މިދިޔަ ހޮނިހިރު ދުވަހު އަމިއްލަ އިހްތިޔާރުގައި އިމާރާތަކުން ފުންމާލި މީހާގެ ހާލު މިހާރު ރަނގަޅު ކަމަށް އައިޖީއެމްއެޗް އިން ބުނެފި އެވެ.
އޭނާ އަށް ފުރަތަމަ ފަރުވާދީފައި ވަނީ އޭޑީކޭ ހޮސްޕިޓަލުންނެވެ. ނަމަވެސް ފަހުން ވަނީ އައިޖީއެމްއެޗްއަށް ބަދަލުކޮށްފަ އެވެ.
އައިޖީއެމްއެޗްގެ މީޑިއާ އޮފިޝަލް ޒީނަތު އަލީ ހަބީބު "ސަން" މިއަދު އަށް ވިދާޅުވީ އެ ހަދިސާގައި އިމާރާތުން ފުންމާލި ދިވެހި މީހާގެ ބޮލަށް ގެއްލުންތަކެއްވި ނަމަވެސް މިހާރު ހާލު ރަނގަޅު ކަމަށެވެ. އޭނާ އަށް މިހާރު ވެސް އަންނަނީ ފަރުވާދެމުން ކަމަށް ވިދާޅުވި އެވެ.
އޭނާ އިމާރާތުން ފުންމާލައިގެން ގޮސް ޖެހުނީ ވައިޖަހައިގެން ފުއްޕާފައިވާ އެއްޗެއްގެ މައްޗަށެވެ. ނަމަވެސް އެކަށީގެންވާ ވަރަށް އެއަށް ވައި ޖަހާފައި ނުވުމުން އޭނާގެ ބޯ ބިންމަތީގައި ޖެހި ފަޅައިގެން ގޮސްފައިވެ އެވެ. ހޮސްޕިޓަލަށް ގެންދިޔަ އިރު އޭނާގެ ހެޔެއް ނެތެވެ.
އާ ގާނޫނުލްއުގޫބާތުގައި ބުނެފައިވާ ގޮތުން އަމިއްލަޔަށް މަރުވާން އުޅުމަކީ ކުށެކެވެ. އަދި އަމިލަޔަށް މަރުވާން އުޅުނުކަން ސާބިތުވެއްޖެ ނަމަ ދެވޭ އެންމެ ބޮޑު އަދަބެއްގެ ގޮތުން ގާނޫނުލްއުގޫބާތުގައި ކަނޑައަޅާފައި ވަނީ އެއް އަހަރުގެ ޖަލު ހުކުމެވެ.
އަމިއްލަ އަށް މަރުވުމުގެ މައްސަލަތައް އިންތިހާ އަށް އިތުރުވަމުން އަންނަ އިރު މިއީ އަހަރެމެންގެ މާތްވެގެންވާ އިސްލާމްދީނުގައި ވަރަށް ބޮޑު ހަރާމް ކަމެކެވެ. އައްޝެއިޚް އަހުމަދު ފަހުމީ ދީދީ ވިދާޅުވި ގޮތުގައި އަމިއްލަ އަށް މަރުވުން ނުވަތަ މަރުވާ ފަދަ ކަމެއް ކުރުން ނުވަތަ އަމިއްލަ ހަށިގަނޑަށް ގެއްލުންދިނުމަކީ އިސްލާމް ދީނުގައި ހަރާމް ކުރައްވާފައިވާ ބޮޑު ފާފައެއް ކަމަށެވެ.