ފްރާންސްގެ ވެރިކަން ކުރާ ސިޓީ ޕެރިހުގައި، ވަޅިއެއް ހިފައިގެން ހުރި މީހެއްގެ ގަޔަށް ފުލުހުން ބަޑި ޖަހައި، އޭނާ މަރާލައިފި އެވެ. ފްރާންސްގެ ފުލުހުން ބުނެފައިވަނީ، ޕެރިހުގެ އުތުރުގައި ހުންނަ ފުލުހުންގެ މަރުކަޒަށް އެ މީހާ ވަޅިއެއް ހިފައިގެން ވަންނަން މަސައްކަތް ކުރި ކަމަށެވެ.
ފްރާންސްގެ ފުލުހުން ލަފާ ކުރި ގޮތުގައި، އޭނާ މަސައްކަތް ކުރީ ވަޅިން ބަޔަކަށް ހަމަލާ ދޭށެވެ. އެހެންކަމުން އެންމެންގެ ސަލާމަތާއި ރައްކަލަށް ޓަކައި ފުލުހުން އޭނާގެ ގަޔަށް ބަޑި ޖަހައި، އޭނާ މަރައިލީ އެވެ.
މި ހާދިސާ ހިނގާފައިވަނީ، ފްރާންސްގައި ހިންގާ މެގަޒިން ޝާލީ އެބްދޯގެ އިދާރާއަށް ބަޔަކު ހަމަލާ ދިން ހާދިސާއަށް އެއް އަހަރު ފުރުނު ދުވަހު އެވެ.
ފްރާންސްގެ ޕްރޮސެކިއުޓަރުން ބުނެފައި ވަނީ، ޕެރިހުގައި ފުލުހުން ބަޑި ޖަހައި މަރައިލި މީހާ ހުރީ ފޭކު ބޮންތަކެއް ހަރުކޮށްފައިވާ އެކްސްޕްލޯސިވް ވެސްޓެއް ލައިގެންކަމަށެވެ. އަދި އެމީހާ ލައިގެން ހުރި އަންނައުނުގެ ތެރެއިން، އައިއެސް ޖަމާޢަތުގެ ދިދައާއި، ހަމަލާގެ ޒިންމާ ނަގާ ކަމުގެ، އަރަބިން ލިޔެފައިވާ ކަރުދާހެއް ވެސް ފެނިފައިވާ ކަމަށް ފްރާންސްގެ ޕަބްލިކް ޕްރޮސެކިއުޓަރުން ބުނެފައި ވެ އެވެ.
މިކަމާއި ގުޅިގެން ފްރާންސްގެ ދާޚިލީ ވަޒީރު ބަރނާޑް ކަޒަނޫވް ވިދާޅުވީ، ޓެރަރިޒަމްގެ ބިރުގެ ލެވެލް މަތީގައި އޮންނަ ޤައުމެއްގައި ފުލުހުންނާއި ސިފައިންނަކީ ޤައުމު ރައްކާތެރި ކުރާނެ ފަރާތް ކަމަށާއި، އެފަރާތްތަކަށް ޝުކުރު އަދާ ކުރާ ކަމަށެވެ.