ކޯޕަރޭޓް ބޯޑުތަކުގައި އަންހެނުންގެ ހިއްސާ އިތުރުކޮށް، އަންހެނުންގެ ތަރައްގީއަށް މަސައްކަތް ކުރާ ޖަމިއްޔާ ވިމެން އޮން ބޯޑްސް (ވޮބް)އަށް، ބައިނަލްއަގްވާމީ އެވޯޑެއް ކަމުގައިވާ ގޯލްޑެން ގްލޯބް ޓައިގާސް އެވޯޑު ލިބިއްޖެ އެވެ.
ވިމެން އޮން ބޯޑްސްއަށް ލިބިފައިވަނީ "ވިމެން ލީޑަރޝިޕް ރޯލް ފޯ އެކްސެލެންސް އިން އެންޖީއޯ އެންޑް ފިލަންތުރޮޕީ" ނުވަތަ "އާންމު ޚިދުމަތް ކުރުމާއި ޖަމިއްޔާ ހިންގުމުގައި އަންހެނުންގެ ލީޑަރޝިޕް" އެވޯޑެވެ.
ވިމެން އޮން ބޯޑްސްގެ ފަރާތުން އެ އެވޯޑާ ހަވާލުވެވަޑައިގަތީ، މެލޭޝިއާގެ ކުއަލަ ލަމްޕޫރުގައި ރޭ އޮތް ޚާއްސަ ރަސްމިއްޔާތެއްގައި، ވިމެން އޮން ބޯޑްސްގެ ނައިބު ރައީސާ ޑރ. އާއިޝަތު މުނީޒާ އެވެ.
މި އެވޯޑާ ގުޅިގެން ވިމެން އޮން ބޯޑްސްގެ ރައީސާ ފާތިމަތު ޝަފީގާ "ސަން" އަށް ވިދާޅުވީ، މިފަދަ ބައިނަލްއަގުވާމީ އެވޯޑުތައް އެޖަމިއްޔާއަށް ލިބުމަކީ އެޖަމިއްޔާގެ މަސައްކަތަށް ލިބޭ ވަރަށް ބޮޑު ހިތްވަރެއް ކަމަށެވެ.
"މި އެވޯޑާއި އެކު، ކުރިޔަށް އޮތް ތަނުގައި ވެސް އަޅުގަނޑުމެންގެ އެންޖީއޯ ދާނީ، އަންހެނުންގެ ތަރައްގީއަށް ފުޅާ ދާއިރާގައި މަސައްކަތްކޮށް، އަންހެނުންނަށް ހުރި ހުރަސްތައް ނައްތާލުމަށް މަސައްކަތް ކުރަމުން،" ޝަފީގާ ވިދާޅުވި އެވެ.
ވިމެން އޮން ބޯޑްސްއަށް މި އެވޯޑު ލިބިފައިވާ އިރު، އެ ޖަމިއްޔާގައި އިސްކޮށް ހަރަކާތްތެރިވާ، އަދި މޯލްޑިވްސް ޑިވެލޮޕްމެންޓް އެލަޔަންސްގެ ނައިބު ލީޑަރު އާއިޝަތު ރަފިއްޔާއަށް ވެސް ވަނީ ގޯލްޑެން ގްލޯބް ޓައިގާސް އެވޯޑެއް ލިބިވަޑައިގެންފަ އެވެ.
ރަފިއްޔާއަށް ލިބިވަޑައިގެންފައި ވަނީ އައުޓްސްޓޭންޑިންގ ވިމެން ލީޑަޝިޕް އެވޯޑެވެ.