ސޯޝަލް މީޑިއާގައި އެންމެ ގިނައިން ދައުރުވާ އެކަށްޗަކަށް ދިވެހި ފޮޓޯގްރާފަރުންގެ ޕޭޖްތައް ވާނެ އެވެ. ތަފާތު ހުނަރުތަކާ އެކު ފޮޓޯ ނަގާ އެތައް ދިވެއްސެއް އުޅެ އެވެ. އެއީ އެތައް ޒުވާނުންގެ އުންމީދާ ގުޅިފައިވާ ބޮޑު އާމްދަނީއެއް ލިބޭ ދާއިރާއެކެވެ. ނަމަވެސް ކުރިމަތިވެފައިވާ ގޮންޖެހުމަކީ ބިދޭސީން މި ދާއިރާއަށް އަތްގަދަކޮށްފައި ވުމެވެ. މިލިއަން ރުފިޔާގެ ވިޔަފާރީގެ ނަފާ އަދިވެސް ނަގަނީ ހަމަ ބިދޭސީންނެވެ.
މިދިޔަ އަހަރު ކުރީކޮޅުގައި ސަރުކާރުން ވަނީ ފޮޓޯގްރަފީ ދާއިރާއަކީ މެދުފަންތީގެ ވިޔަފާރިއެއްގެ ގޮތަށް ހަމަޖައްސައިފަ އެވެ. އެއާއެކު ފޮޓޯ ނެގުމާއި އެ ވިޔަފާރިން ނަފާ ހޯދުމުގެ ހުއްދަ ލިބިގެންދާނީ ހަމައެކަނި ދިވެހިންނަށެވެ. ނަމަވެސް ކަން ވަނީ މުޅިން އެހެނަކުން ނޫނެވެ.
"ސޯޝަލް މީޑިއާ ތުރޫކޮށް ރިކުއެސްޓް އާދޭ. އެކަމަކު ރިސޯޓާ ކޮންޓެކްޓްކުރީމަ ބުނަނީ އެތާނގައި ބޭސްވެފައި އެބަހުރެޔޭ ފޮޓޯގްރާފަރެއް. އަޅުގަނޑު އޭތި އެސިއުމް މިކުރަނީ އެއީ ބިދޭސީ ފޮޓޯގްރާފަރެއްކަމަށް،" ޒުވާން ފޮޓޯގްރާފަރެއް ކަމުގައިވާ ހާޝިމް ދާއޫދު ބުންޏެވެ.
އެ ދާއިރާ ދިވެހިންނަށް ހާއްސަކޮށް، ބިދޭސީން ފޮނުވާލަން ނިންމުމުން ދެން އެ ބިދޭސީން އިހުތިޔާރުކުރީ އެހެން މަގެކެވެ. އެއީ ދިވެހިން ބޭރަށް ދަށްކުވައި ބިދޭސީން އެތެރޭގައި ތިބެގެން ހުރިހާ ނަފައެއް ނެގުމެވެ. ދުނިޔޭގެ ނުވަ ގައުމެއްގައި ހިންގާ ބޭރު ކުންފުންޏަކުން މިހާރު ވެސް ދަނީ ރާއްޖޭގެ އެތައް ރިސޯޓެއްގައި ފޮޓޯ ނަގައި 15000 ޑޮލަރު އާންމުކޮށް ދުވާލަކު ހޯދަ މުންމެވެ. ފޮޓޯ ނަގަން ގެންގުޅޭ ދިވެހި ކުއްޖަކަށް ދެނީ މަހަކު 500 ޑޮލަރުގެ މުސާރައެކެވެ. ހުރިހާ ނަފައެއް ބޭރު މީހުނަށެވެ.
"މޮހަނަށް އޮޑިދިންހެން ފޮޓޯގްރާފަރުންނަށް މިކަންމިއޮތީ ދެވިފައި. ބިދޭސީން އަދި ވެސް ބޮޑުކޮށް ކުރަމުން އަންނަނީ،" ފޮޓޯ ކައުންސިލްގެ ރައީސް މުހައްމަދު ޝާފީ ވިދާޅުވި އެވެ.
