އެންޓި ކޮރަޕްޝަން ކޮމިޝަން(އޭސީސީ)ގެ ނަޒާހަތްތެރިކަމުގެ ފުރަތަމަ ބިނާ ފުވައްމުލަކުގައި ބަހައްޓައިފި އެވެ.
އެ ރަށުގައި މިއަދު ފާހަގަ ކުރަމުން އަންނަ ގައުމީ އެންޓި ކޮރަޕްޝަން ދުވަހާ ގުޅިގެން އެ ރަށު އެއާޕޯޓުގައި ބެހެއްޓި އެބިނާ ހުޅުއްވައި ދެއްވީ ޓޫރިޒަމް މިނިސްޓްރީގެ ޑެޕިއުޓީ މިނިސްޓާ ހަސަން ޝިރާރު އެވެ.
ނަޒާހަތްތެރިކަމުގެ ވައުދުގެ މަގުސަދަކީ ދައުލަތުގެ މުވައްޒަފުން ނަޒާހަތްތެރިކަމާ އެކު ޒިންމާދާރުވުމަށް ބާރުއެޅުމުގެ އިތުރުން ދައުލަތުން ފޯރުކޮށްދޭ ހިދުމަތްތައް އިންސާފުވެރިކަމާ އެކު ފޯރުކޮށްދިނުމަށް ހުރިހާ މުވައްޒަފުން ވެސް ހަމަހަމަކަމާ އެކު ރައްޔިތުންނަށް ހިދުމަތް ކުރުމަށް އަޒުމް ކަނޑައެޅުމުގެ ވައުދެވެ.
ނަޒާހަތްތެރިކަމުގެ ބިނާ ހުޅުވުމުގެ ހަފްލާގެ ތެރެއިން-- ފޮޓޯ: އޭސީސީ
އޭސީސީގެ އޮފިޝަލަކު މިއަދު ސަން އަށް ވިދާޅުވީ އެ ބިނާގެ މަގުސަދަކީ އާންމުންގެ މެދުގައި ނަޒާހަތްތެރިކަން އިތުރުކޮށް ކޮރަޕްޝަނާ ދެކޮޅަށް ހޭލުންތެރިކުރުވުން ކަމަށެވެ.
ފުވައްމުލަކު އެއާޕޯޓްސްގެ ފަރާތުން ވެސް މިއަދު ވަނީ އެއެއްބަސްވުމުގައި ސޮއިކޮށްފަ އެވެ.
ނަޒާހަތްތެރިކަމުގެ ވައުދަކީ ރާއްޖޭގެ ގިނަ އަދަދެއްގެ އޮފީސްތަކަކުން ސޮއިކޮށް ބައިވެރިވެފައިވާ ވައުދެކެވެ.