ބަދު ދުއާކުރި ކަމަށް ބުނެ ހައްޔަރުކޮށްފައިވާ އެމްޑީޕީގެ ގައުމީ މަޖިލީހުގެ މެމްބަރު އަދި ރ. އިނގުރައިދޫ ދާއިރާގެ އެމްޑީޕީގެ ރައީސް ހަސަން އަހްމަދު (ހަސަންޓޭ) ގެ ބަންދަށް ކްރިމިނަލް ކޯޓުން މިއަދު 10 ދުވަސް އިތުރުކޮށްފި އެވެ.
އޭނާގެ ބަންދަށް 10 ދުވަސް އިތުރުކުރީ މިއަދު މެންދުރުފަހުގެ ވަގުތެއްގަ އެވެ.
ހަސަންޓޭ ހައްޔަރުކުރުމަށް އިއްޔެ ނެރުނު ކޯޓު އަމުރުގައި ވަނީ އޭނާގެ މައްޗަށް ކުރާ ތުހުމަތު ތަކަކީ ދިވެހިރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރުމާއި، މީހުންގެ މެދުގައި ދީނީގޮތުން ބައިބައިވުން އުފެދޭ ބާވަތްތަކުގެ ވާހަކަދެއްކުމާއި، އެފަދަ ގޮތްގޮތަށް އަމަލުކުރުމުގެ ތުހުމަތު ކަމަށެވެ.
އެ ކޯޓު އަމުރުގައި ވަނީ އިސްލާމީ މަރުކަޒުގެ ބޭރުގައި ވަކި ޖަމާއަތް ހަދައިގެން ދުއާނުކުރުމަށް އިސްލާމިކް މިނިސްޓްރީން އަންގާފައި ވަނިކޮށް ހަސަންޓޭ އިސްވެހުރެ މިމަހުގެ 20 ވަނަ ދުވަހު ހުކުރު ނަމަދަށްފަހު ވަކިން ޖަމާހަތް ހަދައިގެން ދުއާ ކުރި ކަމަށް ތުހުމަތު ކުރެވޭ ކަމަށެވެ.
ސިޔާސީ މަގުސަދެއް ހާސިލުކުރުމަށްޓަކައި ރައްޔިތުންގެ މެދުގައި ފިތުނަ އާއި ނަފްރަތު އުފެދޭގޮތަށް ހުކުރު ނަމާދަށްފަހު ވަކި ޖަމާއަތް ހަދައިގެން އިސްލާމީ މަރުކަޒުގެ ބޭރުގައި ދުއާނުކުރުމަށް އިސްލާމިކް މިނިސްޓްރީން އަންގާފައިވާ ކަމަށް ވެސް އެ ކޯޓު އަމުރުގައި ވެއެވެ.
އިސްލާމިކް މިނިސްޓްރީން ނެރުނު ބަޔާނެއްގައި ވަނީ އިސްލާމީ މަރުކަޒުގެ ބޭރުގައި ހުކުރު ނަމާދަށްފަހު ބަދު ދުއާކުރާ ކަމަށާއި އެއީ ދީނީގޮތުން ހުއްދަ ކަމެއް ނޫން ކަމަށެވެ. އެހެންކަމުން ބަދު ދުއާކުރާ މީހުންނާ މެދު ފިޔަވަޅު އަޅާނެ ކަމަށް އެ މިނިސްޓްރީން ބުންޏެވެ.