ރޯމް (މޭ 28) : ދުނިޔޭގައި ހައިހޫނުކަން ތަޙައްމަލް ކުރަމުން ގެންދާ މީހުންގެ އަދަދު އެއްބިލިޔަނުން 800 މިލިޔަނަށް ވުރެ ވެސް މިހާރު މަދުވެފައިވާ ކަމަށް އދ. އިން ބުނެފި އެވެ.
ކާބޯތަކެއްޗާ އަދި ދަނޑުވެރިކަމާ ބެހޭ އދ. ގެ ޖަމިއްޔާ އެފްއޭއޯ އިން ބުނީ ދުނިޔޭގައި މިހާރު ހައިހޫނުކަން ތަހައްމަލް ކުރަންޖެހެނީ ގާތްގަނޑަކަށް ހަތްސަތޭކަ ނުވަދިހަ ފަސްމިލިޔަން މީހުން ކަމަށާ މިއީ މީގެ ބާވީހަކަށް އަހަރާ އަޅާބަލާއިރު ދުއިސައްތަ ސޯޅަ މިލިޔަން މީހުން މަދު އަދަދެއް ކަމުގައެވެ.
ހައިހޫނުކަމާ ބެހޭ ގޮތުން އެފްއޭއޯ އިން އެއްކޮށްފައިވާ ތަފާސްހިސާބުތަކުގެ އަލީގައި އެޖަމިއްޔާއިން ނެރުނު ރިޕޯޓެއް ބުނާ ގޮތުން މިހާރު ހައިހޫނުކަން ތަހައްމަލް ކުރަން ޖެހޭ މީހުންގެ ތެރެއިން ވެސް ގިނަ މީހުންނަކީ އެކި ދުވަސްވަރު އެކި ސަބަބުތަކާ ގުޅިގެން ހައިހޫނުކަން ތަހައްމަލްކުރަން ޖެހޭ މީހުން ކަމަށާއި މި އެންމެންނަކީ އަހަރުގެ ހުރިހާ ދުވަސްތަކެއްގައި ހައިހޫނުކަން ތަހައްމަލް ކުރަންޖެހޭ މީހުން ނޫން ކަމުގަ އެވެ.
އެފްއޭއޯގެ ޑައިރެކްޓާ ޚޮޒޭ ގްރަޒިޔާނޯވް ވިދާޅުވި ގޮތުގައި މިއީ ދެހާސްވަނަ އަހަރު ދުނިޔޭގެ ލީޑަރުން އދ.ގެ މައިމަރުކަޒަށް ވަޑައިގެން އެކަށައެޅުއްވި ސާސްކަފް ލަނޑުދަނޑިތައް ޙާސިލްވަމުންދާކަމުގެ ހެއްކެކެވެ.
ސާސްކަފް ލަނޑުދަނޑިތަކުގެ ތެރޭގައި 2015 ވަނަ އަހަރު ނިމުމުގެ ކުރިން ހައިހޫނުކަން ތަޙައްމަލް ކުރަންޖެހޭ މީހުންގެ އަދަދު ފަންސާސް އިން ސައްތައަށް ދަށްކުރުން ހިމެނެ އެވެ.
ދުނިޔޭގެ ބައެއް ގައުމުތަކަށް ސާސްކަފް މިނަތީޖާއަށް ބަލާއިރު ދުނިޔޭގެ ގައުމުތައް ގުޅިގެން އެކަށީގެންވާ ވަރަކަށް މަސައްކަތް ކޮށްލެވިއްޖެ ނަމަ ކުރިޔަށްއޮތް ފަނަރަ ވަރަކަށް އަހަރު ތެރޭގައި ހައިހޫނުކަމުގެ ވަބާ ދުނިޔެއިން ނައްތާލެވިދާނެކަމުގެ އުންމީދު މިހާރު ވަރަށް ބޮޑުކަމަށް ޚޮޒޭ ވިދާޅުވި އެވެ. (ބީބީސީ)