ގަލޮޅު ދަނޑުގައި ކުރިން ބޭނުންކުރަމުން އައި ސްކޯ ބޯޑްގެ ބަދަލުގައި ޒަމާނީ ލެޑް ސުޕަ ސްކްރީނެއް ބަހައްޓައިފި އެވެ.
މިނިވަން 50 އޮފީހުގެ ވެރިޔާ މާޒް އަހްމަދު ސަލީމް ސަންއާ ވާހަކަ ދައްކަމުން ވިދާޅުވީ، މިނިވަން 50ގެ ހަރަކާތްތަކަށް ކުރިން ދަނޑުގައި އިން ސްކޯ ބޯޑް ނަގާފައި އެ ބޭފުޅުން އެފްއޭއެމްއަށް ލެޑް ސްކްރީނެއް ދީފައިވާ ކަމަށާއި އަދި މިހާރު އެ ސްކްރީން ދަނޑުގައި ހަރުކޮށް މިއަދުގެ މެޗްގެ ސްކޯ އެ ސްކްރީންއިން ފެނިގެން ދާނެކަމަށެވެ.
"މިނިވަން 50ގެ ހަރަކާތް ތަކަށް އަޅުގަނޑުމެން ގެނައިން އޭގެ ހަތަރު ސްކްރީން. އަނެއް ދެ ސްކްރީން ދިނީ އެމްއެންޑީއެފްއާއި ޕީއެސްއެމް އަށް އަދި ދެން އިން ސްކްރީން ބޭނުންކުރަމުން ދާނީ ހޯމްމިނިސްޓްރީގެ ބޭނުންތަކަށް،" ސަލީމް ވިދާޅުވި އެވެ.
ސަލީމް އިތުރަށް ވިދާޅުވީ، އެ ސްކްރީނުން ފެންނާނީ ހަމައެކަނި މެޗްގެ ސްކޯ ކަމަށާއި ލައިވް ފީޑް ފެނިގެން ނުދާނެ ކަމަށެވެ. އެހެން ނަމަވެސް އެފްއޭއެމް އިން އެދިލައްވައިފި ނަމަ ލައިވް ފީޑް ފެންނަ ގޮތަށް ހެދުމުގެ މަސައްކަތް ވެސް އެ ބޭފުޅުން ކޮށްދޭނެ ކަމަށެވެ.
އެފްއޭއެމުން ބުނީ ސާފް ޗެމްޕިއަންޝިޕަށް 2008 ވަނަ އަހަރު ގަލޮޅު ދަނޑުގައި ބެހެއްޓި ސްކޯ ބޯޑް ދެން ބޭނުންކުރާނީ ޓާފް ދަނޑުގައި ކަމަށެވެ.