ވ. ތިނަދޫ ކައުންސިލުގެ ރައީސް ޝުޖާއު އަލީގެ ގޮނޑި ގޮނޑި ގެއްލިއްޖެ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ)އިން ނިންމި މައްސަލަ ކޯޓަށް ހުށަހަޅަން ނިންމައިފައިވާ ކަމަށް ކުރީގެ ރައީސް އަދި އެމްޑީޕީގެ ޗެއާޕާސަން މުހައްމަދު ނަޝީދު މިއަދު ވިދާޅުވެއްޖެއެވެ.
ޕާޓީ ބަދަލުކުރި މައްސަލައިގައި ޝުޖާއުގެ މަގާމު ގެއްލިއްޖެ ކަމަށް އެލްޖީއޭއިން ކަނޑައެޅީ މިދިޔަ ބުރާސްފަތި ދުވަހެވެ.
މިއަދު އޮތް ނޫސްވެރިންގެ ބައްދަލުވުމެއްގައި އެ މައްސަލައާ ގުޅޭ ގޮތުން ނަޝީދު ވިދާޅުވީ ޝުޖާއު ވަކިކުރީ ގާނޫނާ ޚިލާފަށް ކަމަށާއި އެއީ އެމްޑީޕީގެ ވަރަށް ބޮޑު ކަންބޮޑުވުމެއް ކަމަށެވެ. އަދި އޭނާ ވަކިކުރީ ލާމަރުކަޒީ މަގާމުގެ މާއްދާއަކަށް ރިއާޔަތްކޮށްފައި ކަމަށްވީ ނަމަވެސް، އެ މާއްދާގެ ދަށުން އޭނާ ވަކިނުކުރެވޭނެ ކަމަށް އެ މަނިކުފާނު ވިދާޅުވިއެވެ.
އެހެންވީމާ އެކަމާ ގުޅިގެން ޕާޓީގެ ފަރާތުން ޝަރީއަތަށް ދިޔުމަށް މިހާރު ވަނީ ނިންމައިފައި އެހެންވީމަ ޕާޓީގެ ވަކީލުން މިހާރު އެކަމުގެ މަސައްކަތް ކުރަމުން އެބަގެންދޭ
އެމްޑީޕީގެ ޗެއާޕާސަން މުހައްމަދު ނަޝީދު
ދަ ޑިމޮކްރެޓްސްގެ ޓިކެޓުގައި ތިނަދޫގެ ރައީސަކަށް އިންތިޚާބުވި ޝުޖާއު އެމްޑީޕީއަށް ބަދަލުވުމުން، މީގެ މަހެއްހާ ދުވަސް ކުރިން އެލްޖީއޭއިން ވަނީ އޭނާ މަގާމުން އެކަހެރިކޮށްފައެވެ. އެހެންވެ، އެލްޖީއޭގެ ބޯޑުން ވަކި ގޮތެއް އަންގަންދެން ޝުޖާއު އެ މަގާމުން އެކަހެރިކޮށް، ގޭގައި މަޑުކުރަން ވަނީ އޭރު އަންގާފައެވެ.
އޭގެ ފަހުން މިދިޔަ ހަފުތާގައި އޭނާގެ ގޮނޑި ގެއްލިފައިވަ ކަމަށް އެލްޖީއޭއިން ވަނީ ކަނޑައަޅައިފައެވެ. އަދި ތިނަދޫ ކައުންސިލްގެ ހިންގުން ވަނީ ވަގުތީ ގޮތުން ކައުންސިލްގެ ނައިބާ ހަވާލުކޮށްފައެވެ.
އެ މައްސަލައިގައި ޝުޖާއު، 'ސަން'އަށް ވިދާޅުވީ ދިމާވެގެން އުޅެނީ ގާނޫނުގައި ނެތް ހާލަތެއް ކަމަށާއި، އޭނާ މަގާމުން ވަކިކުރަން އެލްޖީއޭއިން ނިންމީ އިޖުރާއަތުތައް ފުރިހަމަނުކޮށް، ގާނޫނު ރަނގަޅަށް ނުބަލާ ކަމަށެވެ. ހަމަ އެހެންމެ، އިލެކްޝަންސް ކޮމިޝަނުން ބައި-އިލެކްޝަނަށް ހުޅުވާލައިފިނަމަ އަލުން ވާދަކޮށް މަގާމު އަލުން ހޯދާނެ ކަމަށް އޭނާ ވަނީ ވިދާޅުވެފައެވެ.