ހދ. އަތޮޅު ތައުލީމީ މަރުކަޒުގެ ސްޕެޝަލް އެޑިއުކޭޝަން ނީޑްސް (ސެން) ޔުނިޓަށް ބޭނުންވާ ވަސީލަތްތައް ދިރާގުން ހަދިޔާކޮށްފިއެވެ.
ދިރާގުން ބުނީ އެ ކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ޕްރޮގްރާމްގެ ދަށުން ކުޅުއްދުފުށި ސިޓީގައި ހުންނަ ސެން ޔުނިޓްކަމަށްވާ ސަންޝައިން ކްލާހަށް އެކުނުފުނިން އެހީތެރިކަން ފޯރުކޮށްދީފައި ވާކަމަށެވެ.
އެގޮތުން ދިރާގުން ހަދިޔާކޮށްފައިވާ ތަކެތީގެ ތެރޭގައި އޮޓޮމެޓިކް ގޮނޑިއާއި ލޮކިންގް ގޮނޑީގެ އިތުރުން ކުލާހުގެ ސެންސަރީ އަދި އެކްޓިވިޓީ ޔުނިޓަށް ބޭނުންވާ ވަސީލަތްތައް ހިމެނެއެވެ.
މި އެހީތެރިކަމުގެ ސަބަބުން ތަފާތު ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ހދ. އަތޮޅު ތައުލީމީ މަރުކަޒުގެ ސެން ޔުނިޓްގެ ކްލާސްރޫމް ސެޓަޕް އިތުރަށް ފުރިހަމަވާނެ ކަމަށް ވެސް ދިރާގުން ވަނީ ބުނެފައެވެ.
އެ ރަސްމިއްޔާތުގައި ވާހަކަދައްކަވަމުން ދިރާގުގެ ކުޅުދުއްފުށި އޮޕަރޭޝަންސް ސެންޓާގެ އެސިސްޓަންޓް މެނޭޖާ އޮޕަރޭޝަންސް، މުޙައްމަދު އަލީ ވަނީ އެއްވެސް ކުއްޖަކު ބާކީނުވާނޭހެން މުޖުތަމައުގައި ޝާމިލު ކުރުމަށް އެއްބާރުލުން ދިނުމަކީ ދިރާގުން ހާއްސަ އަހަންމިއްޔަތުކަމެއް ދޭކަމެއް ކަމަށް ވިދާޅުވެފައެވެ.
އަދި އުއްމީދަކީ އެ ވަސީލަތްތަކުގެ ސަބަބުން ސްކޫލުގެ ޓީޗަރުން ކުރަމުން އަންނަ މިންނެތް މަސައްކަތަށް އިތުރު އެހީތެރިކަމެއް ލިބ،ި ހުރިހާ ކުދިންނަށް ވެސް ކުރިއެރުމާއި އުނގެނުމުގެ ފުރުސަތުތައް ތަނަވަސްވެގެންދިޔުން ކަމަށް އޭނާ ވަނީ ވިދާޅުވެފައެވެ.
ހދ. އަތޮޅު ތައުލީމީ މަރުކަޒުގެ ޕްރިންސިޕަލް މުޙައްމަދު މަތީން ވަނީ ސަންޝައިން ކްލާހަށް ދިރާގުން ފޯރުކޮށްދިން އެހީތެރިކަމަށް
އެކުންފުންޏަށް ޝުކުރު އަދާކުރައްވާފައެވެ. އަދި ސަންޝައިން ކުލާހަށް ލިބުނު ވަސީލްތްތަކުގެ ސަބަބުން އިންކްލޫސިވް އެޑިއުކޭޝަން ފޯރުކޮށްދިނުމަށް ސްކޫލުން ކުރަމުންދާ މަސައްކަތަށް ބޮޑު ކުރިއެރުމެއް ލިބިގެންދާނެކަމަށް ޕްރިންސިޕަލް މަތީން ވަނީ ވިދާޅުވެފައެވެ.
ދިރާގުން ބުނީ އެކުންފުނިން އަބަދުވެސް މަސައްކަތް ކުރަނީ މުވާސަލާތީ ގުޅުމުގެ އިތުރުން މުޖުތަމައަށް ބޭނުންވާ ކަންކަމުގައި އެހީތެރިކަން ފޯރުކޮށްދިނުމަށް ކަމަށެވެ.
އެގޮތުން ދިރާގުން މިހާރުވެސް ދަނީ ކުޑަކުދިންނަށް އެހީތެރިވުމާއި މުޖުތަމަޢުގެ ޒުވާނުން ބާރުވެރިކުރުވުމުގެ ގިނަ މަސައްކަތްތަކެއް ކުރަމުން ކަމަށް އެ ކުންފިނުން ވަނީ ބުނެފައެވެ.