މޮބައިލް ފޯނު ނަންބަރު ބަދަލުނުކޮށް، ޚިދުމަތް ހޯދާ ނެޓްވޯކް ބަދަލުކުރެވޭ ޚިދުމަތެއް އަންނަ މަހު ފައްޓަވާނެ ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން ބުނެފި އެވެ.
އެ ހިދުމަތުގެ ސަބަބުން ދިރާގު ނަންބަރެއް ގެންގުޅޭ މީހަކު، އުރީދޫ ނެޓްވޯކަށް ބަދަލުވެވިދާނެ އެވެ. އަދި އުރީދޫ ފޯން ނަމްބަރެއް ބޭނުންކުރާ މީހަކު، ދިރާގަށް ވެސް ބަދަލުވެވިދާނެ އެވެ. އެ ހިދުމަތް ދޭނީ ރާއްޖޭގެ މުވާސަލާތީ ހިދުމަތްދޭ ދެ ކުންފުނި ކަމަށްވާ ދިރާގު އަދި އުރީދޫއާ ގުޅިގެންނެވެ.
"ނަންބާ ޕޯޓަބިލިޓީ" ނަމަކަށް ކިޔާ އެ ހިދުމަތާ ގުޅޭ ގޮތުން ކޮމިއުނިކޭޝަން އޮތޯރިޓީގެ ޗީފް އެގްޒެކެޓިވް އިލްޔާސް އަހުމަދު މިއަދު "ސަން" އަށް ވިދާޅުވީ، އެހިދުމަތް އަންނަ މަހުގެ ކުރީކޮޅުގައި ފައްޓަވާނެ ކަމަށެވެ. އަދި އެ ހިދުމަތާ ގުޅޭ ތަފްސީލު ވަރަށް އަވަހަށް އާންމު ކުރައްވާނެ ކަމަށް ވެސް އިލްޔާސް ވިދާޅުވި އެވެ.
"އަޅުގަނޑުމެން މިހާރު މި މަސައްކަތް ކުރަނީ މާޗް މަހުގެ ކުރީކޮޅު އެހިދުމަތް އާންމުކޮށްލެވޭތޯ. އޭގެ ތަފްސީލުތައް ވަރަށް އަވަހަށް އަޅުގަނޑުމެން ޝެއާ ކުރާނަން." އިލްޔާސް ވިދާޅުވި އެވެ.
އުރީދޫގެ ކަސްޓަމާއެއް ދިރާގުގެ ހިދުމަތް ބޭނުންވާ ކަމަށްވާ ނަމަ މިހާރުޖެހެނީ 7 ގެ ނަންބަރެއް ނަގާށެވެ. އަދި ދިރާގުގެ ކަސްޓަމަރެން އުރީދޫ އަށް ބަދަލުވާ ނަމަ ޖެހެނީ 9 އަކުން ފެށޭ ނަންބަރެއް ނަގާށެވެ. ނަމަވެސް އެ ހިދުމަތް ތައާރަފު ކުރުމުން އެމީހެއްގެ އަތުގައި އޮންނަ ނަންބަރަކުން ބޭނުން އޮޕަރޭޓަރެއްގެ ހިދުމަތް ހޯދޭނެ އެވެ. އެ ނަންބަރަކީ ވަކި އޮޕަރޭޓަރަކަށް ނިސްބަތްވާ އެއްޗަކަށް އޭރުން ނުވާނެ އެވެ.