ހިއުމަން ރައިޓްސް އެކްޓިވިސްޓް މަލާލާ ޔޫސުފްޒާއީ މިހާރު ކިޔަވަމުންދާ އޮކްސްފޯޑް ޔުނިވާސިޓީގެ އެންމެ ފަހުގެ އިމްތިހާންތައް ނިންމާލައިިފިއެވެ.
މަލާލާ އޮކްސްފޯޑް ޔުނިވާސިޓީގައި ކިޔަވަމުން ދިޔައީ ޕޮލިޓިކްސް ފިލޯސަފީ އަދި އިކޮނޮމިކްސްގެ ދާއިރާއިންނެވެ.
" އަހަންނަކަށް ނޭނގޭ ދެން ކުރިއަށް އޮތީ ކިހިނެއް ކަމެއް. އެހެން ނަަމަވެސް މިވަގުތަށް ދެން އޮތީ ނެޓްފްލިކްސް ބެލުމާއި ފޮތް ކިޔުމާއި އަދި ނިދުން" އިމްތިހާނުތައް ނިންމާލުމަށްފަހު މަލާލާ ކުރި ޓުވީޓެއްގައި ބުނެފައިވެއެވެ.
އިމްތިހާނުތައް ނިންމާލުން ފާހަގަކޮށް ގްރެޖުއޭޝަން ކޭކަކާއެކު އާއިލާއާއެކު ނަގާފައިވާ ފޮޓޯތަކެއް މަލާލާ ވަނީ ޓުވިޓާގައި ހިއްސާކޮށްފައެވެ.
ޕާކިސްތާނަށް ނިސްބަތްވާ އުމުރުން 22 އަހަރުގެ މަލާލާ މަޝްހޫރުވެގެން ދިޔައީ އެގައުމުގެ އަންހެން ކުދިންގެ ތައުލީމުގެ ހައްގުތައް ކަށަވަރުކުރުމަށް ކުރި މަސައްކަތްތަކާ ގުޅިގެންނެވެ. އެކަމާ ގުޅިގެން ހަރުކަށި މީހުންގެ ހަމަލާއެއް އަމާޒުވެ އޭނާގެ އެތައް ތަނަކަށް ވަޒަން އެރިއެވެ.
ނަމަވެސް ފަހުން އޭނާއަށް ފަރުވާ ދީގެން ވަނީ ފުރާނަ ސަލާމަތްވެފައެވެ. އޭގެ ފަހުން މަލާލާ އާއި އޭނާގެ އައިލާ ދިރިއުޅެމުން ގެންދަނީ އިނގިރޭސިވިލާތުގެ ބާމިންގްހަމްގައެވެ.
މަލާލާއަށް 2014 ވަނަ އަހަރު ވަނީ ނޮބެލް ސުލްހައިގެ އިނާމްވެސް ލިބިފަ އެވެ. އޭރު އޭނާގެ އުމުރުން 17 އަހަރެވެ. ނޮބެލް ސުލްހައިގެ އިނާމު ހާސިލްކުރި އެންމެ ހަގު ބޭފުޅަކީވެސް މަލާލާއެވެ.
މަލާލާ އޮކްސްފޯޑްގައި ކިޔަވަން ފެށީ 2017 ވަނަ އަހަރުއެވެ.