އޮސްޓްރޭލިއާގެ ބްރިސްބޭނުން ފުރައިގެން ހޮންކޮންގަށް ދަތުރުކުރި ކެތޭ ޕެސިފިކްގެ ފްލައިޓަކަށް ޓާބިއުލެންސެއްގެ ސަބަބުން, ކުއްލި ގޮތަކަށް ވަރަށް ބޮޑަށް ލޮޅުން އަރައި، 10 މީހަކަށް އަނިޔާވެއްޖެއެވެ.
މިދިޔަ ހޮނިހިރު ދުވަހު ހިނގި މި ހާދިސާ ކުރިމަތިވީ، އެއާބަސް އޭ350-900 މަރުކާގެ ފްލައިޓް ސީއެކްސް156 ހޮންކޮންގަށް ޖައްސަން ގާތްގަނޑަކަށް ދެ ގަޑިއިރަށް ވެފައި ވަނިކޮށެވެ.
ކެތޭ ޕެސިފިކުން ހާމަކޮށްފައިވާ ގޮތުގައި، ފްލައިޓް ހޮންކޮންގަށް ޖެއްސުމާއެކު މެޑިކަލް ޓީމުތަކުން ވަނީ ފްލައިޓަށް އަރައި އަނިޔާވި މީހުންނަށް ފަރުވާދޭން ފަށާފައެވެ. މި ހާދިސާގައި އަނިޔާވި މީހުންގެ ތެރޭގައި ކެބިން ކްރޫންގެ ހަ މީހުންނާއި ހަތަރު ފަސިންޖަރުން ހިމެނެއެވެ.
މީގެ ތެރެއިން އަށް މީހަކު އިތުރު ފަރުވާއަށް ހޮންކޮންގުގެ ނޯތު ލަންޓާއު ހޮސްޕިޓަލަށް ގެންދިޔައިރު، އަނެއް ދެ މީހުންނަށް ފަރުވާދީފައިވަނީ އެއާޕޯޓުގައެވެ.
ސޯޝަލް މީޑިއާގައި އާންމުވެފައިވާ ފޮޓޯތަކާއި ވީޑިއޯތަކުން ފެންނަ ގޮތުގައި، ފްލައިޓުގެ ތެރެއަށް ވަނީ ކާބޯތަކެއްޗާއި އެހެނިހެން ސާމާނުތައް ބުރައިގެން ގޮސްފައެވެ. އަދި އަނިޔާވި އެއް ކްރޫއެއްގެ ކަރުގައި ބްރޭސްއެއް އަޅުވައިގެން ސްޓްރެޗަރެއްގައި ގެންދާ މަންޒަރުވެސް ފެނިފައިވެއެވެ.
މި ފްލައިޓުން ދަތުރުކުރި އޮސްޓްރޭލިއާގެ ކެއާންސްގެ ވިޔަފާރިވެރިއެއް ކަމަށްވާ ނިކޮލަސް ސްޓީވެންސަން ބުނި ގޮތުގައި، ފްލައިޓް ކުއްލިއަކަށް ތިރިއަށް ވެއްޓުނު ކަމުގެ އިހުސާސް ކުރެވުނެވެ. އޭނާ ސިފަކުރި ގޮތުގައި އެ ވަގުތު މީހުންގެ ފޯނުތަކާއި، ކޮފީ ތަށިތަކުގެ އިތުރުން ކާބޯތަކެތި މުޅި ފްލައިޓު ތެރެއަށް ބުރައިގެން ދިޔައެވެ. އަދި ބިރުން ގޮސް މީހުން ހަޅޭއްލަވަމުން ދިޔަ ކަމަށާއި، ގިނަ ބަޔަކު ތިބީ ވަރަށް ބޮޑަށް ހާސްވެފައި ކަމަށްވެސް އޭނާ ކިޔައިދިނެވެ.
ސްޓީވެންސަން އިތުރަށް ބުނި ގޮތުގައި، އޭނާގެ މައިންބަފައިންނަކީ ވައިގެ އަސްކަރިއްޔާގައި މަސައްކަތްކޮށްފައިވާ ބަޔަކަށް ވުމުން، މިފަދަ ހާލަތެއްގައި ސީޓްބެލްޓް އަޅައިގެން އިނުން ފިޔަވައި އިތުރު ކަމެއް ނުކުރެވޭނެކަން އޭނާއަށް އެނގެއެވެ.
