ކުރިއަށް އޮތް އެފްއޭއެމްގެ އިންތިޚާބުގައި ވާދަކުރެއްމުގެ ވިސްނުމެއް މިވަގުތު ނެތް ކަމަށާއި ހުންނަވާނީ މޯލްޑިވްސް އޮލިމްޕިކް ކޮމިޓީގެ ރައީސް ކަމުގައި ކަމަށް އެފްއޭއެމްގެ ނޯމަލައިޒޭޝަން ކޮމިޓީގެ ޗެއާމަން މުހައްމަދު ޝަވީދު ވިދާޅުވެއްޖެއެވެ.
އޮލިމްޕިކް ކޮމިޓީގެ ރައީސް ކަންވެސް ކުރައްވަމުންގެންދަވާ ޝަވީދު މިއަދު އެފްއޭއެމްގެ ކޮންގްރެސްއަށް ފަހު ބޭއްވި ނޫސް ކޮންފަރެންސްގައި ނޫސްވެރިޔަކު ކުރި ސުވާލަށް ޖަވާބު ދެއްވަމުން ވިދާޅުވީ، ކުރިމަތި ލައްވާނަމަ އޭނާއާ މަޝްވަރާ ކުރާ ކްލަބުތަކާއެކު މަޝްވަރާ ކުރައްވާނޭ ކަމަށެވެ.
"އެފަދަ ބޮޑު ނިންމުމެއް އަޅުގަނޑު އެކަންޏެއް ނުނިންމާނަން. ކުރިމަތި ލާނަމަ އަޅުގަނޑާ އަބަދުވެސް މަޝްވަރާ ކުރާ ކުލަބުތަކާއެކު އަޅުގަނޑު މަޝްވަރާ ކުރާނަން،" ޝަވީދު ވިދާޅުވިއެވެ.
ކުޅިވަރު ކައުންސިލުން މިދިޔަ ޖަނަވަރީ މަހު ނިންމާފައިވާ ގޮތުން އޮލިމްޕިކް ކޮމިޓީގެ ރައީސަކަށް އެއްވެސް އެހެން އެސޯސިއޭޝަނެއްގެ ރިޔާސަތު ބަލަހައްޓަވާ މަގާމެއް ފުރުއްވާ މީހަކަށް ކުރިމަތި ނުލެވޭނެއެވެ.
އެހެންކަމުން ޝަވީދު އެފްއޭއެމްގެ ރައީސްކަމުގެ މަގާމަށް ކުރިމަތިލައްވަން ނިންމަވައިފި ނަމަ އޮލިމްޕިކް ކޮމިޓީގެ މަގާމުން އިސްތިއުފާ ދެއްވަން އޭނާއަށް ޖެހިވަޑައިގަންނަވާނެ އެވެ.