ދިވެހި ދައުލަތުގެ ސިޔާދަތާއި ދިވެހިރާއްޖޭގެ އިސްތިގުލާލު ރައްކާތެރިކުރުމަށްޓަކައި ކުރަންޖެހުނު ކޮންމެކަމެއް އެއްވެސް ޖެހިލުމެއް ނެތި ފަނޑިޔާރުން ކުރާނެ ކަމަށް ކްރިމިނަލް ކޯޓު ހިންގުމާ ހަވާލުވެ ހުންނެވި ގާޒީ އަބްދުލް ބާރީ ޔޫސުފް ވިދާޅުވެއްޖެ އެވެ.
ހިއުމަން ޓްރެފިކިންއާ ދެކޮޅަށް ކުރެވިދާނެ ކަންތައްތަކާ ބެހޭގޮތުން މަޝްވަރާކުރުމަށް ޑިޕާޓްމަންޓު އޮފް ޖުޑިޝަލް އެޑްމިނިސްޓްރޭޝަނާ ގުޅިގެން ޕެރެޑައިސް އައިލެންޑް ރިސޯޓުގައި ބޭއްވި ދެދުވަހުގެ ސެމިނާ ނިންމުމުގެ ރައްސްމިއްޔާތުގައި ވާހަކަފުޅުދައްކަވަމުން ބާރީ ވިދާޅުވީ ހިއުމަން ޓްރެފިކިންގެ މައްސަލަތަކަކީ އޭގެތެރެއިން ވަރަށް ގިނަ ބާވަތް ބާވަތްތަކުގެ ކުށްތަކަށް އަރައިގަންނަން މަގުފަހިކުރުވާ ކަމެއް ކަމަށެވެ. އެކަންކަން ހުއްޓުވުމަށް ޝަރުއީ ނިޒާމުގެ ތެރެއިން ކުރެވެން ހުރި ހުރިހާކަމެއް ފަނޑިޔާރުން ކުރައްވަމުން ގެންދަވާ ކަމަށް ބާރީ ވިދާޅުވި އެވެ.
ކުރިއަށް އޮތްތަނުގައިވެސް ދިވެހި ދައުލަތާއި ދިވެހިރާއްޖޭގެ އިސްތިގުލާލު ރައްކާތެރިކުރުމަށް ފަނޑިޔާރުން ޖެހިލުންނުވާނެ ކަމަށް ބާރީ ވަނީ ވިދާޅުވެފަ އެވެ.
މެއި 5، 2016: ހިއުމަން ޓްރެފިކިން އާ ދެކޮޅަށް ޝަރުއީ ދާއިރާއިން ބޭއްވި ސެމިނާގެ ނިންމުމުގެ ތެެރެއިން --- ސަން ފޮޓޯ/ ޔޫސުފް ސޮފްވާން
"އަޅުގަނޑު ޔަގީންކޮށް އަރުވަނީ ކުރިއަށް އޮތްތަނުގައިވެސް ދިވެހި ދައުލަތުގެ ސިޔާދަތާއި އިސްތިގުލާލު ރައްކާތެރިކުރުމަށްޓަކައި އަޅުގަނޑުމެން ޖުޑިޝަރީގެ ފަރާތުން ނުވަތަ ފަނޑިޔާރުންގެ ފަރާތުން ކުރަންޖެހުނު ކޮންމެ ކަމެއް އެއްވެސް ޖެހިލުމެއްނެތި ކުރާނެ ކަން. އަޅުގަނޑުމެން ކިބައިން ފުލުހުން އަމުރަކަށް އެދިއްޖެނަމަ އަޅުގަނޑުމެން މިދަނީ އެކަންކޮށްދެމުން،" ބާރީ ވިދާޅުވި އެވެ.
އިންސާނީ ވަގުފާނީގެ ޝިކާރައަކަށް ވެފައި ތިބޭ ފަރާތްތަކަށް ދޭންޖެހޭ ހުރިހާ އެއްބާރުލުމެއް ޖުޑިޝަރީގެ ފަރާތުން ދެމުންގެންދާކަން ބާރީ ވަނީ ފާހަގަކުރައްވާފަ އެވެ. ޝަރުއީ ތަރަހައިގެ ތެރެއިން އިންސާނީ ވަގުފާރި ހުއްޓުވުމަށްޓަކައި ސަރުކާރާއި މިނިސްޓްރީތައް އަދި މުއައްސަސާތައް ގުޅިގެން މިހާރުވެސް މަސައްކަތް ކުރާކަން ފާހަގަކުރައްވައި ބާރީ ވިދާޅުވީ ކުރިއަށް އޮޮތްތަނުގައިވެސް އެ މަސައްކަތް ކުރާނެ ކަމަށެވެ.
ދެދުވަހުގެ މުއްދަތަށް ޑިޕާޓްމަންޓު އޮފް ޖުޑިޝަލް އެޑްމިނިސްޓްރޭޝަނުން އިންތިޒާމުކޮށްގެން ބޭއްވި ސެމިނާގައި އިންސާނީ ވަގުފާރިއާ ދެކޮޅަށް މަސައްކަތްކުރާނެ ގޮތުގެ މައުލޫމާތު ދެއްވި ބޭރުގެ އިއްޒަތްތެރިންގެ ފަރާތުން ވަރަށް ގިނަ ކަންކަން ދަސްވިކަމަށް ބާރީ ވިދާޅުވި އެވެ.
މެއި 5، 2016: ހިއުމަން ޓްރެފިކިން އާ ދެކޮޅަށް ޝަރުއީ ދާއިރާއިން ބޭއްވި ސެމިނާގެ ނިންމުމުގެ ތެެރެއިން --- ސަން ފޮޓޯ/ ޔޫސުފް ސޮފްވާން
"އަޅުގަނޑުމެންގެ ޝަރުއީ ދާއިރާ ހަރުދަނާކުރުމަށްޓަކައި އަދި ހާއްސަކޮށް ހިއުމަން ޓްރެފިކިންގެ މައްސަލަތަކުގައި ކަންކުރާނެ ގޮތާބެހޭގޮތުން ވަރަށް ގިނަ މައުލޫމާތުތަކެއް ލިބިގެން ހިނގައްޖެ. މި ސަބަބުތަކަށްޓަކައި މިބާވަތުގެ ބައްދަލުވުމެއް ރާއްވަވާ ހިންގަވާދެއްވީތީ ދިވެހިރާއްޖޭގެ ސަރުކާރަށާއި ޚާއްސަކޮށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައުޔޫމަށާއި އުއްތަމަ ފަނޑިޔާރު އަބްދުﷲ ސައީދަށާއި ޔުނައިޓެޑް ސްޓޭޓް އޮފް އެމެރިކާގެ ސަރުކާރަށް ޝުކުރު ދަންނަވަން،" ބާރީ ވިދާޅުވި އެވެ.
ޝަރުއީ ދާއިރާ ކުރިއެރުވުމަށް ސަރުކާރާއި ސަރުކާރުގެ ހުރިހާ މުއައްސަސާއެއް ހިމެނޭގޮތުން ދެއްވާ އެއްބާރުލެއްވުމަށް ބާރީ ވަނީ ޝުކުރު އަދާކުރައްވާފަ އެވެ. ހިއުމަން ޓްރެފިކިން އާ ދެކޮޅަށް މަސައްކަތް ކުރުމަށް ރާއްޖޭގެ މެޖިސްޓްރޭޓުންނާއި ފަނޑިޔާރުން މިއަދު ވަނީ ވައުދެއްގައި ސޮއިކުރައްވާފަ އެވެ.