިންފޯކޮމް އެވެ. މީގެ ތެރެއިން ދިރާގާ އުރީދޫއަކީ ރާއްޖޭގައި މޯބައިލް ފޯނު ނެޓްވޯކް އޮޕަރޭޓުކުރާ ހަމައެކަނި ދެ ކުންފުންޏެވެ.
ދިރާގާ އުރީދޫއިން މޯބައިލް އިންޓަނެޓުގެ ކަވަރޭޖް ރާއްޖޭގެ ގާތްގަނޑަކަށް ހުރިހާ ސަރަހައްދަކަށް ދޭ އިރު، މިއީ މުއާސަލާތީ ގޮތުން ރާއްޖެ ހޯދާފައިވާ ބޮޑު ކާމިޔާބީ އެކެވެ. ދެކުންފުނީގެ ވެސް ތްރީޖީ އަދި ފޯޖީ ނެޓްވޯކުގެ ސްޕީޑު އުޅެނީ ގްލޯބަލް އެވަރޭޖަށް ވުރެ މާ މަތީގަ އެވެ. ރާއްޖެ މި ވަނީ ރަނގަޅަށް ކަނެކްޓްވެ، ދުނިޔެއާ ވެސް އެ ކަންކެޝަން ވަރުގަދަ ކޮށްފަ އެވެ.
ޗައިނާގެ ޒުވާނަކު ކޮމްޕިއުޓަރެއްގެ ކައިރީގައި --
ކުޑަކުޑަ ރާއްޖެއިން މުއާސަލާތީ ގޮތުން ބޮޑު ކާމިޔާބެއް ހޯދާފައިވާ އިރު، ދުނިޔޭގެ ބައެއް ގައުމުތަކުގެ ސަރުކާރުތަކުން ދަނީ އެގައުމުތަކުގެ ރައްޔިތުންގެ މުއާސަލާތީ ގުޅުންތައް ގަސްތުގައި ހަނި ކުރަމުންނެވެ. ޗައިނާގައި، ބައިނަލްއަގުވާމީ އަދި ބޭރުގެ ވެބްސައިޓުތަކަށް އިންޓަނެޓުގެ ޒަރިއްޔާއިން ނުވަދެވޭ ގޮތް ހަދާފައި ވެ އެވެ. ބޭރު ގައުމުތަކާ އިންޓަނެޓު ޒަރިއްޔާއިން ގުޅުން ކުޑަ ވިޔަސް، ޗައިނާގެ އެތެރެއިން އެންމެން ތިބީ ކަނެކްޓް ވެފަ އެވެ.
އުތުރު ކޮރެއާގެ ހާލަތު މާ ގޯހެވެ. އެގައުމުގައި 2004 ވަނަ އަހަރުން ފެށިގެން 2008 ވަނަ އަހަރާ ދެމެދު، މޯބައިލް ފޯނު ގެންގުޅުން މަނާ ކުރެވުނެވެ. މިހާރު ގިނަ ބައެއްގެ އަތުގައި ފޯނު ހުރި ނަމަވެސް، ގައުމުން ބޭރަށް ފޯނުކޯލެއް ނުކުރެވެ އެވެ. ނުވަތަ އެހެން ގައުމަކުން އެގައުމަށް ކޯލެއް ނުކުރެވެ އެވެ. ރޯމިން ޚިދުމަތެއް ނުލިބެ އެވެ. ތްރީޖީ މެދުވެރިކޮށް 2013 ވަނަ އަހަރުން ފެށިގެން އިންޓަނެޓުގެ ޚިދުމަތް އުތުރު ކޮރެއާގައި ބޭނުން ކުރަމުން ދިޔަ ނަމަވެސް، އެ ޚިދުމަތް ބޭނުންކުރެވެނީ ހަމައެކަނި ބޭރު ގައުމުތަކުން އެގައުމަށް ޒިޔާރަތް ކުރާ މީހުންނަށެވެ. ދެން އިންޓަނެޓު ލިބެނީ ސަރުކާރު އޮފީސްތަކަށާއި، އަސްކަރީ ބޭނުންތަކަށެވެ. އާންމު ރައްޔިތުން އެ ޚިދުމަތުން ޑިސްކަނެކްޓު ކޮށްފައި ވެ އެވެ.
ނޯތު ކޮރެއާގެ ލީޑަރު ކިމް ޖޮންގް އުންއާ އަސްކަރިއްޔާގެ ބޭފުޅެއް ކޮމްޕިއުޓަރެއް ކައިރީގައި --
މިއަދު ދުނިޔޭގެ ތިން ބިލިޔަނަށް ވުރެ ގިނަ މީހުން އިންޓަނެޓުގެ ޚިދުމަތް ބޭނުން ކުރެ އެވެ. އޭގެ ތެރެއިން ދެބައިކުޅަ އެއްބައި މީހުންނަކީ އޭޝިއާ ގައުމުތަކަށް ނިސްބަތްވާ މީހުންނެވެ. އެންމެ ގިނައިން އިންޓަނެޓު ބޭނުންކުރަނީ ޗައިނާ، އިންޑިއާ، އެމެރިކާ، ބްރެޒިލް އަދި ޖަޕާނު ރައްޔިތުންނެވެ. އެންމެ މަދުން އިންޓަނެޓު ބޭނުންކުރަނީ މާޝަލް އައިލެންޑްސް، ޓިމޯ ލެސްޓޭ، ކިރިބަޓީ، މައިކްރޮނޭޝިއާ އަދި މޮނާކޯ ރައްޔިތުންނެވެ.