ޕާކިސްތާނުގެ "ސްކޫލްގާރލް އެކްވިސްޓް" މަލާލާ ޔޫސަފްޒައީއަށް ހަމަލާދިނުމުގެ ކުށުގައި އުމުރުދުވަހުގެ ޖަލުހުކުމެއް އިއްވާފައިވާ 10 މީހުންގެ ތެރެއިން 8 މީހުން އެގައުމުގެ ކޯޓަކުން ދޫކޮށްލައިފި އެވެ.
ޕާކިސްތާނު ފުލުހުންގެ ސީނިއަރ އޮފިޝަލެއް ކަމަށްވާ ސާލިމް ޚާންއާ ހަވާލާދީ އަލްޖަޒީރާގައި ބުނެފައި ވަނީ، މަލާލާއަށް ހަމަލާދިން ކަމުގެ ކުށުގައި 25 އަހަރަށް ޖަލަށްލާފައިވާ 10 މީހުންގެ ތެރެއިން 8 މީހަކު ދޫކޮށްލާފައި ވަނީ، 2012 ވަނަ އަހަރު މަލާލާއަށް ދިންހަމަލާއާ އެ މީހުންނާ ގުޅުން އޮތްކަން ސާބިތުކުރުމަށް އެކަށީގެވާ ހެކި ނެތުމުން ކަމަށެވެ.
މިދިޔަ އޭޕްރީލް މަހު ޕާކިސްތާނު ފުލުހުން ވަނީ، މަލާލާއަށް ހަމަލާދިން ކަމުގެ ކުށުގައި 10 މީހަކު 25 އަހަރަށް ޖަލަށްލާފައިވާ ކަމަށް ބުނެފައެވެ. ސުވާތުގެ އެންޓި-ޓެރަރިޒަމް ކޯޓެއްގައި އެމީހުންގެ ޝަރީއަތް ކުރިއަށް ގެންދިޔައީ ޝަރީއަތުގެ މަޖިލީހަށް މީހުންނަށް ނުވަދެވޭގޮތަށް ބަންދުކޮށްގެން ކަމަށްވެސް ބުނެފައިވެއެވެ.
"އެމީހުން ދޫކޮށްލަން މެދުވެރިވި ހަމައެކަނި ސަބަބަކީ އެމީހުންނާ ދެކޮޅަށް އެކަށީގެންވާ ހެކި ލިބިފައި ނުވާތީ،" ޚާން ވިދާޅުވި އެވެ.
ސަރުކާރުގެ ވަކީލެއް ކަމަށްވާ ނައީމް ޚާން ވިދާޅުވީ، އެ 10 މީހުންވެސް ވަނީ މަލާލާއަށް ހަމަލާދިން ކަމަށް ކޯޓުގައި އެއްބަސްވެފައި ކަމަށެވެ.
"އެމީހުންގެ ޝަރީއަތް ކުރިއަށް ދިޔައިރު، އެ ދިހަ މީހުންވެސް ވަނީ، މަލާލާއަށް ހަމަލާދިން ކަމަށް އެންޓި-ޓެރަރިޒަމް ކޯޓުގެ ފަނޑިޔާރުގެ ކުރިފުޅުމަތީގައި އިއުތިރާފް ވެފައި. އެކަމަކު އޭގެ ތެރެއިން އެންމެ ދެމީހުން، އިޒްހާރު ޚާން އާއި އިސްރާއުﷲ ޚާންގެ މައްޗަށް ހުކުމް ތަންފީޒުކުރީ. އަނެއް އަށް މީހުން ވަނީ އޭޕްރީލް 30ގައި މިނިވަންކޮށްފައި،" ނައީމް ވިދާޅުވިއެވެ.
މަލާލާއަށް ދިން ހަމަލާއާ ގުޅިގެން ހައްޔަރުކުރި މީހުންގެ ތެރެއިން ދެ މީހެއްގެ މައްޗަށް ފުރިހަމަ ހެކި ލިބިފައިވާއިރު އަނެއް އަށް މީހުންގެ މައްޗަށް އެކަށީގެންވާ ހެކި ނުލިބުމުގެ ސަބަބުން ދޫކޮށްލި ނަމަވެސް އަދިވެސް އެ މައްސަލައިގެ ތަހްގީގުތައް ކުރިއަށް ދާކަމަށް އޮފިޝަލުންނާ ހަވާލާދީ އަލްޖަޒީރާގައި ވެއެވެ.
