ދެކުނު އެމެރިކާގެ ގައުމެއް ކަމަށްވާ ޕެރަގުއޭގައި ދޮންބައްޕައަކު ރޭފް ކުރުމުގެ ސަބަބުން މާބަނޑުވި 11 އަހަރުގެ އަންހެން ކުއްޖަކު ވިހައިފިއެވެ.
ޑޮކްޓަރުންނާ ހަވާލާދީ އެސޯސިއޭޓެޑް ޕްރެސް (އޭޕީ)ގައި ބުނެފައި ވަނީ، އެކުއްޖާ ވިއްސާފައިވަނީ، ސިޒޭރިއަން ހަދައިގެން ކަމަށާއި އެ ދެމައިންގެ ހާލުވެސް ރަނގަޅުކަމަށެވެ.
އިންސާނީ ހައްގުތަކަށް މަސައްކަތްކުރާ ފަރާތްތަކުގެ ފާޑުކިއުންތައް ކުރިމަތިވީ ނަމަވެސް ޕެރަގުއޭގެ ގާނޫނުތައް ހަމަޖެހިފައި އޮންނަގޮތުން 'އެބޯޓް'ކުރުމަކީ މަނާކަމެކެވެ. އެހެންކަމުން އެ ކުއްޖާއަށް އެބޯޓުކުރުމުގެ އިހްތިޔާރެއް ނުލިބުނެވެ.
ނަސާރާ ދީނުގެ ކެތަލިކް މަޒްހަބުގެ ބޮޑު އަޣުލަބިއްޔަތެއް އޮންނަ، ޕެރަގުއޭގައި 'އެބޯޓް'ކުރުމުގެ ހުއްދަ އޮންނަނީ ހަމައެކަނި އެކަމުގެ ސަބަބުން މައިމީހާގެ ސިއްހަތަށް ނުރައްކާވެދާނެ ހާލަތުގައެވެ. އެހެންކަމުން މިއަހަރުގެ ކުރީކޮޅު އެ ކުއްޖާ އެބޯޓްކުރުމަށް އެދުނު ނަމަވެސް، އެގައުމުގެ ހެލްތު މިނިސްޓްރީން ބުނެފައިވަނީ މާބަނޑުމީހާގެ ސިއްހަތަށް ނުރައްކަލެއް މެދުވެރިވާ ހާލަތަކަށް ނުވާތީ އެބޯޓް ކުރުމުގެ ހުއްދަ ނުދެވޭނެ ކަމަށެވެ.
ޕެރަގުއޭގެ ވެރިރަށް އަސުންސިއޯންގައި ހުންނަ ރެއިނާ ސޯފިއާ ހޮސްޕިޓަލްގެ ޑޮކްޓަރެއް ކަމަށްވާ ޑރ. މާރިއޯ ވިޔަލްބާ ވިދާޅުވީ، އެ ތުއްތު އަންހެން ކުއްޖާ އުފަންވިއިރު ބަރުދަނުގައި 3.35 ކިލޯގްރާމް ހުރި ކަމަށެވެ.
"ތުއްތުކުއްޖާގެ މަންމަވެސް އަންނަނީ ސާޖަރީއަށްފަހު ރަނގަޅުވަމުން،" ޕެރަގުއޭގެ ކާޑިނަލް ރޭޑިއޯ ސްޓޭޝަނަށް މައުލޫމާތުދެމުން ޑރ. މާރިއޯ ވިޔަލްބާ ވިދާޅުވިއެވެ.
އޭނާ ވިދާޅުވީ، 11 އަހަރުގެ އެ އަންހެން ކުއްޖާގެ އިތުރުން ވިހަން ތައްޔާރުވެފައިވާ 12 އަހަރުގެ ދެ އަންހެން ކުއްޖަކާއި ޅައުމުރުފުރައިގެ އެތަކެއް ކުދީންނެއް މިހާރުވެސް އެ ހޮސްޕިޓަލްގައި އެޑްމިޓްކޮށްފައިވާ ކަމަށެވެ.
"މިކަން ހުއްޓުވުމަށް ކުރެވޭނޭ ކަމަކީ، މީހުން ހޭލުންތެރިކުރުވައި ތައުލީމަށް ވީހާވެސް ބޮޑަށް އިންވެސްޓްކުރާންވީ،" ޕެރަގުއޭގެ އެ ހާލަތުން މިންޖުވުމަށް ކުރެވިދާނޭ ކަންތަކާ ބެހޭގޮތުން ޑރ. މާރިއޯ ވިޔަލްބާ ވިދާޅުވިއެވެ.
ކުއްޖާގެ ރައްކަލަށްޓަކައި ނަންހާމަކޮށްފައި ނުވާ އެ އަންހެންކުއްޖާއާ ބެހޭގޮތުން އޮފިޝަލުންނާ ހަވާލާދީ، ބީބީސީގައި ބުނެފައި ވަނީ، އެކުއްޖާ ރޭޕްކޮށްފައި ވަނީ އުމުރުން އެންމެ 10 އަހަރުގައި ކަމަށެވެ.
އެ އަންހެން ކުއްޖާގެ ދޮންބައްޕަ އެ މައްސަލައިގައި ދައުވާކުރުމަށް ހައްޔަރުކޮށްފައިވާއިރު، އުމުރުން 42 އަހަރުގެ އެމީހާ އޭނާ އެއްވެސް ގޯސްކަމެއް ނުކުރާކަމަށް ބުނެ، އެ ދައުވާއަށް އިންކާރުކޮށްފައެވެ. އަދި އެމީހާގެ އަންހެނުން (ކުއްޖާގެ މަންމަ) ވެސް ވަނީ އެކުއްޖާއާ ދޭތެރޭގައި ފަރުވާކުޑަކޮށްފައިވާތީ ހައްޔަރުކޮށްފައެވެ.
ހަށިގަނޑު ރަނގަޅަށް ހެދިބޮޑުނުވާ ޅައުމުރުފުރައިގެ އަންހެންކުދީން ބަލިވެ އިނުމުގެ ސަބަބުން އެކުދީންގެ ފުރާނައަށް ނުރައްކާވުމުގެ ފުރުސަތު އޮތްއިރު، އދ.ގެ އިންސާނީ ހައްގުތަކާ ބެހޭ ޖަމިއްޔާއާއި އަދި އެނޫންވެސް ބައިނަލްއަގްވާމީ ޖަމާއަތްތަކުން ދަނީ ޕެރަގްއޭ ސަރުކާރަށް ވަރަށް ބޮޑަށް ފާޑުކިޔަމުންނެވެ. އެގޮތުން އެމްނެސްޓީ އިންޓަނޭޝަނަލުން ބުނެފައި ވަނީ، އެ ކުއްޖާ ވިހަންދެން ބެހެއްޓުމަށް ޕެރަގުއޭ ސަރުކާރުން ނިންމި ނިންމުމަކީ "ލާއިންސާނީ އަމަލެއް" ކަމަށެވެ.
ގާތްގަނޑަކަށް 6.8 މިލިއަން މީހުންގެ އާބާދީއެއް އޮންނަ ޕެރަގުއޭގައި އަހަރެއްގެ ތެރޭގައި އުމުރުން 14 އަހަރުން ދަށުގެ 600 އެއްހާ ކުދީން ބަލިވެ އިންނަކަމަށް އެގައުމުގެ ރަސްމީ ތަފާސްހިސާބުތަކުން ދައްކައެވެ.
މައުލޫމާތު: އޭޕީ، ބީބީސީ