މަގުބޫލު އުޒުރެއް ނެތި ނުރައްކާތެރި ހަތިޔާރު ގެންގުޅުމުގެ ދައުވާ އަށް ދެން އޮންނަ ޝަރީއަތުގެ މަޖިލީހެއްގައި ޖަވާބުދާރީވާން ހ. ހިލްޓަން، މުހައްމަދު އިންތިފް ރައޫފަށް އަންގައިފިއެވެ.
ފުރަތަމަ ޝަރީއަތުގެ މަޖިލީހެކޭ އެއްފަދައިން މިއަދު ބޭއްވި ޝަރީއަތުގެ މަޖިލީހުގައި ވެސް އިންތިފްގެ ގާނޫނީ ވަކީލު ވިދާޅުވީ ދައުވާ އަށް ޖަވާބުދާރީ ވެވޭނީ ދައުލަތުން ހުށަހެޅި ހުރިހާ ލިޔުންތައް ލިބުމުން ކަމަށެވެ.
ދައުލަތުގެ ވަކީލު ވިދާޅުވީ ދައުލަތުން ހުށަހަޅަނީ ޖުމްލަ 16 ހެކީން ކަމަށާއި އޭގެތެރެއިން ދެ ހެކީން ފިޔަވައި އެހެން ހުރިހާ ހެކީން ސިއްރުކުރަން އެދޭ ކަމަށެވެ.
ދައުލަތުން ސިއްރު ނުކުރާ ދެ ހެކީންގެ ބަޔާން ވަނީ އިންތީފަށް ދޫކޮށްފައެވެ. އެހެންކަމުން ގާޒީ ވަނީ އެ ދެ ލިޔުމުގެ މައްޗަށް ބިނާކޮށް ދެންއޮންނަ ޝަރީއަތުގެ މަޖިލީހެއްގައި ދައުވާ އަށް ޖަވވާބުދާރީވާން އިންތިފަށް އަންގާފައެވެ.
އިންތިފް ބުނީ އޭނާ ގެންގުޅުނީ ފިސްތޯލައެއް ނޫން ކަމަށާއި އެއީ މިނާފުލް ބަޑިއެއް ކަމަށެވެ. އަދި އޭނާއަކީ ކުޑަކުދިންގެ ހަވީރުތައް އިންތިޒާމްކޮށް އިވެންޓް ޕްލޭންކުރާ މީހެއް ކަމަށާއި އެކަން ސާބިތުކުރުމަށް ދެން އޮންނަ ޝަރީއަތުގެ މަޖިލީހަށް އެކަމާ ގުޅޭގޮތުން އޭނާ ތައްޔާރުކޮށްފައިވާ ޕްރޮޕޯސަލް ހުށަހަޅާނެ ކަމަށް އިންތިފް ބުންޏެވެ.
އިންތިފް ރައޫފްގެ މައްޗަށް އެ ދައުވާ އުފުލާފައި ވަނީ ބިރުދެއްކުމާއި ނުރައްކާތެރި ހަތިޔާރާއި ތޫނުއެއްޗިހި ގެންގުޅުން މަނާކުރުމުގެ ގާނޫނުގެ ތިން ވަނަ މާއްދާގެ (ހ)އާ ހަވާލާދީ އެ މާއްދާގެ (ނ) ގެ ދަށުންނެވެ.
ދައުލަތުގެ ވަކީލު ވިދާޅުވީ ފުލުހުންނަށް ލިބުނު މައުލޫމާތަކާ ގުޅިގެން މިދިޔަ އޮކްޓޯބަރު މަހުގެ 30 ވަނަ ދުވަހުގެ ރޭ ހިންގި ޚާއްސަ އޮޕަރޭޝަނެއްގައި މއ. ގޯލްޑަންބީމް ގެއަށް ފުލުހުންނާއި ސިފައިން ވަނުމުން އެގޭ ސިޑިކޮޅިން އިންތިފް ވައްޓާލި ނުރައްކާތެރި ހަތިޔާރަކީ އޭގެއިން ޝޫޓުކޮށްފިނަމަ މީހަކަށް ގެއްލުމެއް ލިބިދާނެ ފަދަ ހަތިޔާރެއްކަމަށް އެމްއެންޑީއެފްގެ އޯޑިނަންސް އިން ތައްޔާރުކުރި ރިޕޯޓުން އެނގެން އޮންނަ ކަމަށެވެ.