ލަންޑަން (މޭ 9): އިނގިރޭސިވިލާތަކީ މިހާރުވެސް ބޮޑު ބާރެއް ކަމަށާއި ނަމަވެސް މުސްތަގްބަލްގައި މިއަށްވުރެ ބޮޑު ބާރަކަށް އިނގިރޭސި ދައުލަތް ހައްދަވާނެ ކަމަށް އެގައުމުގެ އާންމު އިންތިޚާބު ކާމިޔާކުރި ކޮންޒަވެޓިވް ޕާޓީގެ ލީޑަރު ޑޭވިޑް ކެމަރަން ވިދާޅުވެއްޖެ އެވެ.
ހައިރާން ކުރުވަނިވި ނަތީޖާއަކުން އިނގިރޭސި އާންމު އިންތިޚާބު ކާމިޔާބު ކުރެއްވުމަށްފަހު އަލުން އެނބުރި ބޮޑުވަޒީރުގެ އޮފީހަށް (ޓެން ޑައުނިންގް ސްޓްރީޓް)އަށް ވަޑައިގެން ދެއްވި ބަޔާނެއްގައި ކެމަރަން ވިދާޅުވީ، އޭނާ ލީޑްކުރައްވަނީ އެކަތި ގަނޑަކަށްވެފައިވާ ބާރުގަދަ އުންމަތެއް ކަމަށާއި ނަމަވެސް މިއަށްވުރެ ހުރިހާ ގޮތަކުންވެސް ބާރުގަދަ އުންމަތަކަށް އިނގިރޭސިދައުލަތް ހައްދަވާނެ ކަމުގައެވެ.
އިންތިޚާބު ކާމިޔާބު ކުރެއްވުމާ ގުޅިގެން ކެމަރަން ވަނީ އިނގިރޭސި ރާނީ އެލިޒަބަތު ދެވަނައިގެ އަރިހަށް ވަޑައިގެން އޭނާއާ ބައްދަލުކުރައްވާފައެވެ. އެލިޒަބަތު ވަނީ ބޮޑުވަޒީރުކަމުގެ އައު ދައުރަކަށް ކެމަރަން ޢައްޔަން ކުރެއްވުމަށް ނިންމަވާފައެވެ.
މިދިޔަ ބުރާސްފަތި ދުވަހު ބޭއްވި އިނގިރޭސި ޕާލަމެންޓްރީ އިންތިޚާބުގައި އިދިކޮޅު ލޭބަރ ޕާޓީއާއި ލިބަރަލް ޑިމޮކްރެޓިކް ޕާޓީއާއި އެނޫންވެސް ކޮންޒަަވެޓިވް ޕާޓީގެ ވާދަވެރި ޕާޓީތަކަށްވަނީ ގިނަ ގޮނޑިތަކެއް ގެއްލި ހީނުކުރެވޭ ވަރުގެ ނާކާމިޔާބީއަކާ ކުރިމަތިލާންޖެހިފައެވެ. ނަމަވެސް ސްކޮޓްލޭންޑްގެ ގައުމީ ޕާޓީވަނީ ކުރިން ހޯދާފައިނުވާ ވަރުގެ ކާމިޔާބީއެއް ހޯދާފައެވެ.
އިނގިރޭސި ޕާލަމެންޓަށް 650 މެންބަރުން އިންތިޚާބުކުރުމަށް އިއްޔެ ބޭއްވި އާންމު އިންތިޚާބުގެ ވޯޓުތައް ގުނަމުންދާއިރު މިހާތަނަށް ގުނާފައިވާ ވޯޓުތަކުން ކޮންޒަވެޓިވް ޕާޓީއަށް 327 ގޮނޑި ކާމިޔާބު ކުރެވިފައިވާއިރު އިދިކޮޅު ލޭބަރ ޕާޓީއަށް ކާމިޔާބު ކުރެވިފައިވަނީ 232 ގޮނޑިއެވެ. އަދި ލިބަރަލް ޑިމޮކްރެޓިކް ޕާޓީއަށް 8 ގޮނޑި ކާމިޔާބު ކުރެވިފައިވާއިރު ސްކޮޓްލޭންޑްގެ ގައުމީ ޕާޓީއަށް ކާމިޔާބު ކުރެވިފައިވަނީ 56 ގޮނޑިއެވެ. ބާކީ ގޮނޑިތައް ކާމިޔާބު ކޮށްފައިވަނީ އެހެން ކުދި ޕާޓީތަކަށެވެ. މީގެތެރޭގައި ގްރީން ޕާޓީއާއި ވޭލްޒް ޕާޓީފަދަ ޕާޓީތައް ހިމެނެއެވެ.
