ބަށިބޯލް ފައުންޑޭޝަނުން ގއ. އަތޮޅު ރަށްތަކަށް އަމަޒުކޮށްގެން ބޭއްވި 'ބީއެފްއެމް ގއ. އަތޮޅު ޒަމާނީ ބަށި މުބާރާތު'ގެ ފައިނަލް މެޗްގައި އެއަތޮޅު ގެމަނަފުށީ މަހާރަނި ޓީމްގެ މައްޗަށް އަށް ފޯލީގެ ތަފާތުން މޮޅުވެ ގއ. ދާންދޫ ރިއަލް ކުއީން މުބާރާތުގެ ޗެމްޕިއަންކަން ހޯދައިފިއެވެ.
ދާންދޫ ގައި ކުރިޔަށް ގެންދިޔަ މުބާރާތުގައި އިއްޔެ ދާންދޫ ބަށި ކޯޓުގައި ބޭއްވި ފައިނަލް މެޗްގައި ދާންދޫ ޓީމް މޮޅުވެފައިވަނީ 20 ލަނޑު 10 ފޯލި ހޯދައިގެންނެވެ.
ގެމަނަފުށީ ޓީމަށް ހެދިފައިވަނީ 20 ލަނޑު 2 ފޯއްޔެވެ.
މިއީ ބަށިބޯލް ފައުންޑޭޝަނާއި ގއ. އަތޮޅު ކައުންސިލާއި ދާންދޫ އަންހެނުންގެ ކޮމިޓީ ގުޅިގެން ގއ. އަތޮޅު ރަށްތަކަށް ޚާއްސަކޮށް ހުޅުވާލައިގެން ބޭއްވި ފުރަތަމަ ބަށި މުބާރާތެވެ. މިއަހަރުގެ މުބާރާތުގައި ބައިވެރިވެފައިވަނީ ހަތަރު ރަށަކުންނެވެ. އެއީ ދާންދޫއާއި ގެމަނަފުށީގެ އިތުރުން ނިލަންދޫއާއި ވިލިނގިއްޔެވެ.