ސިފައިންގެ 124 ވަނަ އަހަރީ ދުވަހުގެ މުނާސަބަތުގައި އެމްއެންޑީއެފުން ބާއްވާ 17 ވަނަ ސިފައިންގެ ފޮޓޯ މައުރަޒު ރ. ދުވާފަރުގައި ބާއްވާ ގޮތަށް ހަމަޖެހިއްޖެ އެވެ.
އެމްއެންޑީއެފް އިން ބުނީ މިއަހަރުގެ ފޮޓޯ މައުރަޒު ކުރިއަށް ދާނީ އަންނަ އަންގާރަ އަދި ބުދަ ދުވަހު ދުވާފަރު އަތޮޅު ތައުލީމީ މަރުކަޒުގައި ކަމަށެވެ.
އެ ފޮޓޯ މައުރަޒުގައި 1988 ނޮވެމްބަރު ތިން ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާއާ ގުޅުންހުރި ފޮޓޯތަކާއި، ގުދުރަތީ އެކިއެކި ކާރިސާތަކުގައި ސިފައިން ކޮށްފައިވާ ބައެއް މަސައްކަތްތައް ދައްކުވައި ދޭ ފޮޓޯތަކާއި، އިޖުތިމާއީ އެކިއެކި ހަރަކާތްތަކުގެ އިތުރުން ސިފައިންގެ ތާރީހާއި ރ. ކަނދޮޅުދޫއަށް ސުނާމީ ކާރިސާގައި ލިބުނު ގެއްލުންތައް ދައްކުވައިދޭ ފޮޓޯތަކުގެ އިތުރުން ސިފައިންގެ ހިދުމަތްތަކާ ގުޅުންހުރި ގިނަ ފޮޓޯތަކެއް ދައްކާލުމަށް ހަމަޖެހިފައިވާ ކަމަށް އެމްއެންޑީއެފް އިން މައުލޫމާތުދެ އެވެ.
އެމްއެންޑީއެފް އިން އަންނަނީ ކޮންމެ އަހަރަކުވެސް ދެ ފަހަރު ފޮޓޯ މައުރަޒު ބާއްވަމުންނެވެ.
އެމްއެންޑީއެފް ނޮދަން އޭރިއާ އާއި ދުވާފަރު ކައުންސިލު ގުޅިގެން ކުރިއަށް ގެންދާ މައުރަޒަށް ޒިޔާރަތް ކުރުމުގެ ފުރުސަތު މާދަމާ ހަވީރުން ފެށިގެން އާންމުކޮށް ހުޅުވާލާނެ އެވެ.
ް