ޒުވާނުންނަށް ތަފާތު ހުނަރުތައް ދަސްކޮށްދީ، ވަޒީފާގެ ބާޒާރަށް ނުކުތުމަށް ތައްޔާރު ކުރުމަށްޓަކައި ވޮކޭޝަނަލް ޓްރެއިނިންގ ސެންޓަރެއް ބ. ކިހާދޫގައި ގާއިމުކޮށް، އެތަން ހިނގުމަށް ކޯސްޓްލައިން ފައުންޑޭޝަނާ ހަވާލު ކޮށްފި އެވެ.
މިއަދު އެޑިއުކޭޝަން މިނިސްޓްރީގައި ބޭއްވި ރަސްމިއްޔާތުގައި، ކިހާދޫގައި ވޮކޭޝަނަލް ސެންޓަރު އެޅުމުގެ އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ، އެ މިނިސްޓްރީގެ ސީނިއާ ޕޮލިސީ އެގްޒެކެޓިވް އިބްރާހިމް އިސްމާއީލް އަލީ އެވެ. އަދި ކޯސްޓްލައިން ފައުންޑޭޝަނުގެ ފަރާތުން ސޮއި ކުރެއްްވީ އެ ކުންފުނީގެ ޑިރެކްޓަރ ހުސައިން މުހައްމަދެވެ.
މި މަސައްކަތް ކޯސްޓްލައިން ފައުންޑޭޝަނުން ކުރުމަށް، މިއަދު ވެވުނު އެއްބަސްވުމުގެ ދަށުން މިނިސްޓްރީން އެ ފައުންޑޭޝަނަށް ވަނީ 223،500 އަކަ ފޫޓުގެ ބިމެއް، 20 އަހަރު ދުވަހުގެ މުއްދަތަކަށް ދޫކޮށްފަ އެވެ.
މިނިސްޓްރީން މައުލޫމާތު ދޭ ގޮތުގައި، ކިހާދޫގައި އެޅޭ ވޮކޭޝަނަލް ސެންޓަރުން މުޅި ރާއްޖެއަށް އަމާޒުކޮށްގެން ތަފާތު ދާއިރާތަކުން ހުނަރު ހުރި ޒުވާނުން އުފެއްދުމަށް މަސައްކަތް ކުރާނެ އެވެ. އެހެން ނަމަވެސް މައިގަނޑު ގޮތެއްގައި ހިންގުމަށް ހަމަޖެހިފައި ވަނީ ފަތުރުވެރިކަމާއި، އެ ދާއިރާއާ ގުޅުންހުރި ތަމްރީނުތަކެވެ.
މީގެ އިތުރުން މިނިސްޓްރީން ބުނީ، ކިހާދޫގައި ވޮކޭޝަނަލް ސެންޓަރު އެޅުމަށް ކޯސްޓްލައިން ފައުންޑޭޝަނާ ހަވާލުކުރީ، ވަޒީފާގެ ބާޒާރުގައި ދިވެހި މަސައްކަތްތެރިންގެ ދައުރު ހަނިވެފައިވާތީ ތަފާތު ފަންނުތަކުން ދިވެހި ޒުވާނުން ތަމްރީނުކުރުމަކީ މުހިއްމު ކަމެއް ކަމަށް ދެކިގެން، އެތަން ގާއިމުކޮށް ހިންގުމުގެ ޝައުގުވެރިކަން އެފަރާތުން ފާޅުކުރުމުން ކަމަށެވެ.