ރާއްޖޭގައި ފޮޓޯ ނަގައިގެން އާމްދަނީ ހޯދުމަކީ ދިވެހީންނަށް ހާއްސަ ދާއިރާއެއް ނަމަވެސް ތަފާސް ހިސާބުތަކަށް ބަލާއިރު ބޭރުގެ ފަރާތަކުން ރާއްޖޭގައި ފޮޓޯ ނަގައިގެން މި އަހަރު ފުރަތަމަ ހަ މަސް ދުވަހުގެ ތެރޭގައި 11 މިލިއަން ރުފިޔާ ވަނީ ހޯދައިފަ އެވެ. އަހަރެއްގެ މައްޗަށް ބިދޭސީން 36 މިލިއަނެއްހާ ރުފިޔާ ފޮޓޯ ނަގައިގެން ހޯދާކަމަށް ބެލެވެ އެވެ. މިއީ ދިވެހީންގެ ހައްގެވެ. މިކަން ކުރަނީ ބައެއް ދިވެހީންނަށް ފައިސާދީގެން ކޮރަޕްޝަނެއްގެ ތެރޭންނެވެ.
ސަރުކާރުން އެޅި ފިޔަވަޅުން ބާގަނޑެއް ބިދޭސީން އެ ވަނީ ހޯދައިފަ އެވެ. މާކެޓު ކުރާ މީހުންކަމަށް ބުނެ ނުވަތަ ކޮންމެވެސް އެހެން ވަޒީފާއެއްކަމަށް ބުނެ ރާއްޖެ އައިސް ފޮޓޯނެގުމުގެ ދާއިރާގެ ނަފާހޯދަން ފަށައިފި އެވެ. ނަމަވެސް ސަރުކާރުން ބުނަނީ އެކަން އެގޮތަށް ނުކުރެވޭނެ ކަމަށެވެ.
"ވިޔަފާރި އުސޫލުން ދިވެހި ރާއްޖޭގައި ގާއިމްވެގެން ފޮޓޯގްރާފަރުންގެ ގޮތުގައި ފޮޓޯގްރަފީއާއި ގުޅުން ހުރި އެއްވެސް މަސައްކަތެއް ވެސް ނުކުރެވޭނެ ބޭރުގެ ފަރާތްތަކަކަށް،" ރަޖިސްޓާ އޮފް ކޮމްޕެނީ މަރިޔަމް ވިސާމް ވިދާޅުވި އެވެ.
އިކޮނޮމިކް މިނިސްޓްރީން ބުނަނީ ތަފާތު ޝަކުވާތައް ލިބެމުން އަންނަ ކަމަށާއި އެކަން ހުއްޓުވުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. ވިސާމް ވިދާޅުވީ ކުރިން އެގޮތަށް ހަރަކާތްތެރިވި ކުންފުނިތަކަށް ދީފައިވާ ހުއްދަތައް ބާތިލް ކުރަމުން އަންނަ ކަމަށެވެ.
މިލިއަނުން ނަފާ ލިބޭ އެ ދާއިރާއިން ދިވެހިން މިވަނީ އަދިވެސް ބާކީވެފަ އެވެ. ދިވެހީންގެ ކިބައިގައި އެހުނަރު ކުޑައީއެއް ނޫނެވެ. ދިވެހި ފޮޓޯގްރާފަރުން ބުނަމުންދަނީ ދިވެހި ފޮޓޯގްރާފަރުންގެ ފެންވަރު މާ ރަނގަޅު ކަމަށެވެ. އެފަރާތްތަކުން ތުހުމަތު ކުރާ ގޮތުގައި ދިވެހީންނަށް ފުރުސަތު ނުދީ ބިދޭސީންނަށް ފުރުސަތު ދެނީ ބިދޭސީން "ކަޓު" ދޭތީ އެވެ.