އިންޓަ ސްކޫލް ޕޭރެންޓް ޓީޗާސް ނެޓްބޯޅަ މުބާރާތުގެ ބެލެނިވެރިންގެ ބައިގެ ފައިނަލަށް އިސްކަންދަރު ސްކޫލާއި ބިލަބޮންގް ހައި އިންޓަނޭޝަނަލް ސްކޫލް ދަތުރުކޮށްފި އެވެ.
އިސްކަންދާރާއި ބިލަބޮންގް ހައި އިންޓަނޭޝަނަލް ސްކޫލް ފައިނަލަށް ދަތުރުކޮށްފައި ވަނީ ސޯޝަލް ސެންޓަރު ބޭރު ކޯޓުގައި އިއްޔެ ކުޅުނު ސެމީ ފައިނަލު މެޗުތަކުން މޮޅުވެގެންނެވެ.
ބެލެނިވެރިންގެ ބައިގެ ސެމީގެ ފުރަތަމަ މެޗުގައި ކަލާފާނު ސްކޫލުގެ މައްޗަށް ފަސޭހަކަމާއެކު އިސްކަންދަރު ކުރި ހޯދާފައިވަނީ 32-7 އިންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ އިސްކަންދަރުގެ ގޯލް ޑިފެންސް ފާތިމަތު ރިޝްމާ އެވެ.
އެ ބައިގެ ސެމީގެ ދެވަނަ މެޗުގައި ޖަމާލުއްދީން ސްކޫލުގެ މައްޗަށް ބިލަބޮންގް ކުރި ހޯދީ 31-12 އިންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ ބިލަބޮންގްގެ ގޯލް ޑިފެންސް ނަސްފާ އާމިރާ އެވެ.
މިދިޔަ މަހުގެ 25 އިން ފެށިގެން މިއަދުގެ ނިޔަލަށް ކުރިއަށްދާ އެ މުބާރާތުގައި މުދައްރިސުންގެ ބަޔާއި ބެލެނިވެރިންގެ ބައި ހިމެނެ އެވެ. އެ މުބާރާތުގެ ބެލެނިވެރިންގެ ބައިގައި 18 ސްކޫލަކުން ވާދަކުރާއިރު، ޓީޗަރުންގެ ބައިގައި 17 ސްކޫލަކުން ވާދަކުރެ އެވެ.
އެ މުބާރާތުގެ ބެލެނިވެރިންގެ ބަޔާއި މުދައްރިސުންގެ ބައިގެ ފައިނަލު މެޗު މިރޭ ކުޅުމަށް ހަމަޖެހިފައިވެ އެވެ.