ގާތްގަނޑަކަށް 64 މިލިޔަން މީހުންގެ އާބާދީއެއް އޮންނަ އިނގިރޭސިވިލާތުގެ ޕާލަމެންޓް ކަމަށްވާ ހައުސް އޮފް ކޮމަންސަށް 650 މެންބަރުން އިންތިޚާބުކުރުމަށާއި އެގައުމުގެ ލޯކަލް ކައުންސިލްތަކަށް މެންބަރުން އިންތިޚާބު ކުރުމަށް ބޭއްވި އިންތިޚާބުގެ މިނަތީޖާއަށް ބަލާއިރު ކޮންޒަވެޓިވް ޕާޓީއަށްވަނީ ކޯލިޝަން އަކާނުލައި ވެރިކަން ކުރެވޭވަރަށް ޕާލަމެންޓްގެ ފުރިހަމަ އަޣްލަބިއްޔަތު ލިބިފައެވެ.
2010 ވަނަ އަހަރު އުފެއްދި ޑޭވިޑް ކެމަރަންގެ ފުރަތަމަ ސަރުކާރަކީ ދެވަނަ ބޮޑުހަނގުރާމައަށްފަހު އިނގިރޭސިވިލާތުގައި އުފެއްދި ފުރަތަމަ ކޯލިޝަން ސަރުކާރެވެ.
ބުރާސްފަތި ދުވަހު ބޭއްވި އިންތިޚާބަށް ދެތިން ދުވަސްވެފައި ވަނިކޮށް ނެގި ޚިޔާލު ހޯދުމުގެ ސާވޭއެއްގެ ނަތީޖާ ދައްކާގޮތުން ބޮޑު ދެޕާޓީކަމަށްވާ ކޮންޒަވެޓިވް ޕާޓީއާއި ލޭބަރ ޕާޓީއަށްވެސް ރައްޔިތުންގެ ތާއީދުއޮތީ ދާދި އެއްވަރަކަށެވެ. އެއީ 35 އިންސައްތައެވެ. ނަމަވެސް ހައިރާން ކުރުވަނިވި ގޮތަކަށް ބޮޑުތަފަތާތަކުން ކޮންޒަވެޓިވްޕާޓީ މިވަނީ އިންތިޚާބު ކާމިޔާބުކޮށްފައެވެ.
ކެމަރަންގެ ކޮންޒަވެޓިވް ޕާޓީގެ ވެރިކަމުގައި އިނގިރޭސިވިލާތުގެ އިގްތިސާދު ރަނގަނޅު ނުވުމުގެ އިތުރުން ތަކެތީގެ އަގުތައްވެސް ވަނީ މައްޗަށް ގޮސްފައެވެ. އަދި ކެމެރަންގެ ސަރުކާރުން ގެންގުޅުނު ޚަރަދު ކުޑަކުރުމުގެ ސިޔާސަތު ތަކުގެ ސަބަބުން ރައްޔިތުންނަށް ދިރިއުޅުމުގެ ފެންވަރު އިތުރަށް ރަނގަނޅު ކޮށްނުދެވުމުގެ އިތުރުން ރައްޔިތުންނަށްވަނީ ބޮޑެތި ދަތިތަކެއްވެސް ކުރިމަތިވެފައެވެ. ނަމަވެސް ކެމަރަންގެ ވެރިކަމުގައި ބޭކާރު ހަނގުރާމަ ތަކުގައި އިނގިރޭސި ދައުލަތް ބައިވެރިކޮށް ގައުުމުގެ ޚާޒާނާ ބޭކާރު ގޮތުގައި ހަނގުރާމައަށާއި ތަޅާފޮޅުންތަކަށް ޚަރަދު ކޮށްފައިނުވުމަކީ އޭނާގެ ސިޔާސަތުތައް ވައިގާ ހިފި ސަބަބެއް ކަމަށް މުޙައްލިލުން ސިފަކުރެއެވެ.
މީގެއިތުރުން އެހެންގައުމުތަކުގެ މީހުން އިނގިރޭސިވިލާތަށް ހިޖްރަ ކުރުމާ ދެކޮޅަށް ކެމަރަން ގެންގުޅުއްވާ ސިޔާސަތަށް ތާއީދުކުރާމީހުންގެ ނިސްބަތް ބޮޑުވަމުން ދިޔުމާއި ކޯލިޝަނަކާ ނުލައި އެއްޕާޓީއަކަށް ވެރިކަން ކުރެވޭވަރަށް އެޕާޓީއަކަށް ތާއީދު ދިނުމުގެ މުހިއްމުކަން ގިނަ ބަޔަކަށް އިޙްސާސް ކުރުވުމަކީވެސް ކެމަރަންގެ ކާމިޔާބީއެއް ކަމަށްވަނީ ބެލެވިފައެވެ. (ރޮއިޓާސް)