ބ. އަތޮޅުގައި ތަރައްގީ ކުރަމުން އަންނަ "ފިނޮޅު" ރިސޯޓްގައި މަސައްކަތްކުރާ 50 އެއްހާ މީހުން ކާނާ ވިހަވެއްޖެ އެވެ.
ބ. އޭދަފުށީގައި ހުންނަ އެ އަތޮޅު ހޮސްޕިޓަލުގެ މެނޭޖަރު، އަހުމަދު ވަހީދު "ސަން" އަށް ވިދާޅުވީ ފިނޮޅު ރިސޯޓުގައި މަސައްކަތް ކުރާ 50 މީހަކު ކާނާވިހަވި ކަމުގެ މައުލޫމާތު ލިބިފައިވާ ކަމަށެވެ. އަދި މިހާރު އޭގެތެރޭން 25 މީހަކަށް އެ ހޮސްޕިޓަލުގައި ފަރުވާ ދެމުން އަންނަ ކަމަށްވެސް އޮފިޝަލް ވިދާޅުވި އެވެ.
"އަދި 25 މީހުން އަންނާނެ ކަމަށް އަޅުގަނޑުމެންނަށް މައުލޫމާތު ލިބެނީ،" ވަހީދު ވިދާޅުވި އެވެ.
ވަހީދު ވިދާޅުވީ 25 މީހުންނަށް އެ ހޮސްޕިޓަލުން ފަރުވާ ދެމުން އައި ނަމަވެސް މާބޮޑަށް ހާލު ސީރިއަސް މީހަކު ނެތް ކަމަށެވެ.
ބަނޑުގައި ރިއްސައި، ހޮޑުލާތީ އެނދުމަތިކޮށްގެން 10 މީހަކަށް ފަރުވާ ދެމުން އަންނަ ކަމަށް ވަހީދު ވަނީ ސަން އަށް ވިދާޅުވެފަ އެވެ.
ސަންއަށް އެނގިފައިވާ ގޮތުގައި ފިނޮޅު ރިސޯޓުގައި މަސައްކަތްކުރާ މީހުން ތިބެނީ އެރަށް ކައިރީގައި އޮންނަ މާ މަޑުއްވަރި ކިޔާ ފަޅުރަށެއްގައެވެ.