މި ހާދިސާ ހިނގީ ފަސިންޖަރުންނަށް ހެނދުނުގެ ނާސްތާ ދިނުމުގެ މަސައްކަތް ކްރޫން ފަށާފައި ވަނިކޮށެވެ. ސްޓީވެންސަން ފާހަގަކުރި ގޮތުގައި، ލޮޅުން އެރިއިރު ސީޓްބެލްޓް އެޅުމަށް އަންގައިދޭ ނިޝާން ދިއްލާފައެއް ނުވެއެވެ. އަދި ކުޑަ ވަގުތުކޮޅެއްގެ ތެރޭގައި ދެ ފަހަރެއްގެ މަތިން ފްލައިޓް ކުއްލިއަކަށް ތިރިއަށް ދިޔަ ކަމަށް އޭނާ ބުންޏެވެ.
ފުރަތަމަ ލޮޅުމާއެކު މީހުންނަށް ސިހުން ލިބުނުއިރު، އޭގެ 15 ނުވަތަ 20 ސިކުންތު ފަހުން އަނެއްކާވެސް ބޮޑު ލޮޅުމެއް އެރި ކަމަށް އޭނާ ކިޔައިދިނެވެ. މިކަމުގެ ސަބަބުން، ސީޓްބެލްޓް ނާޅައި ތިބި މީހުން ފްލައިޓުގެ މަތީގައި ޖެހުނު ކަމަށްވެސް އޭނާ ބުންޏެވެ.
މި ހާދިސާގައި އެންމެ ބޮޑަށް އަނިޔާވީ ކެބިން ކްރޫންނަށެވެ. ސަބަބަކީ އެ މީހުން ކާބޯތަކެތި އަޅާފައި ހުރި ބަރު ޓްރޮލީތަކާއެކު ކޮޅަށް ތިބުމެވެ. ލޮޅުން އެރި ވަގުތު ކްރޫން ވިއްސައިގެން ދިޔުމުގެ އިތުރުން، ޓްރޮލީތައް ގޮސް އެ މީހުންގެ ގައިގައި ޖެހުނު ކަމަށް މަންޒަރު ދުށް މީހުން ބުނެފައިވެއެވެ. ފްލައިޓުގައި ތިބި ހަތަރު ޑޮކްޓަރަކު ވަނީ އަނިޔާވި މީހުންނަށް ފުރަތަމަ އެހީ ފޯރުކޮށްދީފައެވެ. އަދި ފްލައިޓް ޖެއްސުމަށްފަހު، އަނިޔާވި މީހުންނަށް އިސްކަންދީގެން ފްލައިޓުން ބޭލުމުގެ ކަންކަން ވަނީ ކުރިއަށް ގެންގޮސްފައެވެ.
ފްލައިޓުގެ ޕައިލެޓް ފަހުން ފަސިންޖަރުންގެ ކިބައިން މާފަށް އެދި ބުނި ގޮތުގައި، މި ލޮޅުން އެރީ ކުއްލިއަކަށް ދިމާވި މޫސުމީ ބަދަލެއްގެ ސަބަބުންނެވެ. އަދި އަނދިރިކަމުން ރާޑަރަށް އެކަން ފާހަގަކުރެވުނީ އެންމެ ފަހު ވަގުތު ކަމަށް ޕައިލެޓް ބުނެފައިވެއެވެ.
އޭވިއޭޝަން ދާއިރާގެ ތަޖުރިބާކާރެއް ކަމަށްވާ ސީކިއު ޔުނިވާސިޓީގެ އެސޯސިއޭޓް ޕްރޮފެސަރު ސްޓީވަން ލީބް ވިދާޅުވި ގޮތުގައި، އޮސްޓްރޭލިއާއާއި ދެކުނުއިރުމަތީ އޭޝިއާއާ ދެމެދު އޮންނަ ސަރަޙައްދަކީ މޫސުމީ ނިޒާމުތައް ބައްދަލުވާ ސަރަޙައްދަކަށް ވުމުން، އެއީ ގިނައިން ފްލައިޓުތަކަށް ލޮޅުން އަރާ ސަރަޙައްދެކެވެ. އޭނާ ފާހަގަކުރެއްވި ގޮތުގައި، ބައެއް ފަހަރު އެއްވެސް އިންޒާރަކާ ނުލައި ކުއްލިއަކަށް ލޮޅުން އެރުމަކީ އެކަށީގެންވާ ކަމެކެވެ. މީގެ އިތުރުން، ސާފު ޖައްވުގައިވެސް ކުއްލިއަކަށް ލޮޅުން އެރުމަކީ (ކްލިއާ-އެއާ ޓާބިއުލެންސް) ދިމާވާ ކަމެއް ކަމަށް އޭނާ ވިދާޅުވިއެވެ.
