ފަލަސްތީނުގެ ޤުދުސްގައި ހުންނަ ތާރީޚީ "މަމީލާ ގަބުރުސްތާން"ގައި އިސްރާއީލްގެ ދައުލަތުން ނައިޓް ކްލަބެއް ހެދި މައްސަލަ ހޫނުވެއްޖެ އެވެ.
މެދުއިރުމައްޗާއި އަރަބި ދުނިޔޭގެ ޚަބަރުތައް ގެނެސްދޭ އަލް ބަވާބާ ނޫހުން ބުނެފައި ވަނީ، އިރުމަތީ ގުދުސްގައި ހުންނަ މުސްލިމުންނާއި ނަޞާރާއިންގެ ފިކުރީ އަދި މާއްދީ އެތަކެއް ތަރިކައެއް ހިމެނޭ މަމީލާ ގަބުރުސްތާނުގެ ބައެއްގައި ހަރުކަށި ޔަހޫދީ ދައުލަތުން ނައިޓް ކްލަބެއް ހުޅުވީ މި މަހުގެ ކުރީކޮޅުގަ އެވެ. އަދި މި މައްސަލަ އަރަބި ގައުމުތައް ހިމެނޭ ސަރަހައްދީ ބޮޑު ޖަމާއަތް ކަމަށްވާ އަރަބި ލީގުން ވަނީ ހަރުކަށި އިބާރާތުން ކުށްވެރިކޮށް އެކަމުގެ ސަބަބުން ނޭދެވޭ ކަންތައްތަކަކާ އިސްރާއީލަށް ކުރިމަތިލާން ޖެހިދާނޭ ކަމުގެ އިންޒާރު ވެސް ދީފަ އެވެ.
ގުދުސްގައިވާ މުސްލިމުންގެ ދީނީ އަދި ތާރީޚީ ތަންތަން ހަލާކުކޮށް ނައްތައިލުމަށް ޔަހޫދީ ދައުލަތުން ހިންގަމުންދާ ޖަރީމާތައް ކުށްވެރިކޮށް އަރަބި ލީގުން ނެރުނު ބަޔާނެއްގައި ވަނީ، އިސްރާއީލްގެ މި އަމަލަކީ "މުޑުދާރު އަމަލެއް"ގެ ގޮތުގައި ސިފަކޮށްފަ އެވެ.
"އިސްރާއީލުން މި ގަބުރުސްތާނު ހަލާކުކޮށްލުމަށް މަސައްކަތްކުރަމުންދާތާ އަހަރުތަކެއް ވެއްޖެ،" މުސްލިމުންނާއި ނަޞާރާއިންގެ ދީނީ ތަރިކަތައް ނައްތާލުމަށް ޔަހޫދީން ހިންގާ ޖަރީމާތަކުގެ ސަބަބުން އިސްރާއީލު ހީނުކުރާ ފަދަ ކަންތައްތަކަކާ ކުރިމަތިލާން ޖެހިދާނެ ކަމުގެ އިންޒާރު ދެމުން އެ ބަޔާނުގައިވެ އެވެ.
މިދިޔަ ޖުލައި މަހުގެ ތެރޭގައި އިސްރާއީލުން ވަނީ، މަމީލާ ގަބުރުސަތާނުގެ ބައެއްގައި 200 އެޕާޓްމަންޓާއި ފިހާރަތަކާއި 480 ކޮޓަރީގެ ހޮޓަލެއް އެޅުމަށް ނިންމައި އެ މަޝްރޫއު އިއުލާނުކޮށްފަ އެވެ.
މަމީލާ ގަބުރުސްތާނުގައި އިސްރާއީލުން އަޅާ ހޮޓަލުގެ ކުރެހުމެއް -- ފޮޓޯ: މިޑްލްއީސްޓް މޮނިޓަރ
މީލާދީން ހަތް ވަނަ ގަރުނުގައި އިރުމަތީ ގުދުސްގައި ބިނާ ކުރެވުނުކަމަށް ބެލެވޭ މަމީލާ ގަބުރުސްތާނަކީ މި އުންމަތުގެ ނަބިއްޔާ މުޙައްމަދު ޞައްލަﷲ އަލައިހި ވަސައްލަމްގެ އެތަކެއް ޞަޙާބީންނެއް ފަސްދާނުލެވިފައިވާ ގަބުރުސްތާނެކެވެ. އަދި މުސްލިމުންނާއި ނަޞާރާއިން ދީނައްޓަކައި ކުރި އެތަކެއް ހަނގުރާމައެއްގެ ހަނދާންތަކާ ގުޅިފައިވާ ތަރިކަތަށް ރައްކާކުރެވިފައިވާ ތަނެކެވެ. އިސްރާއީލުން 1948ގައި ފަލަސްތީނުގެ ބިމުގައި ގާއިމްވުމާ ހަމައަށް ވެސް އެ ގަބުރުސްތާނުގައި މީހުން ވަޅުލުން ކުރިއަށް ގެންދިޔަ އެވެ.
އިރުމަތީ ގުދުސް އިސްރާއީލުން އަޅުވެތިކުރީ 1967ގައި ހިނދި މެދުއިރުމަތީގެ ހަނގުރާމައިގެ ތެރޭގަ އެވެ. އަދި އޭގެ ފަހުން 1980ގައި އިސްރާއީލުން ވަނީ، މުސްލިމުންގެ އެ މުގައްދަސް ބިމަކީ، ޔަހޫދީ ދައުލަތުގެ ވެރިރަށް ކަމުގައި ކަނޑައަޅައިފަ އެވެ. އެހެން ނަމަވެސް ބައިނަލްއަގްވާމީ ގިނަ ފަރާތްތަކުން އެކަން ގަބޫލުކޮށްފައެއް ނުވެ އެވެ.