މޯލްޑިވްސް ފޮޓޯގްރާފާސް އެސޯސިއޭޝަން (އެމްޕީއޭ) އާއި އެމްއެމްއެމްޕީއާރުސީ ގުޅިގެން ބާއްވާ ފޮޓޯނެގުމުގެ މުބާރާތުން އެއްވަނަ އަށް އަންނަ ފޮޓޯގްރާފަރެއްގެ ފޮޓޯތައް އައިޓީބީ ފެއާގައި ދައްކާނެ ކަމަށް އެމްޕީއޭ އިން ބުނެފި އެވެ.
ޖަރުމަނުގެ ބާލިންގައި ބާއްވާ އައިޓީބީ ފެއާ އަކީ ފަތުރުވެރިކަމުގެ ދާއިރާ އިން ދުނިޔޭގައި ބާއްވާ އެއްމެ ބޮޑު ފެއާ އެވެ. ދުނިޔޭގެ ގާތްގަނޑަކަށް 195 ގައުމުގެ ތެރެއިން 187 ގައުމަކުން މިދިޔަ އަހަރު އެ ފެއާގައި ބައިވެރިވެ އެވެ. އަދި 114000 އަށް ވުރެ ގިނަ މީހުން ވަނީ ފާއިތުވި އަހަރު އެ ފެއާ އަށް ޒިޔާރަތްކޮށްފަ އެވެ.
ހޮޓެލް ޖެންގައި ރޭ އޮތް ރަސްމިއްޔާތުގައި 'ސަނީ ސައިޑް އިން ފްރޭމްސް' މުބާރާތް ރަސްމީކޮށް އިފްތިތާހުކޮށްދެއްވީ އެމްއެމްޕީއާރުސީގެ މެނޭޖިން ޑިރެކްޓާ އަބްދުﷲ ޒިޔަތެވެ.
އެ ރަސްމިއްޔާތުގައި ވާހަކަ ދައްކަވަމުން ޒިޔަތު ވިދާޅުވީ ދުނިޔޭގެ އެހެންގައުމުތަކުގައި ތިބި ފަދަ ހުނަރުވެރިން ރާއްޖޭގައި ވެސް އެބަތިބި ކަމަށާއި އެ މީހުންނަށް ނުލިބެނީ އެ ހުނަރު ދައްކާލުމުގެ ފުުރުސަތު ކަމަށެވެ. އެފަދަ ފުރުސަތުތައް ތަނަވަސްކުރުމަށް އެމްއެމްޕީއާރުސީން މަސައްކަތްކުރައްވާނެ ކަަމަށް ޒިޔަތު ވިދާޅިުވި އެވެ.
"މި މުބާރަތަކީ ފޮޓޯގްރަފީގެ ދާއިރާ އިން ރާއްޖޭގައި ބާއްވާ އެއްމެ ބޮޑު މުބާރާތަށް ހެދުމަށް ޓަކައި ބޭނުންވާ އެހީތެރިކަން އެމްޕީއޭ އަށް ދޭނެ ކަމުގެ ފުރިހަމަ ޔަގީންކަން ދެން." ޒިޔަތު ވިދާޅުވި އެވެ.
މުބާރާތުގައި ހުރިހާ ފޮޓޯގްރަފަރުންނަށް ބައިވެރިވެވޭ
ފޮޓޯ ނެގުމުގެ މުބާރާތުގައި ރާއްޖޭގެ ހުރިހާ ފޮޓޯގްރާފަރުންނަށް ބައިވެރިވެެވޭނެ ކަމަށް އެމްޕީއޭ އިން ބުނެ އެވެ. މުބާރާތަށް ފޮޓޯ ހުށަހެޅޭނެ ތީމްތަކުގެ ތެރޭގައި ކަނޑުއަޑީގެ މަންޒަރުތަކާއި ސަގާފަތާއި ވެޑިން އަދި ފެޝަން ހިމެނެ އެވެ. މުބާރާތުގެ ފަނޑިޔާރުކަން ކޮށްދޭނީ ބޭރުގެ ތަޖުރިބާކާރުން ކަމަށް އެމްޕީއޭ އިން ބުނެ އެވެ.
މުބާރާތުން އެއް ވަނަ ދާ ފަރާތަކަށް 'ފޮޓޯ ގްރާފާ އޮފް ދަ އިޔާ'ގެ ލަގަބު ލިބޭނެ އެވެ.
އައިޓީބީ ބާލިން ފެއާގައި ފޮޓޯ ދެއްކުން
އެ މުބާރާތުން އެއްވަނަ އަންނަ ފޮޓޯގްރާފަރާއި ކޮންމެ ތީމަކުން އެއް ވަނަ އަށް އަންނަ ފޮޓޯގްރާފަރެއްގެ ފޮޓޯތައް ބާލިން ފެއާގައި ދައްކާނެ ކަަމަށް ވެސް އެމްޕީއޭ އިން ބުނެ އެވެ. އަދި އެ ފޮޓޯގްރާފަރުންނަށް އެމްއެމްޕީއާރުސީގެ ޚަރަދުގައި އެ ފެއާއަށް ދިއުމުގެ ފުރުސަތު ވެސް އޮންނާނެ ކަމަށް އެމްޕީއޭ އިން ބުނެ އެވެ.
އަދި އެއްމެ ރީތި ފޮޓޯތައް ރާއްޖެ ޕްރޮމޯޓް ކުރުމަށް ހިންގާ ތަފާތު ހަރަކާތްތަކުގައި ބޭނުންކުރެވޭނެ ކަަމަށް ވެސް އެމްޕީއޭ އިން ބުނެ އެވެ. އެ ގޮތުން އެއްމެ ފާހަގަކޮށްލެވޭ ފޮޓޯތައް ހިމަނައިގެން ފޮޓޯ ފޮތެއް ހެދުމަށް ފަހު ރިޒޯޓްތަކަށާއި ޓުއާ އޮޕަރޭޓަރުންނަށް ފޮނުވާނެ ކަަމަށް އެ އެސޯސިއޭޝަނުން ބުނެ އެވެ. އެ ފޮތުގައި ފޮޓޯގްރާފަރުންގެ މައުލޫމާތު ވެސް ހިމެނޭނެ އެވެ.
މުބާރާތުން ފާހަގަކޮށްލެވޭ ފޮޓޯތައް އަންނަ ނޮވެމްބަރު މަހު އާޓްގެލަރީގައި ދައްކާނެއެވެ. މުބާރާތަށް ފޮޓީ ހުށަހެޅުމާއި ބެހޭ ތަފްސީލް އަދި އެމްޕީއޭ އިން އާއްމުނުކުރެ އެވެ.