މިފަދަ ހާލަތްތަކަށް ރައްކާތެރިވުމުގެ ގޮތުން، ސީޓްބެލްޓް އަޅަން އަންގާ ނިޝާން ނިވިފައި ހުރި ނަމަވެސް، ގޮނޑީގައި އިންނަ ވަގުތުތަކުގައި އަބަދުވެސް ސީޓްބެލްޓް އަޅައިގެން ތިބުމަށް ޕްރޮފެސަރު ލީބް އިރުޝާދު ދެއްވިއެވެ. އޭނާ ވިދާޅުވި ގޮތުގައި ފްލައިޓުތައް ފަރުމާކޮށްފައި ހުންނަނީ ވަރަށް ބޮޑެތި ލޮޅުންތަކަށްވެސް ކެތްކުރެވޭ ގޮތަށެވެ. އެހެންކަމުން ފަސިންޖަރުންނަށް ބިރުވެރި އިހުސާސެއް ކުރެވުނު ނަމަވެސް، ފްލައިޓަށް އޭގެ ސަބަބުން ލިބޭ ގެއްލުން ކުޑަވާނެއެވެ.
މިފަދަ ހާދިސާތައް ފަހަކަށް އައިސް އިތުރުވަމުންދާކަން އޭވިއޭޝަން ދާއިރާގެ ތަޖުރިބާކާރުން ފާހަގަކުރެއެވެ. ދުނިޔޭގެ ހޫނުމިން މައްޗަށް ދިޔުމާއި މޫސުމަށް އަންނަ ބަދަލުތަކުގެ ސަބަބުން، ވައިގެ ތެރޭގައި އުފެދޭ ލޮޅުންތައް ނުވަތަ ޓާބިއުލެންސް އިތުރުވަމުންދާ ކަމަށް ދިރާސާތަކުން ދައްކައެވެ. ޚާއްޞަކޮށް، ރާޑަރަށް ނުފެންނަ ސާފު ޖައްވުގައި އުފެދޭ ލޮޅުންތައް ގިނަވަމުންދާކަން ސައިންސްވެރިން ވަނީ ފާހަގަކޮށްފައެވެ.
މީގެ ކުރިން، 2024 ވަނަ އަހަރުގެ މެއި މަހު ސިންގަޕޯ އެއާލައިންސްގެ ފްލައިޓަކަށްވެސް މިފަދަ ބޮޑު ލޮޅުމެއް އަރައި، އެކަކު މަރުވެ 70 އަށްވުރެ ގިނަ މީހުންނަށް އަނިޔާވެފައިވެއެވެ. އެ ހާދިސާއަށްފަހު، ގިނަ އެއާލައިންތަކުން ވަނީ ފްލައިޓުތަކުގައި ކާބޯތަކެތި ސާވްކުރާ ގަވާއިދުތަކަށް ބަދަލުތަކެއް ގެނެސްފައެވެ.
މި ހާދިސާއާ ގުޅިގެން ކެތޭ ޕެސިފިކުން ބުނެފައިވަނީ ކަމާބެހޭ ފަރާތްތަކަށް ފުރިހަމައަށް އެއްބާރުލުން ދެމުންދާ ކަމަށެވެ. އަދި ހޮންކޮންގުގެ އެއާ އެކްސިޑެންޓް އިންވެސްޓިގޭޝަން އޮތޯރިޓީން މިހާރު ދަނީ ފްލައިޓުގެ ޑޭޓާއާއި ކޮކްޕިޓްގެ މަޢުލޫމާތުތައް ބޭނުންކޮށްގެން މި ހާދިސާ އިތުރަށް ތަޙުޤީޤުކުރަމުންނެވެ.