އިސްކަންދަރު ސްކޫލުގެ މުދައްރިސުން "އިސްކަންދަރު ވޯކާސް ޔޫނިއަން"ގެ ނަމުގައި އުފެއްދި ޔޫނިއަން ބަލައިނުގަންނާނެ ކަމަށާއި، އެ ޔޫނިއަންގެ އެއްވެސް ހަރަކާތެއް ނުހިންގޭނެ ކަމަށް އިސްކަންދަރު ސްކޫލުގެ ޕްރިންސިޕަލް އެންގެވީ މިނިސްޓްރީގެ ލަފާގެ މަތިން ކަމަށް، އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު މިއަދު ވިދާޅުވެއްޖެއެވެ.
މިއަދު މަޖިލީހުގެ ޖަލްސާގައި ކެންދޫ ދާއިރާގެ އެމްޑީޕީ މެންބަރު މަޢުރޫފް ޛާކިރުގެ ސުވާލަކަށް ޖަވާބުދެއްވަމުން ޝަފީޢު ވިދާޅުވީ، ޔޫނިއަން ރަޖިސްޓްރީކުރުމާބެހޭ ގަވައިދުގައިވާ ގޮތުން ޔޫނިއަންގެ ނަމުގައި ދިވެހި ދައުލަތުގެ ނުވަތަ ސަރުކާރުގެ މުއައްސަސާއެއްގެ ނަމެއް، ނުވަތަ އެފަދަ ނަމަކާ އޮޅުންއަރާފާނެ ފަދަ ނަމެއް ޔޫނިއަކަށް ނުކިޔޭނެ ކަމަށެވެ.
އާންމު އިދާރާތަކާއި ކުންފުނިތަކާ ޚިލާފަށް ސްކޫލުތަކަކީ ޚާއްސަ ހިފެހެއްޓުންތަކެއް ހުންނަ ތަންތަން ކަމަށާއި، ސްކޫލުތަކަކީ އެތައް ބައެއްގެ އިހުސާސްތަކަކާ ގުޅިފައިވާ ތަންތަން ކަމަށް، ޝަފީޢު ވިދާޅުވިއެވެ.
އެޑިއުކޭޝަން މިނިސްޓަރު ޝަފީއު, މެންބަރުގެ ސުވާލަށް މިއަދުގެ ޖަލްސާގައި ޖަވާބު ދެއްވަނީ-- ފޮޓޯ: ރައްޔިތުންގެ މަޖިލިސް
އޭނާ ވިދާޅުވިގޮތުގައި މުދައްރިސުންގެ ހައްގުތައް ހިމާޔަތްކުރުމަށް ބޭރު ގައުމުތަކުގައި ޔޫނިއަންތައް އުފައްދައިފައިވަނީ ގައުމީ ފެންވަރުގައި، ނުވަތަ އެ ސަރަހައްދަކަށް ނިސްބަތްކޮށެވެ.
ޝަފީޢު ވިދާޅުވީ، ސްކޫލުތަކުގެ ނަންތައް ބޭނުންކޮށްގެން ޔޫނިއަންތައް އުފެއްދިދާނެ ކަމަށް ގަބޫލުނުކުރައްވާ ކަމަށެވެ.
"އެ ރަޖިސްޓްރީކުރެވިފައި އޮތީ އެންމެ ރަނގަޅު ގޮތަކަށް ކަމަށް އަޅުގަނޑުމެން ނުދެކެން، އެ މައްސަލަ މިހާރު އަޅުގަނޑުމެން ވާނީ ޔޫނިއަންގެ ރަޖިސްޓްރާއަށް ހުށަހެޅުމަށްޓަކައި ތައްޔާރުވަމުން، ސްކޫލުގެ ޕްރިންސިޕަލް އަމަލުކޮށްފައިވަނީ މިނިސްޓްރީ އޮފް އެޑިއުކޭޝަން ދެއްވައިފައިވާ އިރުޝާދާ އެއްގޮތަށް،" ޝަފީޢު ވިދާޅުވިއެވެ.
ސްކޫލުތަކުގައި މުދައްރިސުންގެ ހައްގުތައް ހިމާޔަތްކުރުމަށް މަސައްކަތްކުރުމުގެ ފުރުސަތު އެބައޮތް ކަމަށް ވެސް ޝަފީޢު ވިދާޅުވިއެވެ.