އަންނަ އަހަރަށް ލަފާކޮށް ރައްޔިތުންގެ މަޖިލީހަށް ދައުލަތުން ހުށަހަޅާފައިވާ 27.457 ބިލިއަން ރުފިޔާގެ ބަޖެޓު ދިރާސާކުރި ކޮމެޓީގެ ރިޕޯޓަށް ބަހުސްކުރަން ތިއްބެވި މެމްބަރުން ބަހުސްކޮށް ނިމެންދެން މަޖިލީހުގެ ޖަލްސާ ކުރިއަށް ގެންދަން ފާސްކޮށްފި އެވެ.
އެ ގޮތަށް ފާސްކުރީ 74 މެމްބަރުންގެ ވޯޓުން ނެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓު ކޮމެޓީން ފާސްކޮށް ނިންމީ މިދިޔަ ބުރާސްފަތި ދުވަހު އެވެ.
ބަޖެޓު ކޮމެޓީން ބަޖެޓުގެ މަސައްކަތް ދިރާސާކޮށް ނިންމި އިރު ޝަރުއީ ދާއިރާ އަށް ވަނީ 20 މިލިއަން ރުފިޔާ އިތުކޮށްފަ އެވެ. އެހެންނަމަވެސް ދައުލަތުން ބަޖެޓު ހުށަހެޅި އަދަދަކަށް ބަދަލެއް ގެނެސްފައެއް ނުވެ އެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ފިނޭންސް މިނިސްޓަރު އަބްދުﷲ ޖިހާދު ހުށަހެޅުއްވި 27.457 ބިލިއަން ރުފިޔާގެ ބަޖެޓު ކޮމެޓީން ފާސްކުރީ 14 މެމްބަރުންގެ ވޯޓުން ނެވެ.
ބަޖެޓަށް ވޯޓު ދިނީ ކޮމެޓީގައި ހިމެނިވަޑައިގަންނަވާ ސަރުކާރަށް ތާއީދު ކުރާ މެމްބަރުންގެ އިތުރުން ޖުމްހޫރީ ޕާޓީގެ މެމްބަރެކެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި ޕަބްލިސް ސެކްޓާ އިންވެސްޓުމަންޓް ޕްރޮގުރާމް (ޕީއެސްއައިޕީ)ގެ މަޝްރޫއުތަކަށް 9.1 ބިލިއަން ރުފިޔާ ވަނީ ހިމަނާފަ އެވެ.
ދެހާސް ސޯޅަ ވަނަ އަހަރުގެ ބަޖެޓަށް އިދިކޮޅު އެމްޑީޕީން މިއަދުގެ ޖަލްސާގައި ވަނީ 11 އިސްލާހެއް ވެސް ހުށަހަޅާފަ އެވެ.
ބަޖެޓުގައި ޕީއެސްއައިޕީގެ މަޝްރޫއުތަކަށް ހިމަނާފައިވާ 9.1 ބިލިއަން ރުފިޔާގެ ތެރެއިން އާއްމު ބަޖެޓުން ހޭދަ ކުރުމަށް ކަނޑައަޅާފައި ވަނީ 5.2 ބިލިއަން ރުފިޔާ އެވެ. އަދި ބޭރުގެ ލޯނު އެހީގެ ގޮތުގައި 2.7 ބިލިއަން ރުފިޔާއާއި ހިލޭ އެހީއާ ޓުރަސްޓު ފަންޑުގެ ގޮތުގައި 1.2 ބިލިއަން ރުފިޔާ ލިބޭނެ ކަމަށް ފިނޭންސް މިނިސްޓަރު އަބްދުﷲ ޖިހާދު ވިދާޅުވިއެވެ.
އަންނަ އަހަރުގެ ބަޖެޓުގައި ޕީއެސްއައިޕީން އެންމެ ބޮޑު ހޭދައެއް ކުރުމަށް ހިމަނާފައި ވަނީ ލަފާ ފުރުމުގެ ދަތިކަން ހައްލު ކުރުމާއި ވައިގެ ބަނދަރުތައް ތަރައްގީ ކުރުމުގެ މަޝްރޫއުތަކަށެވެ. އެކަމަށްޓަކައި އަންނަ އަހަރު 63 މަޝްރޫއުއެއް ކުރިއަށް ގެންދިއުމަށް ވަނީ ނިންމާފައެވެ. އެއީ 2.6 ބިލިއަން ރުފިޔާގެ މަޝްރޫއުތަކެކެވެ. އޭގެތެރެއިން 62 ރަށެއްގެ ބަނދަރު ހެދުމުގެ މަސައްކަތްތަކަށް 783 މިލިއަން ރުފިޔާ ހޭދަ ކުރާނެ އެވެ.
އަންނަ އަހަރުގެ ބަޖެޓުގައި ބިން ހިއްކުމާއި މަގު ހެދުމަށް 1.2 ބިލިއަން ރުފިޔާ ހޭދަކުރުމަށް ސަރުކާރުން ވަނީ ނިންމާފައެވެ. އެގޮތުން ނުވަ ރަށެއްގެ ބިން ބޮޑު ކުރުމުގެ މަސައްކަތް ކުރުމަށް ސަރުކާރުން ވަނީ ނިންމާފައެވެ. އަދި އަންނަ އަހަރުގެ ބަޖެޓުން ބިން ހިއްކުމުގެ 19 މަޝްރޫއުއެއް ކުރިއަށް ގެންދިއުމަށް ސަރުކާރުން ވަނީ ނިންމާފައެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅާފައިވާ 27.457 ބިލިއަން ރުފިޔާގެ ބަޖެޓުގެ ރިކަރަންޓު ހަރަދަކީ ބަޖެޓުގެ 59 ޕަސެންޓެވެ.