މިދިޔަ އަހަރު ސްޕެއިންގެ ރެއާލް ސޮސައިޑާޑުގެ ކޯޗްކަމާ ހަވާލުވި އިންގްލޭންޑް ކޯޗް ޑޭވިޑް މޮއިސް އެ މަގާމުން ވަކިކޮށްފި އެވެ.
ލީގްގައި އެންމެ ފަހުން ކުޅުނު ފަސް މެޗްގެ ތެރެއިން ހަތަރު މެޗުން ބަލިވެފައިވާ ސޮސައިޑާޑުގެ ކޯޗްކަމުން މޮޔެސް ވަކިކުރިއިރު ސޮސިއެޑާޑް އޮތީ ކުޅުނު 11 މެޗުން ނުވަ ޕޮއިންޓްލިބިގެން ލީގުގެ 16 ވަނައިގައެވެ. އޭނާއެކު އެސިސްޓެންޓް ކޯޗް ބިލީ މެކިންލޭ ވެސް ވަނީ މަގާމުން ވަކި ކޮށްފައެވެ.
އެވަޓަންގައި 11 އަހަރު ހޭދަކުރުމަށް ފަހު، ސަރ އެލެކްސް ފާގަސްން މެންޗަސްޓާ ޔުނައިޓެޑް ދޫކޮށްލުމުން އެ ޓީމްގެ ކޯޗްކަމާއި ހަވާލުވެ ޔުނައިޓެޑަށް ވެސް އެކަށިގެންވާ ކާމިޔާބީއެއް ހޯދައިނުދެވި ސަޕޯޓަރުންނާއި ފުޓްބޯޅައިގެ އެކި ފަރާތްތަކުގެ ފާޑުކިޔުންތައް އަމާޒްވެ މޮއިސްއަށް ޖެހުނީ އެ މަގާމުންވެސް ދުރުވާށެވެ.
މޮއިސްގެ ބަދަލުގައި ސޮސިއެޑާޑްގެ ކޯޗަކަށް ހަމަޖައްސާފައިވަނީ، ބާސެލޯނާގެ ކުރީގެ އެސިސްޓެންޓް ކޯޗު އުސޭބިއޯ ސަކްރިސްޓާންއެވެ. އޭނާގެ އިރުޝާދުގެ ދަށުން ސޮސިއެޑާޑް ކުޅޭ ފުރަތަމަ މެޗުގައި ބައްދަލުކުރާނީ، ސެވިއްޔާއާއެވެ.
މޮއިސް ދެން ފެނުން އެންމެ ގާތީ ޕްރިމިއާ ލީގްގެ އެސްޓަންވިލާ ނޫނީ ނިއުކާސަލް ޔުނައިޓެޑުގެ ކޯޗެއްގެ ގޮތުގައެވެ.