އަފްޣާނިސްތާނުގައި ތާލިބާނުންގެ ސަރުކާރުން އަންހެން ކުދިންނާއި އަންހެނުންނަށް ގެންގުޅޭ ފިއްތުންތެރި ސިޔާސަތުތަކަށް ގޮންޖަހާލުމަށް ނޯބެލް ސުލްހައިގެ އިނާމު ލިބިފައިވާ މަލާލާ ޔޫސުފްޒާއީ އިސްލާމީ ލީޑަރުންނަށް އިއްޔެ ގޮވާލައިފިއެވެ.
"ސާފުކޮށް ބުނާނަމަ އަފްޣާނިސްތާނުގައި ތިބި ތާލިބާނުން އަންހެނުންނަކީ އިންސާނުންގެ ގޮތުގައި ނުދެކޭ." އިސްލާމީ ގައުމުތަކުގައި އަންހެން ކުދިންގެ ތައުލީމާ ބެހޭ ގޮތުން ޕާކިސްތާނުން ބާއްވާ ބައިނަލްއަގުވާމީ ސަމިޓެއްގައި މަލާލާ ވިދާޅުވިއެވެ.
"ދީނާއި ސަގާފަތުގެ ނިވަލުގައި އެ މީހުން އަބަދުވެސް ދަނީ އެ މީހުންގެ ކުށްތައް ފޮރުވަމުން."
"ތާލިބާނުން އެ މީހުން ބޭނުންވާ ކަންތައް ވަރަށް ސާފުކޮށް ބުނަނީ: އެ މީހުން ބޭނުންވަނީ އާންމު ދިރިއުޅުމުގެ ހުރިހާ ކަމަކުން ވެސް އަންހެނުންނާއި އަންހެން ކުދިން ބާކީކޮށް މުޖުތަމައުން އެކަހެރިކުރަން،" ކޮންފަރެންސްގައި މަލާލާ ވިދާޅުވިއެވެ.
ތާލިބާނުން ދިޔައީ "އެ މީހުންގެ އޮޅުން ބޮޅުން ބޮޑު ގާނޫނުތައް މުގުރާލަން ކެރޭ އަންހެނުންނާއި އަންހެން ކުދިންނަށް އަނިޔާކޮށް، ބަންދުކޮށް، ގެއްލުންދީ އަދަބު ދެމުން."
އަންހެން ކުދިންނަށް ތައުލީމު ދިނުމަށް ވަކާލާތުކޮށް ތާލިބާނުންނާ ދެކޮޅަށް އަޑު އުފުލުމުގައި އުޅެނިކޮށް ޕާކިސްތާނުގެ ތާލިބާނުން 2012 ވަނަ އަހަރު އުމުރުން 15 އަހަރުގައި މަލާލާގެ ބޮލަށް ބަޑިޖަހައި ވަރަށް ބޮޑަށް ޒަޚަމްކޮށްލިއެވެ. ހަނި ގޮތަކަށް ފުރާނަ ސަލާމަތްވި މަލާލާގެ މަސައްކަތުގެ އަގު ވަޒަންކޮށް 2014 ވަނަ އަހަރު ނޯބެލްގެ ސުލްހައިގެ އިނާމު ވަނީ ދީފައެވެ.
ދެ ދުވަހުގެ މުއްދަތަށް ކުރިއަށް ގެންދާ މި ކޮންފަރެންސްގައި މުސްލިމް ވޯލްޑް ލީގުގެ ތާއީދާ އެކު އިސްލާމުންގެ އަޣުލަބިއްޔަތު އޮންނަ އެތައް ގައުމެއްގެ ވަޒީރުންނާއި ތައުލީމީ ދާއިރާގެ އޮފިޝަލުން ބައިވެރިވެވަޑައިގަންނަވައެވެ.
ޕާކިސްތާނުގެ އެޑިއުކޭޝަން މިނިސްޓަރު ޚާލިދު މަގްބޫލް ސިއްދީގީ ހޮނިހިރު ދުވަހު އޭއެފްޕީއަށް ވިދާޅުވީ އަފްޣާނިސްތާނުގެ ތާލިބާން ސަރުކާރުގެ މަންދޫބުންނަށް މި ބައްދަލުވުމަށް ދައުވަތު ދިން ނަމަވެސް ބައިވެރި ނުވި ކަމަށެވެ.
މަލާލާގެ ވާހަކަތަކާ ގުޅޭ ގޮތުން ތާލިބާނުންގެ ސަރުކާރުން ވަނީ ޖަވާބެއް ދިނުމަށް ދެކޮޅު ހަދާފައި ކަމަށް ބީބީސީން ރިޕޯޓުކުރެއެވެ. އަފްޣާނިސްތާނުގެ ސަގާފަތާއި އިސްލާމީ ޝަރީއަތަށް އެ މީހުން މާނަކުރާ ގޮތާ އެއްގޮތަށް އަންހެނުންގެ ހައްގުތަކަށް އިހުތިރާމްކުރާ ކަމަށް ތާލިބާނުން މީގެކުރިން ބުނެފައިވެއެވެ.
ދެހާސް އެކާވީސް ވަނަ އަހަރު ތާލިބާނުން އަފްޣާނިސްތާނުގެ ކޮންޓްރޯލް އަލުން ހޯދި ފަހުން، އެގައުމުގެ ސަރުކާރު ބޭރުގެ އެއްވެސް ސަރުކާރަކުން ރަސްމީކޮށް ބަލައިގަނެފައެއް ނުވެއެވެ. ހުޅަނގުގެ ބާރުތަކުން ބުނެފައިވަނީ އަންހެނުންނަށް ހަނިކޮށްފައިވާ ސިޔާސަތުތަކަށް ބަދަލު ގެންނަން ޖެހޭ ކަމަށެވެ.
އަފްޣާނިސްތާނަކީ މިހާރު ދުނިޔޭގައި އަންހެނުންނާއި އަންހެން ކުދިންނަށް ސާނަވީ އަދި މަތީ ތައުލީމު ހޯދުން މަނާކޮށްފައި އޮތް ހަމައެކަނި ގައުމެވެ. އެ ގައުމުގެ ގާތްގަނޑަކަށް ބައި މިލިއަން މީހުން ވަނީ ސްކޫލް ތައުލީމު އުގެނުމުން ގަސްތުގައި މަހުރޫމުކޮށްފައެވެ.