އިގްތިސާދީ ތަރައްގީ އަންނަން ޖެހެނީ ތިމާވެއްޓަށް ގެއްލުން ނުލިބޭނެ ގޮތަކަށް، ތިމާވެށި ހިމާޔަތް ކުރެވޭނެ ފަދަ ގޮތަކަށް ކަމަށް އެންވާރަމެންޓް މިނިސްޓަރު ތާރިގް އިބްރާހިމް ވިދާޅުވެއްޖެ އެވެ.
ފޯ ސީޒަންސް ރިސޯޓްސް މޯލްޑިވްސްއިން ހިންގި އެޕްރެންޓިސްޝިޕް ޕްރޮގްރާމުގެ ބައިވެރިން ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުން، މިނިސްޓަރު ތާރިގް ވިދާޅުވީ ރާއްޖޭގެ އެންމެ ބޮޑު ސިނާއަތަކީ ފަތުރުވެރިކަމަށް ވާ އިރު، ފަތުރުވެރިކަމާއި ތިމާވެއްޓަކީ ގުޅި ލާމެހިފައިވާ ދެ ކަން ކަމަށެވެ.
"އަޅުގަނޑުމެންނަށް ދުނިޔެގެ ފެންވަރުގެ މެހެމާންދާރީ ދެވޭ ސިނާއަތެއް ލިބިފައި މި ވަނީ. ސަބަބަކީ މާތްﷲ އަޅުގަނޑުމެންނަށް ގުދުރަތުން ދެއްވާފައިވާ ރީތިކަމާއި އީކޯސިސްޓަމް. ކަނޑުގެ ދިރުންތަކުން ފުރިގެންވާ، ދުނިޔޭގެ ހަތް ވަނައަށް އެންމެ ބޮޑު މުރަކައިގެ ނިޒާމު ރާއްޖޭގައި އެބަ ވޭ،" މިނިސްޓަރު ވިދާޅުވި އެވެ.
ނަމަވެސް މޫސުމަށް އަންނަ ބަދަލުތަކުގެ ސަބަބުން ރާއްޖެއަށާއި ރާއްޖޭގެ ބޮޑެތި ތިމާވެއްޓަށް ބޮޑެތި ގޮންޖެހުންތަކެއް ކުރިމަތިވަމުންދާ ކަމަށާއި، އެލަޔަންސް އޮފް ސްމޯލް އައިލެންޑް ސްޓޭޓްސްގެ ޗެއާގެ ގޮތުގައި ކުދި ޖަޒީރާ ގައުމުތަކަށް ދިމާވަމުން އަންނަ ތިމާވެށީގެ މައްސަލަތައް ހައްލު ކުރުމަށް ރާއްޖެއިން ވަކާލާތު ކުރަމުން ގެންދާނެ ކަމަށް މިނިސްޓަރު ތާރިގް ވިދާޅުވި އެވެ.