ލަންޑަން (23 އޯގަސްޓް) – ޕާކިސްތާނުގައި އަންހެން ކުދީންގެ ތައުލީމަށާއި ހައްގުތަކަށް މަސައްކަތް ކުރަނިކޮށް 2011 ވަނަ އަހަރު ޠާލިބާނުންގެ ބަޑީގެ ހަމަލާއެއްގައި ހަނިގޮތަކަށް ފުރާނަ ސަލާމަތްވެ، ފަހުން ނޯބަލް އިނާމް ހާސިލްކޮށްފައިވާ މަޝްހޫރު އެކްޓިވިސްޓް މަލާލާ ޔޫސަފްޒައިގެ ހަށިފާރަވެރީންގެ ގޮތުގައި 24 ގަޑިއިރު ހަތިޔާރު ހިފައިގެން ތިބޭ، 2 ގާޑުން ބަހައްޓާގޮތަށް ހަމަޖައްސައިފިއެވެ.
އުމުރުން 18 އަހަރުގެ މަލާލާގެ ސަލާމަތީ ކަންކަން ބެލެހެއްޓުމަށް ދެ ހަށިފާރަވެރީން ބައިތިއްބަން އިނގިރޭސި ސަރުކާރުން ނިންމާފައިވަނީ، ޓެރަރިސްޓުންގެ ފަރާތުން އޭނާއަށް ލިބެމުންދާ މަރުގެ އިންޒާރުތައް އިތުރުވުމާގުޅިގެން ކަމަށް އިނގިރޭސި ނޫހެއް ކަމަށްވާ ދަ ސަންގައި ރިޕޯޓުކޮށްގައި ވެއެވެ. މިއީ އިނގިރޭސި ވިލާތުގެ މިނިސްޓަރުން ފެންވަރުގެ ބޭފުޅުންނާއި ސިޔާސީ އަދި ވީއައިޕީ ބޭފުޅުންނަށްވެސް ސަލާމަތީ އެހީތެރިކަން ފޯރުވައިދޭ މިންވަރެވެ.
"މަލާލާއަށް މީގެ ކުރީން ދިން ނާކާމިޔާބު ހަމަލާއަށްފަހު އޭނާ ވަނީ ވަރަށް ބޮޑު ނުރައްކަލެއްގެ ތެރޭގައި. އަދި އޭނާގެ ޕްރޮފައިލް ބޮޑުވަމުން އަންނަ ވަރަކަށް އިންޒާރުތައްވެސް ދަނީ އިތުރުވަމުން،" އިނގިރޭސި ނޫސްތަކާ ހަވާލާދީ އެންޑީޓީވީން ބުންޏެވެ.
މަލާލާއަކީ ނޯބަލް އިނާމް ހާސިލްކޮށްފައިވާ، އަދި އަންހެނުންގެ ތައުލީމަށް ހާއްސަ ކެމްޕޭންތަކެއް ކުރަމުންދާ ކުއްޖަކަށްވުމުން އޭނާ ބެލެވިފައިވަނީ، ގްލޯބަލް އެމްބެސެޑަރެއްގެ ގޮތުގައެވެ. އެގޮތުން އޭނާއަށް މިހާރު ފޯރުކޮށްދެމުން ގެންދާ ރައްކާތެރިކަމަކީ، މިހުރިހާ ކަމަށްކަށް ބެލުމަށްފަހު ފޯރުކޮށްދޭ ރައްކާތެރިކަމެއް ކަމަށް އިނގިރޭސި މީޑިއާތައް ބުނެއެވެ.
މިދިޔަ ބުރާސްފަތި ދުވަހު އާންމުކުރި ޖީސީއެސްއީއެސް އިމްތިހާނުގައި މަލާލާ ހޯދާފައިވާ ރަނގަޅު ނަތީޖާގެ ސަބަބުން ވެސް އޭނާއަށް ދެމުންދާ އިންޒާރުތައް އިތުރުވެފައިވާ ކަމަށް އިނގިރޭސި ވިލާތުގެ ޖާސޫސީ އިދާރާތަކުން ވަނީ މައުލޫމާތުދީފައެވެ.
ސައެންސުގެ މާއްދާތަކުން ރަނގަޅު ނަތީޖާތަކެއް ހޯދާފައިވާ މަލާލާ ވަނީ، ބައޮލޮޖީ، ކެމިސްޓްރީ، ފިޒިކްސް އިން އޭ ސްޓާ ހާސިލްކޮށްފައެވެ. ހަމައެހެންމެ ރިލިޖަސް ސްޓަޑީޒްއިން ވެސް އޭނާ ވަނީ އޭ ސްޓާ ހޯދައިފައެވެ. މީގެ އިތުރުން ޖޯގްރަފީ، ހިސްޓްރީ، އިނގިރޭސިބަސް އަދި އިނގިރޭސި ލިޓްރެޗާއިން ވެސް މަލާލާ ވަނީ އޭ ގްރޭޑް ހޯދައިފައެވެ.
ޕާކިސްތާނުގެ ސުވާތު ވާދީގައި 2011 ވަނަ އަހަރު ހަގުރާމަވެރީންގެ ބަޔަކު މާލާލާއަށް ހަމަލާދިނީ އޭނާގެ ދެ ރަހްމަތްތެރީނާއެކު ސްކޫލް ވޭންގެ ތެރޭގައި ހުއްޓައެވެ. އަދި މަލާލާގެ ބޮލަށް ބަޑި ޖެހުމަށްފަހު، ހަނގުރާމަވެރީން ދިޔައީ އޭނާ މަރުވިކަމަށް ހީކޮށްކަމަށް އޭރު އުމުރުން 14 އަހަރުގެ މަލާލާ ބުނެފައި ވެއެވެ.
ބަޑީގެ ހަމަލާއަށްފަހު މަލާލާގެ ފުރާނަ ސަލާމަތްވެ އޭނާއަށް ފުރަތަމަ ފަރުވާދިނީ އިސްލާމް އާބާދުގެ ހޮސްޕިޓަލެއްގައެވެ. އެއަށްފަހު އޭނާއަށް އިތުރު ފަރުވާދީފައި ވަނީ، އިނގިރޭސިވިލާތުގެ ބާމިންހަމްގައި ހުންނަ ކްއީން އެލިޒަބަތު ހޮސްޕިޓަލްގައެވެ.
އޭގެ ފަހުން ބާމިންހަމްގައި ދިރިއުޅެމުން އަންނަ މަލާލާ ބެލެވިފައި ވަނީ، އަންހެންކުދީންގެ ތައުލީމަށްޓަކައި މަސައްކަތްކުރާ ޗެމްޕިއަނެއްގެ ގޮތުގައެވެ. އަދި މިދިޔަ އަހަރު މަލާލާއަށް ނޯބަލް ޕީސް ޕްރައިޒް ލިބުނުއިރު އެއީ އެ އިނާމް ލިބުނު އެންމެ ހަގު ކުއްޖާއެވެ. މީގެ އިތުރުން އޭނާއަށް ވަނީ އިންޑިއާގެ ކައިލާޝް ޝަތުޔަރުތީ ލިބިފައެވެ.
މައުލޫމާތު- އެންޑީޓީވީ