މަލާލާ ޔޫސަފްޒައިއަށް ވަނީ، ކުޑަކުދީންގެ ހައްގުގައި އޭނާ ކުރަމުން އަން ކެމްޕޭންތަކުގެ ސަބަބުން 2014 ވަނަ އަހަރު ނޯބެލް ޕީސް ޕްރައިޒް ލިބިފައި -- ފޮޓޯ: ބީބީސީ
ތާލިބާނުންގެ އިންޒާރުތަކާއެކު ވެސް ބިރެއް ޖެހިލުމެއް ނެތި، ސްކޫލް އުމުރުފުރައިގެ އަންހެންކުދީންނަށް ތައުލީމު އުނގެނުމުގެ ފުރުސަތު ތަނަވަސް ކޮށްދިނުމަށާއި، އަންހެންކުދީން ތައުލީމަށް ހޭލުންތެރިކުރުވުމަށް ގޮވާލައި މަލާލާ ކުރިއަށް ގެންދިޔަ ކެމްޕޭންގެ ސަބަބުން އޭނާ ދުނިޔޭގެ އެކި ކަންކޮޅުތަކުގައި މަޝްހޫރުވެގެން ދިޔައެވެ.
ކުޑަކުދިންގެ ހައްގުގައި މަލާލާ ކުރަމުން އަންނަ މަސައްކަތްތަކުގެ އަގުވަޒަންކޮށް މިދިޔަ އަހަރު، އޭނާއަށް ވަނީ، ނޯބެލް ޕީސް ޕްރައިޒް އެވޯޑު ދީފައެވެ. އެގޮތުން އޭނާ ވެގެން ގޮސްފައިވަނީ، އެންމެ ހަގު އުމުރުގައި އެ އެވޯޑު ހާސިލްކުރި ފުރަތަމަ ފަރާތަށެވެ.
މަލާލާގެ ބޮލަށް ބަޑިޖަހައި، ބަޔަކު ހަމަލާދިނީ 2012 ވަނަ އަހަރުގެ އޮކްޓޯބަރު މަހުގެ 12 ވަނަ ދުވަހު ސުވާތު ވާދީގެ މިންގޯރާގައި ދުއްވާފައިދިޔަ ސްކޫލް ބަހެއްގެ ތެރޭގައި އޭނާ އިންދައެވެ. ދުނިޔޭގެ މީޑިއާގެ ސަމާލުކަން ލިބުނު އެ ހާދިސާ ހިނގިއިރު، މަލާލާގެ އުމުރަކީ އެންމެ 15 އަހަރެވެ. މަލާލާގެ ބޮލަށް ބަޑި ޖަހައި، ފުރާނަ އަށް ނުރައްކާ ވާ މިންވަރަށް އޭނާ ޒަޚަމް ކޮށްލި އެހަމަލާގައި އޭނާއާ އެކު އެވަގުތު ބަހުގެ ތެރޭގައި ތިބި އޭނާގެ ދެ ރަހްމަތްތެރީންނަށް ވެސް ބޮޑެތި ޒަޚަމްތަކެއް ލިބުނެވެ.
މިހާރު އުމުރުން 17 އަހަރުގެ މަލާލާގެ ބޮލަށް ލިބުނު ސީރިއަސް ޒަޚަމުތަކަށް ފަރުވާ ދީފައިވަނީ، އިނގިރޭސި ވިލާތުގައެވެ. އަދި ޠާލިބާނުންގެ އިންޒާރުތަކާ ގުޅިގެން ޕާކިސްތާނަށް ދެވޭނޭ ގޮތެއް ނެތުމުގެ ސަބަބުން މަލާލާ އޭނާގެ އާއިލާއާ އެކު މިހާރު އޭނާ ދިރިއުޅެމުން އަންނަނީ، ބާމިންހަމްގައެވެ.
ޕާކިސްތާނުގެ ސުވާތު ވާދީއަށް 1997 ވަނަ އަހަރު އުފަންވި މަލާލާ ޔޫސަފްޒައީ އަކީ، "ޠާލިބާނުންގެ އަޅުވެތިކަމުގެ ދަށުގައި ދިރިއުޅުން" މި މައުލޫއަށް 2009-10އަށް ކާކުކަން ނޭނގޭ ގޮތަށް ބީބީސީ ބްލޮގަށް ލިޔުނު ކުއްޖެކެވެ. އިންޓަނޭޝަނަލް ޗިލްޑްރެންސް ޕީސް ޕްރައިޒަށް 2011 ވަނަ އަހަރު ނޮމިނޭޓްވި، މަލާލާ ވަނީ 2013 ވަނަ އަހަރު އދ.ގައި ތަގުރީރުވެސް ކޮށްފައެވެ.