މިދިޔަ ބުރާސްފަތި ދުވަހު ސައުދީ އަރަބިއްޔާގެ މިނާގައި ހައްޖުވެރީންތަކެއް ފިތިބާރުވެގެން މަރުވި މީހުންގެ ތެރޭގައި ހިމެނޭ އިންޑިއާ ހައްޖުވެރީންގެ އަދަދު 45 އަށް އަރައިފި އެވެ.
ހައްޖުގެ އަޅުކަމުގެ ތެރޭގައި ވޭތުވެދިޔަ 25 އަހަރު ތެރޭގައި ސައުދީ އަރަބިއްޔާގައި ހިނގި އެންމެ ހިތާމަވެރި ހާދިސާގައި މަރުވި މީހުންގެ ޖުމުލަ އަދަދު 769 އަށް އަރާފައި ވާއިރު އެ ހާދިސާގައި ޒަޚަމްވި މީހުންގެ އަދަދު 934 އަށް އަރާ ކަމަށް ސައުދީ އިދާރާތަކުން ވަނީ ބުނެފައެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ސުޝްމާ ސުވަރާޖް ކުރައްވާފައިވާ ޓްވީޓެއްގައި ވިދާޅުވެފައި ވަނީ، ހައްޖުގެ އަޅުކަމުގެ ތެރޭގައި ފިތިބާރުވެގެން ހައްޖުވެރީންތަކެއް މަރުވި ހާދިސާގައި މަރުވި އިންޑިއާ މީހުންގެ އަދަދު މިހާރު 45 އަށް އަރާފައިވާ ކަމަށާއި ސައުދީގެ އެކިއެކި ހޮސްޕިޓާ ތަކުގައި އިންޑިއާގެ 50 ވަރަކަށް ހައްޖުވެރީން އެދުމަތިކޮށްފައިވާ ކަމަށެވެ.
The death toll of Indians killed in Haj stampede is now 45. We have 50 Indian pilgrims in various hospitals in Saudi Arabia.
— Sushma Swaraj (@SushmaSwaraj) September 28, 2015 މަރުވި މީހުންގެ ހަށިގަނޑުތައް ބަލައި ފާސްކުރަމުންދާއިރު އިއްޔެ ފެނުނު 13 ހަށިގަނޑަކާއެކު ކުރިން މައުލޫމާތު ލިބިފައި މަރުވި މީހުންގެ ތެރޭގައި ހިމެނެނީ އިންޑިއާގެ 35 ހައްޖުވެރީން ކަމަށެވެ.
ޖިއްދާގައި ހުން ހައްޖު ކޮންސިއުލޭޓުން މައުލޫމާތު ދޭ ގޮތުގައި މަރުވި މީހުންގެ ތެރެއިން މިއަދު ފެނިފައިވާ އިންޑިއާ މީހުންގެ ތެރޭގައި، ވެސްޓް ބެންގާލްގެ 3 ހައްޖުވެރިއަކާއި، ކެރެލާއާއި ޖަރުކަންދުން ކޮންމެ ސްޓޭޓަކުން 2 ހައްޖުވެރީންނާއި ޓެމިލްނާޑޫ އާއި މަހަރާޝްތުރަ މިއިން ކޮންމެ ސްޓޭޓަކުން ހައްޖުވެރިއަކު ހިމެނޭ ކަމަށެވެ.
މިނާ ހާދިސާގައި މަރުވި ހައްޖުވެރީންގެ ތެރޭގައި ޕާކިސްތާނުގެ 36 ހައްޖުވެރިއަކާއި ބަނގުލަދޭޝްގެ 18 ހައްޖުވެރިއަކު ވެސް ހިމެނެއެވެ.
މި ހާދިސާގައި މަރުވި މީހުންގެ ތެރެއިން މިހާތަނަށް ޔަގީންކުރެވިފައިވާ ފަރާތްތަކުގެ ތެރޭން އެންމެ ގިނައިން ހިމެނެނީ އީރާންގެ ހައްޖުވެރީންނެވެ. މަރުވި މީހުންގެ ތެރޭގައި އީރާނުގެ 169 ހައްޖުވެރިއަކު ހިމެނޭއިރު، ޒަޚަމްވި މީހުންގެ ތެރޭގައި އެގައުމުގެ 46 މީހަކު ހިމެނެ އެވެ. އަދި މިހާތަނަށް ވީނުވީއެއް ނޭނގި އީރާނުގެ 298 ހައްޖުވެރިއަކު ވާކަމަށް ރިޕޯޓުތައް ބުނެއެވެ.