ދުބާއީ އެއާޕޯޓުގެ މަސައްކަތުމީހުންނަށް މަތިންދާ ބޯޓެއްގެ ތެރެއިން އާދަޔާ ޚިލާފަށް ވިހަގަދަ ބާވަތެއްގެ ހަރުފައެއް ފެނިޖެއެވެ.
ޔޫއޭއީގެ ދުވަހު ނޫހެއްކަމަށްވާ "7ޑޭސް"އިން ބުނެފައިވާ ގޮތުން އެފްރިކާ ބައްރުން މިހާތަނަށް ފެނިފައިވާ އެންމެ ވިހަގަދަ ހަރުފަތަކުގެ ތެރޭގައި ހިމެނޭ "އެފްރިކަން ޕަފް އެޑާ" ކިޔާ ބާވަތުގެ ހަރުފަ ފެނިފައިވަނީ، އެ މަތިންދާބޯޓު އެއާޕޯޓުގައި ވަނިކޮށް ޕެސްޓް ކޮންޓްރޯލަރސް މުވައްޒަފުން އާދައިގެމަތިން ބޯޓުތައްބަލައި ފާސްކުރުމުގެ ތެރޭގައެވެ.
ސީނިއަރ ޕަބްލިކް ހެލްތު ޕެސްޓް ކޮންޓްރޯލް އޮފިސަރު ރޫބާ ޒައިދު ޠާހާ ވިދާޅުވިކަމަށް އެނޫހުން ބުނެފައިވަނީ "އެ ހަރުފަ ފެނިފައިވަނީ، ބޯޓުތެރޭގައި ހުރި މުދާތަކުގެ ތެރޭން. ނަސީބެއް އޭތި ފެނުނުކަން. އެއީ ވަރަށް ނުރައްކާތެރި ވިހަގަދަ ހަރުފައެއް. އަހަރެމެންނަށް އޭތި ނުފެނުނުނަމަ އޭގެ ސަބަބުން ކޮންމެވެސް މީހެއްގެ ފުރާނައަށް ނުރައްކާވުމީ ދުރުކަމެއް ނޫން،" ކަމަށެވެ.
ރިޕޯޓުތައް ބުނާގޮތުން އެފްރިކާ ބައްރުގައި ހަރުފަ ދަތްއެޅުމުގެ ސަބަބުން ހިނގާފައިހުރި މަރުގެ ހާދިސާތައް އެންމެ ގިނައިން ހިނގާފައި ވަނީ މިފަދަ ހަރުފަތަކުގެ ސަބަބުންނެވެ.
ޕަބްލިކް ޕާކްތަކާއި ހޯޓިކަލްޗަރ ޑިޕާޓްމަންޓް އޮފް ދުބާއީ މުނިސިޕަލްޓީގެ ޒޫމެނޭޖްމަންޓް ސްޕެޝަލިސްޓެއް ކަމަށްވާ ޑރ. ރެޒާ ޚާން ވިދާޅުވިގޮތުގައި އެ ހަރުފަ މީހެއްގެ ގައިގައި ދަތްއެޅިނަމަ އޭގެ ނުރައްކާތެރިކަން އިންތިހާއަށް ދިޔައިހެވެ.
"އެ ހަރުފަ މީހެއްގެ ގައިގައި ދަތްއެޅިނަމަ އެމީހަކު މަރުވާނެ. ސަބަބަކީ މި ސަރަހައްދުގައި އެފަދަ ހަރުފަ ދަތްއެޅުމުން ފަރުވާދޭނޭ އެންޓި-ވެނަމް ލިބެން ނެތުން،" ގަލްފުގެ ނޫހެއް ކަމަށްވާ ޔޫއޭއީ ޑެއިލީއަށް ޑރ. ރެޒާ ޚާން ވިދާޅުވިއެވެ.
ދިރާސާ ހޯދުންތަކުން ދައްކާގޮތުން މިބާވަތުގެ ނުރައްކާތެރި ވިހަގަދަ ހަރުފައެއް ދުބާއީ ބަނދަރެއްގެ ޝިޕްމަންޓަކުން ފެނުނު މިއީ ފުރަތަމަ ފަހަރެވެ.
ދުބާއީ އެއާޕޯޓުގައި އޮތް މަތިންދާބޯޓެއްގެ ތެރޭން ފެނުނު ބާވަތުގެ ހަރުފައަކީ 40 ސެންޓިމީޓަރާއި 80 ސެންޓީމީޓަރާ ދެމެދުގެ ސައިޒަކަށް ބޮޑުވާ އަދި ހަށިގަނޑު ފަލަކޮށް އޮންނަ ހަރުފައެކެވެ. އަދި ހަމަ އެހެންމެ ތަޖުރިބާކާރުން ބުނާގޮތުގައި މިބާވަތުގެ ހަރުފައަކީ އޭގެ ޝިކާރައަށް ހަމަލާދޭއިރު ވަރަށް ހަލުއިކަމާއެކު ހަރަކާތްތެރިވާ ހަރުފައެކެވެ.
މި ހަރުފަ ފެނިފައިވަނީ، ދުބާއީ އެއާޕޯޓަށް ކާގޯޝިޕްމަންޓްތަކާއެކު އެތެރެވާ އެކިބާވަތުގެ ދިރޭ ތަކެތި ހޯދައި އެތަކެތި ނައްތާލުމުގެ މަސައްކަތްކުރާ ޕެސްޓްކޮންޓްރޯލް ޑިޕާޓްމަންޓުން އާންމުކޮށް ކުރިއަށްގެންދާ ރޫޓީން އިންސްޕެކްޝަންގައެވެ. -- އަލްއަރަބިއްޔާ