މޯބައިލް ފޯނުގެ ނަންބަރު ބަދަލުނުކޮށް، ޚިދުމަތް ހޯދާ ނެޓްވޯކް ބަދަލުކުރެވޭ ޚިދުމަތް ފެށުމުގެ ހުރިހާ ތައްޔާރީއެއްވެ ނިމިފައިވާ ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން ބުނެފި އެވެ.
ކޭމްއިން މައުލޫމާތު ދިން ގޮތުގައި މި މަހު ކުރީކޮޅުގައި އެ ހިދުމަތް ފެށިގެންދާނެ އެވެ.
ކޮމިއުނިކޭޝަން އޮތޯރިޓީގެ ޗީފް އެގްޒެކެޓިވް އިލްޔާސް އަހުމަދު މިއަދު "ސަން" އަށް ވިދާޅުވީ، "ނަންބާ ޕޯޓަބިލިޓީ" ނަމަކަށް ކިޔާ އެ ހިދުމަތް ދޭން ފަށާނެ ތަފްސީލް މާދަމާ ހާމަކުރަން ނިންމާފައިވާއިރު އެ ހިދުމަތް ދިނުމަށް ވާންޖެހޭ ހުރިހާ ތައްޔާރީއެއްވެ ނިމިފައިވާ ކަމަށެވެ.
"ހުރިހާ ތައްޔާރީއެއް ވެނިމިފައި އޮތީ. ވަރަށް އަވަހަށް އެކަން ވެގެންދާނެ،" އިލްޔާސް ވިދާޅުވިއެވެ.
އެ ހިދުމަތުގެ ސަބަބުން ދިރާގު ނަންބަރެއް ގެންގުޅޭ މީހަކު، އުރީދޫ ނެޓްވޯކަށް ބަދަލުވެވިދާނެ އެވެ. އަދި އުރީދޫ ފޯން ނަމްބަރެއް ބޭނުންކުރާ މީހަކު، ދިރާގަށް ވެސް ބަދަލުވެވިދާނެ އެވެ. އެ ހިދުމަތް ދޭނީ ރާއްޖޭގެ މުވާސަލާތީ ހިދުމަތްދޭ ދެ ކުންފުނި ކަމަށްވާ ދިރާގު އަދި އުރީދޫއާ ގުޅިގެންނެވެ.
އުރީދޫގެ ކަސްޓަމަރެއް ދިރާގުގެ ހިދުމަތް ބޭނުންވާ ކަމަށްވާނަމަ މިހާރު ޖެހެނީ ދިރާގުގެ ސިމެއް ގަންނާށެވެ. އަދި ދިރާގުގެ ކަސްޓަމަރެން އުރީދޫ އަށް ބަދަލުވާ ނަމަ ޖެހެނީ އުރީދޫގެ ސިމެއް ގަންނާށެވެ.
ނަމްބަރު ބަދަލު ނުކޮށް، ނެޓްވޯކު ބަދަލު ކުރުމުގެ ހިދުމަތް ތައާރަފު ކުރުމުން އެ މީހެއްގެ އަތުގައި އޮންނަ ނަންބަރަކުން ބޭނުން އޮޕަރޭޓަރެއްގެ ހިދުމަތް ހޯދޭނެ އެވެ. އެ ނަންބަރަކީ ވަކި އޮޕަރޭޓަރަކަށް ނިސްބަތްވާ އެއްޗަކަށް އޭރުން ނުވާނެ އެވެ.