މައިލޯ އިންޓަރ ސްކޫލް ފުޓްބޯޅަ މުބާރާތުގެ 18 އަހަރުން ދަށުގެ އުމުރުފުރާގެ ފައިނަލުގައި އަހުމަދިއްޔާ އިންޓަރނޭޝަނަލް ސުކޫލާއި ދެކޮޅަށް ގަލޮޅު މަދަރުސާ މާދަމާ ނިކުންނާނެއެވެ.
ޖުމްލަ ހަތަރު ޓީމާއި އެކު ފެށި އެ މުބާރާތުގެ ފައިނަލަށް އަހުމަދިއްޔާ އިންޓަނޭޝަނަލް ސުކޫލް ދަތުރުކުރީ ކުޅުނު ތިން މެޗު ކާމިޔާބްކޮށް ނުވަ ޕޮއިންޓާއި އެކު އެވެ. ދެވަނަ ޓީމުގެ ގޮތުގައި ގަލޮޅު މަދަރުސާ ފައިނަލަށް ދަތުރުކުރީ ކުޅުނު ތިން މެޗުގެ ތެރެއިން ދެ މެޗު ކާމިޔާބް ކޮށް ހަ ޕޮއިންޓާއި އެކު އެވެ. އެ ދެ ޓީމުގެ އިތުރުން ދެން އެ މުބާރާތުގައި ވާދަކުރީ ކ. ގުރައިދޫ ސުކޫލާއި އަރަބިއްޔާ ސްކޫލެވެ.
އަހްމަދިއްޔާ އިންޓަރނޭޝަނަލް ސްކޫލާއި ގަލޮޅު މަދަރުސާ ފައިނަލްގައި ބައްދަލު ކުރާއިރު މި ދެޓީމް ގުރޫޕް ސްޓޭޖްގައި ބައްދަލުކުރި މެޗު ކާމިޔާބް ކުރީ އަހުމަދިއްޔާ އިންޓަނޭޝަނަލް ސުކޫލުންނެވެ.
އެފްއޭއެމް އިން އިންތިޒާމް ކޮށްގެން ކޮންމެ އަހަރަކު ވެސް ބާއްވަމުން އަންނަ އިންޓަރސުކޫލް ފުޓްބޯޅަ މުބާރާތް ތިން އުމުރުފުރާއަކަށް ބަހާލައިގެން ކުރިއަށްދާއިރު 14 އަހަރުން ދަށުގެ ޗެމްޕިއަންކަން ހޯދީ އަހުމަދިއްޔާ ބަލިކޮށް އިސްކަންދަރު ސުކޫލްއެވެ.
އަދި 16 އަހަރުން ދަށުގެ ފައިނަލް ހޮނިހިރު ދުވަހު ކުޅެވޭއިރު އެ މެޗުގައި ދ. އަތޮޅު މަދަރުސާއާ ދެކޮޅަށް ނިކުންނާނީ ޣާޒީ ސުކޫލް އެވެ.