ބަންގުބަންދު ގޯލްޑްކަޕުގެ ގްރޫޕް "ބީ"ގެ އެއްވަނަ ޓީމުގެ ގޮތުގައި ރާއްޖޭގެ ޒުވާން ޓީމު ސެމީ ފައިނަލަށް ދަތުރުކުރުމުން، ނޭޕާލާ ދެކޮޅަށް ސެމީގައި ރާއްޖެ ކުޅެން ޖެހިއްޖެ އެވެ.
ގުރޫޕް ސްޓޭޖްގައި ރާއްޖެ ކުޅުނު ފަހު މެޗުގައި މިއަދު 1-1ގެ ނަތީޖާ އަކުން ބަޚްރޭން އާ އެއްވަރުވެ، ކުޅުނު ތިން މެޗުން ޖުމުލަ ހަތް ޕޮއިންޓް ލިބިގެން އެއްވަނައިގައި އޮތް އިރު ބަހްރޭން އޮތީ ކުޅުނު ތިން މެޗުން ފަސް ޕޮއިންޓް ލިބިގެން ދެވަނައިގައެވެ.
ބަނގުލަދޭޝްގެ ބަންގުބަންދު ނޭޝަނަލް ސްޓޭޑިއަމްގައި މިއަދު ކުޅުނު އެ މެޗުގައި ރާއްޖެ އިން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސް ކޮށްފައެވެ. ނަމަވެސް އެ ފުރުސަތުތަކުގެ ތެރެއިން ގޯލަކަށް ހަދާލެވުނީ މެޗުގެ 18 ވަނަ މިނެޓްގައި އަހްމަދު އިމާޒް(އާއްކޮ) ފޮނުވާލި ބޯޅަ އެކަންޏެވެ.
އާއްކޮ އެ ގޯލު ކާމިޔާބް ކުރީ ރާއްޖޭގެ ފޯވާޑް ލައިނުގައި ހިމެނޭ ތިން ކުޅުންތެރިންގެ އެހީ ތެރިކަމާއި އެކުގައެވެ. އެގޮތުން އިސްމާއިލް އީސަ ބަޚްރޭން ޕެނަލްޓީ އޭރިއާ ތެރޭގައި ހުރެ ފޮނުވާލި ހަމަލާ ކީޕަރުއަތުގަ ޖެހި އަަންސާރު އިބްރާހިމް (އަންކޮ) އަށް ލިބުނު ބޯޅަ އާއްކޮ އަށް ދިނުމުން އޭނާ ވަނީ ހަމަޖެހިލާފަ ގޯލުގެ ތެރެއަށް ބޯޅަ ފޮނުވާލާފައެވެ.
އެ މެޗުގައި ރާއްޖޭގެ ގޯލަށް މާގިނަ ހަމަލާތަކެއް އުފެއްދިފައި ނުވާއިރު ބަހްރޭނުން ނަތީޖާ އެއްވަރުކުރީ މެޗުގެ 58 ވަނަ މިނެޓުގައި އެޓީމުގެ އަންވަރު އަލީއެވެ. އޭނާ އެ ގޯލު ކާމިޔާބް ކުރީ އަބްދުލް އަޒީޒް، ރާއްޖޭ ޕެނަލްޓީ އޭރިޔާތެރެއަށް ނަގައިދިން ހުރަހަކުން ލިބުނު ބޯޅަ ބޮލުން ޖަހައި ކީޕަރު ފައިސަލްގެ ބޯމަތިން ގޯލުގެ ތެރެއަށް ބޯޅަ ފޮނުވާލައި ގެންނެވެ.
މެޗަށް ފަހު ވާހަކަ ދައްކަމުން ރާއްޖޭގެ ގައުމީ ޓީމުގެ ކޯޗް ރިކީ ހާބަޓް ބުނީ، މެޗުގައި ރާއްޖޭގެ ޓީމުގެ ފަރާތުން ފެނުނު ކުޅުމާއި ދޭތެރޭގައި ވަރަށް ބޮޑަށް ހިތް ހަމަޖެހޭ ކަމަށާއި ރާއްޖޭގެ ޓީމުގެ ފަރާތުން ފެނިގެންދިޔައީ އޭނާގެ ޕްލޭނާއި އެއްގޮތަށް ކުޅުނު މަންޒަރު ކަމަށެވެ.
ގައުމީ ޓީމްގެ ފީޒިޝަން އަހްމަދު ސަކީބް މިއަދު 'ސަން' އާ ވާހަކަ ދައްކަމުން ބުނީ ރާއްޖޭގެ ޓީމް ސެމީ ފައިނަލް މެޗަށް ނިކުންނައިރު އަނިޔާގެ އެއް ވެސް މައްސަލައެއް އަދި ނެތް ކަމަށާއި މިއަދުގެ މެޗުގައި ބައެއް ކުޅުންތެރިން ނޭރުވީ، ސެމީ ފައިނަލް މެޗަށް އެ ކުޅުންތެރިންނަށް ރެސްޓް ދިނުމުގެ ގޮތުން ކަމަށެވެ.
ސެމީ ފައިނަލް ދެވަނަ މެޗުގައި އަންނަ އަންގާރަ ދުވަހު ގައުމީ ޓީމް ނިކުންނާނީ ނޭޕާލާ ދެކޮޅަށެވެ. އަދި ސެމީ ފައިނަލް ފުރަތަމަ މެޗުގައި ހޯމަ ދުވަހު ބަހްރޭން އާއި ދެކޮޅަށް ނިކުންނާނީ ބަންގްލަދޭޝްގެ ސީނިއާ ޓީމެވެ.