ދިހަ އަހަރު ވަންދެން އަނބިމީހާއަށް ނިދާ ބޭސްދީ ޖިންސީ ގުޅުން ހިންގުމަށް ފަހު، އެހެން މީހުން ލައްވައި ވެސް އަނބިމީހާ ރޭޕްކުރުވި ފްރާންސް މީހަކާއި އިތުރު 49 މީހެއްގެ މައްޗަށް ކުށް ސާބިތުވެއްޖެއެވެ.
ރޭޕްގެ ޝިކާއަރަކަށްވި ޖިސެލް ޕެލިކޮޓްގެ ކުރީގެ ފިރިމީހާގެ ޑޮމިނިކް ޕެލިކޮޓްގެ މައްޗަށް ކުށް ސާބިތުވުމުން 20 އަހަރުގެ ހުކުމެއް އިއްވާފައިވާއިރު، ކުށް ސާބިތުވި އެހެން މީހުންނަށް އިއްވާފައި ވަނީ 3 އަހަރާއި 15 އަހަރާއި ދެމެދުގެ ހުކުމެކެވެ.
ކޯޓުން ހުކުމް އިއްވި މީހުންގެ ތެރެއިން އެކަކުގެ މައްޗަށް ވަނީ ޖިންސީ ގޯނާގެ ތުހުމަތު ކޮށްފައެވެ. އަދި އެކަކުގެ ހުކުމް ރޭޕް ކުރުމުން ޖިންސީ ގޯނާއަށް ކުޑަކުރިއިރު، ދެ މީހުންގެ ހުކުމް ވަނީ ސަސްޕެންޑްކޮށްފައެވެ.
އެ މައްސަލައިގެ ޝަރީއަތް ފެށީ ސެޕްޓެމްބަރު މަހުގެ ދެ ވަނަ ދުވަހުއެވެ. ޖިސެލް ވަނީ އެހެން މީހުން އޭނާއަށް ޖިންސީ ގޯނާކުރި މަންޒަރު ފެންނަ ގޮތަށް ކުރީގެ ފިރިމީހާ ޑޮމިނިކް ކުރި ވީޑިއޯ ހެކީގެ ގޮތުގައި ޝަރީއަތަށް ހުށަހެޅުމަށް އެދިފައެވެ.
ޝަރީއަތުގެ މަޖިލީހުގައި ޖިސެލް ދެއްކި ހިތްވަރަށް ގިނަ ބަޔަކު ވަނީ ތައުރީފުކޮށްފައެވެ. ފްރާންސާއި ދުނިޔޭގެ އެކި ކަންކޮޅުތަކުގައި ޖިންސީ އަނިޔާއާ ދެކޮޅަށް ކުރާ މަސައްކަތުގެ ރަމްޒަކަށް އޭނާ ވެގެން ގޮސްފައިވާ ކަމަށްވެސް މީޑިއާތަކުން ރިޕޯޓުކޮށްފައިވެއެވެ. ޖިސެލް ވަނީ މީޑިއާތަކުގައި އޭނާގެ ނަން ބޭނުންކޮށް ޝަރީއަތުގެ މަރުހަލާވެސް އާންމު ކުރުމަށް ބާރު އަޅާފައެވެ.
"މި ދަތި ދުވަސްވަރު އަޅުގަނޑަށް ތާއީދުކުރި ހުރިހާ ފަރާތްތަކަށް ހިތުގެ އަޑިން ޝުކުރު އަދާކުރަން. ތިޔަބޭފުޅުންގެ ހެކިބަހާއި، އަޅުގަނޑަށް ލިބުނު ބޮޑު ކާމިޔާބީއެއް." ބުރާސްފަތި ދުވަހު ކޯޓުގެ ބޭރުގައި ނޫސްވެރިންނާ ވާހަކަ ދައްކަމުން ޖިސެން ބުންޏެވެ.
ޖިސެލްއަށް ވީ ކިހިނެއް؟
ޖިސެލް ރޭޕްކުރިކަން ފަޅާއެރީ 2011 އާއި 2020 އާ ދެމެދު ޑޮމިނިކް ފުލުހުންގެ ބެލުމުގެ ދަށަށް ގެންދިއުމުންނެވެ. ފުލުހުންނަށް ވަނީ ރޭޕާއި ގުޅޭ އެތައް ފޮޓޯއަކާއި ވީޑިއޯއެއް ޑޮމިނިކްގެ ކޮމްޕިއުޓަރުން ފެނިފައެވެ. އެއާއެކު އެ ރޭޕާގުޅުން ހުރި އިތުރު މީހުންނާ ހަމައަށް ފުލުހުންނަށް ވާސިލުވެވުނެވެ.
ކޯޓުން ބުނި ގޮތުގައި ޑޮމިނިކް، ޖިސެލް ރޭޕް ކުރުމަށް މީހުން ހޯދާފައިވަނީ އޮންލައިންކޮށެވެ. ނިދާ ބޭހާއި، އެންޓި އެންޒައިޓީ ފަދަ ބޭސް ދިނުމަށް ފަހު ރޭޕްކުރުވައިފައިވާ ކަމަށް ދައުވާގައި ބުނެފައިވެއެވެ.
ޖިސެލް ރޭޕްކުރި ކަމުގެ ކުށް 49 މީހުންގެ މައްޗަށް ސާބިތުވި ނަމަވެސް، ކޯޓުގެ ލިޔެކިޔުންތަކުން ދައްކާ ގޮތުގައި އޭނާއަށް 72 ފިރިހެނުން ވަނީ ޖިންސީ ގޯނާކޮށްފައެވެ. ދައުވާކޮށްފައި ވަނީ އޭގެތެރެއިން ދެނެގަނެވުނު 50 މީހެއް މައްޗަށެވެ. އެ މީހުންގެ އުމުރަކީ 26 އަހަރާއި 74 އަހަރާ ދެމެދު ކަމަށް ވެސް ފުލުހުން ބުނެއެވެ.