ކައުންސިލްތައް މެދުވެރިކޮށް އޮންލައިން ލައިބްރަރީގެ ޚިދުމަތް ތަޢާރަފްކޮށް އެޚިދުމަތް ފުޅާކުރުމުގެ ގޮތުން ޑިޖިޓަލް ލައިބްރަރީއެއް ގާއިމު ކުރުމަށް ލޯކަލް ގަވަރުމަންޓް އޮތޯރިޓީ (އެލްޖީއޭ) އާއި ނޭޝަން ސެންޓާ ފޮ އިންފޯމޭޝަން ޓެކްނޮލޮޖީ (އެންސީއައިޓީ) އަދި ގައުމީ ކުތުބުހާނާ އެކު އެއްބަސްވުމެއްގައި ސޮއިކޮށްފި އެވެ.
މިއަދު މެންދުރު އެލްޖީއޭ އޮފީހުގައި ބޭއްވި ހާއްސަ ރަސްމިއްޔާތެއްގައި އެ އެއްބަސްވުމުގައި އެ އޮތޯރިޓީގެ ފަރާތުން ސޮއިކުރެއްވީ އެލްޖީއޭގެ ސީއީއޯ ޑރ. އަހުމަދު ޝުކުރީ ހުސައިން އެވެ. އެންސީއައިޓީގެ ފަރާތުން އެތަން ހިންގުމާ ހަވާލުވެ ހުންނެވި ފިނޭންސް މިނިސްޓްރީގެ ސްޓޭޓް މިނިސްޓަރު މުހައްމަދު އަޝްމަލީ ސޮއިކުރެއްވި އިރު ގައުމީ ކުތުބުހާނާގެ ފަރާތުން ސޮއިކުރެއްވީ އިބްރާހިމް ޝިޔާމު އެވެ.
އެ ބައްދަލުވުމުގައި ވާހަކަފުޅު ދައްކަވަމުން އިބްރާހިމް ޝިޔާމު ވިދާޅުވީ ތަރުބަވީ މުޖުތަމައުއެއް ގާއިމު ކުރުމަކީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ވަރަށް ބޮޑު ސިޔާސަތެއް ކަމަށެވެ. އެހެންކަމުން އިލްމީ މައުލޫމާތުތައް ވީހާ ވެސް ފުޅާ ދާއިރާއެއްގައި ފޯރުވުމަކީ ތަރުބަވީ މުޖުތަމައުއެއް ބިނާކުރުމަށް ޓަކައި ވަރަށް މުހިއްމު ކަމެއް ކަމަށް ވެސް އޭނާ ވިދާޅުވި އެވެ.
ޑިޖިޓަލް ލައިބްރަރީއެއް ގާއިމް ކުރުމުގެ އެއްބަސްވުމުގައި ސޮއިކުރައްވަނީ: ފޮޓޯ/ އެލްޖީއޭ
"ހަގީގަތުގައި އެޑިއުކޭޝަން ދާއިރާ އިން އެބޭފުޅުން މަސައްކަތް ކުރައްވަން ބޭނުންފުޅުވާއިރުގައި އަޅުގަނޑުމެންގެ ލައިބްރަރީތަކަކީ އާންމުންނަށް މައުލޫމާތު ފޯރުކޮށްދިނުމުގައި ވަރަށް މުހިއްމު ރޯލެއް އަދާ ކުރެވިދާނެ ދާއިރާތަކެއް. އިރާދަކުރެއްވިއްޔާ އަޅުގަނޑުމެންގެ އޮންލައިން ލައިބުރަރީގެ ހިދުމަތްތައް ފުޅާވެގެންދާ އިރު ދީނީ އިލްމީ ދާއިރާތަކާ ބެހޭ މައުލޫމާތު އިރާދަކުރެއްވިއްޔާ ލިބިގެންދާނެ،" ޝިޔާމު ވިދާޅުވި އެވެ.
އެލްޖީއޭ އިން ބުނީ ޑިޖިޓަލް ލައިބުރަރީގެ ބޭނުމަކީ ކިޔުންތެރިކަމަށް ޝައުޤުވެރި ކުރުމަށް ޓަކައި ލައިބްރަރީ ދާއިރާ މެދުވެރިކޮށް ޢިލްމީ މަޢުލޫމާތު ފޯރުކޮށްދިނުމާއި ކައުންސިލްތައް މެދުވެރިކޮށް ރައްޔިތުންނަށް އޮންލައިން ލައިބްރަރީގެ ޚިދުމަތް ފޯރުކޮށްދިނުން ކަމަށެވެ. ސްކޫލްތަކާއި ތަޢުލީމްދޭ މަރުކަޒުތަކަށް ބޭނުންވާނެ ޢިލްމީ މަޢުލޫމާތު އޮންލައިންކޮށް ލިބޭނެ މަގުފަހިކުރުމަށް މަސައްކަތް ކުރުމަކީ ވެސް އެ ލައިބުރަރީގެ ބޭނުމެއް ކަމަށް އެލްޖީއޭ އިން ބުންޏެވެ.
މިއަދު ސޮއިކުރި އެއްބަސްވުމުގެ ދަށުން އެލްޖީއޭގެ ދައުރަކީ އެ އިދާރާގެ ވިއުގަ މެދުވެރިކޮށް ކައުންސިލްތަކަށް އޮންލައިން ލައިބްރަރީގެ ޚިދުމަތް ފޯރުކޮށްދިނުމެވެ.