ތެހެރާން (އެޕްރީލް 17): އިންޑިޔާގެ ޚާރިޖީ ވަޒީރާ ސުޝްމާ ސްވަރާޖް ރަސްމީ ދަތުރުފުޅެއްގައި އީރާނަށް ވަޑައިގެންފިއެވެ.
ސުޝްމާގެ މިދަތުރުފުޅުގައި އީރާނުގެ ޚާރިޖީ ވަޒީރު މުހައްމަދު ޖަވާދު ޒަރީފްއާ ބައްދަލުކުރެއްވުމުގެ އިތުރުން އީރާނުގެ ރައީސް ހަސަން ރޫހާނީގެ އަރިހަށް އިހްތިރާމްގެ ޒިޔާރަތެއް ކުރައްވަންވެސް ހަމަޖެހިފައިވެއެވެ.
ސުޝްމާއަކީ އީރާނާދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލިފަހުން އީރާނަށް ވަޑައިގަންނަވާ އިންޑިޔާގެ އެންމެ އިސް އެއް މަސްއޫލުވެރިޔާއެވެ. ދަތިކުރުމުގެ ފިޔަވަޅުތަކުން އީރާނަށް ސަލާމަތްވުމާއެކު އިންޑިޔާއަށްވަނީ އީރާނާ ވިޔަފާރީގެ މުޢާމަލާތްތައް ހިންގައިގެން ރަނގަނޅު ފައިދާތަކެއް ޙާސިލްކުރުމުގެ މަގު ތަނަވަސްވެފައިކަމަށް އިންޑިޔާގެ މީޑިޔާ ބުނެއެވެ.
ދަތިކުރުމުގެ ފިޔަވަޅުތައް އޮތްދުވަސްވަރުގައިވެސް އިންޑިޔާއަކީ އީރާނާއެކު އިގްތިސާދީ އަދި ވިޔަފާރީގެ މުއާމަލާތް އެންމެ ބޮޑަށް ކުރަމުން ގެންދިޔަ އެއްގައުމެވެ. އަދި ދަތިކުރުމުގެ ފިޔަވަޅުތައް އުވާލުމަށްފަހު އިންޑިޔާއިންވަނީ އީރާނުން ތެޔޮ ގަންނަ މިންވަރު ވަރަށް ބޮޑުތަން އިތުރުކޮށްފައެވެ.
ސުޝްމާގެ މިދަތުރުފުޅުގެ އެއްބޭނުމަކީ އިންޑިޔާގެ ބޮޑުވަޒީރު ނަރަންދުރަ މޯދީ އީރާނަށް ކުރައްވަން ގަސްދުކުރައްވާ ދަތުރުފުޅަށް ތައްޔާރުވުމުގެ ގޮތުން ކުރަންޖެހޭ ކަންކަން ކުރެއްވުމެވެ. އަނެއް ބޭނުމަކީ އީރާނާއެކު ގުޅުންތައް ބަދަހި ކުރުމުގެ ގޮތުން މިހާރުން މިހާރަށް އެއްބަސްވާންޖެހޭ އެއްބަސްވުންތަކުގައި ސޮއިކުރެއްވުމެވެ.
އިންޑިޔާގެ ހަކަތައާބެހޭ ވަޒީރު ދަރްމެންދްރާ ބަރަދާން ވެސް ދާދިފަހުންވަނީ އީރާނަށް ވަޑައިގެން ހަކަތައާބެހޭ އެއްބަސްވުންތަކެއްގައި އީރާނުގެ މަސްއޫލުވެރިންނާއެކު ސޮއިކުރައްވާފައެވެ. އަދި އީރާނުގެ ޚާރިޖީ ވަޒީރު ޖަވާދު ޒަރީފް ވެސް މިދިޔަމަހުވަނީ އިންޑިޔާއަށް ވަޑައިގެން އިންޑިޔާގެ ބޮޑުވަޒީރު ނަރަންދުރަ މޯދީ އާ ބައްދަލުކުރައްވާފައެވެ.
އިންޑިޔާއިން އިންޕޯޓްކުރާ އީރާނުގެ މުދަލުގެ ތެރޭގައި މައިގަނޑު ގޮތެއްގައި ހިމެނެނީ ތެލާއި ޕެޓްރޯ ކެމިކަލްގެ ބާވަތްތަކާއި ބައެއް ބާވަތުގެ މައުދަނެވެ. އީރާނުން އިންޕޯޓްކުރާ އިންޑިޔާގެ މުދަލުގެ ތެރޭގައި ހިމެނެނީ ދަނޑުވެރިކަމުގެ ބާވަތްތަކާއި ބައެއް ބާވަތުގެ މެޝިނަރީއެވެ. (ރޮއިޓާސް)