އިނގިރޭސި ބޮޑުވަޒީރުކަމުގެ މަގާމުގައި ހުންނެވި ޑޭވިޑް ކެމެރަން އޭނާގެ އިސްތިއުފާ މިއަދު ރާނީ އެލިޒަބަތުއަށް ހުށަހަޅުއްވުމުން ރަސްމީކޮށް އިސްތިއުފާ ގަބޫލު ކުރައްވައި ބޮޑުވަޒީރުކަމުގެ މަގާމަށް އިނގިރޭސި ސަރުކާރުގެ ހޯމް ސެކްރެޓަރީ ތެރީސާ މޭ ހަމަޖައްސަވައިފި އެވެ.
މިއަދުގެ ވަގުތެއްގައި ކެމެރަންގެ އާއިލާއާ އެކު ބަކިންހަމް ޕެލަސްގައި ބޭއްވި ބައްދަލުވުމުގައި ކެމެރަންގެ އާއިލާއާއެކު ވަޑައިގެން ކެމެރަން ވަނީ ރަނީގެ އަތްޕުޅަށް ވަޒީރުކަމުގެ ފަތްކޮޅު އަރުއްވާފަ އެވެ.
ކެމެރަން އިސްތިއުފާ ހުށަހެޅުއްވި ފަހުން ތެރީސާ ވަނީ ބަކިންގްހަމް ޕެލަސްއަށް ވަޑައިގެން މަގާމާ ރަސްމީކޮށް ހަވާލުވެ ވަޑައިގެންފަ އެވެ. އެކަން ބަކިންހަމް ޕެލަސްއިން ޔަގީންކޮށްދެ އެވެ.
މިއީ އިނގިރޭސި "ދަގަނޑު އަންހެނާ" މާގަރެޓް ތެޗާއަށް ފަހު އިނގިރޭސި ވިލާތުގެ ބޮޑުވަޒީރުކަމުގެ މަގާމަށް އަންހެން ބޭކަނބަލު އައި ފުރަތަމަ ފަހަރެވެ. މާގަރެޓް ތެޗާ ބޮޑުވަޒީރުކަން ކުރެއްވީ 1979 ވަނަ އަހަރުން 1990 ވަނަ އަހަރުގެ ނިޔަލަށެވެ.
އިނގިރޭސި ބޮޑުވަޒީރުކަމުގެ މަގާމުގައި ހުންނެވި ޑޭވިޑް ކެމެރަން އޭނާގެ އިސްތިއުފާ މިއަދު ރާނީ އެލިޒަބަތުއަށް ހުށަހެޅުއްވުމަށް ފަހު އާއިލާއާއެކު -- ފޮޓޯ//އޭޕީ
ކެމެރަން އިނގިރޭސި ބޮޑުވަޒީރުކަމުން އިސްތިއުފާ ދެއްވަން ނިންމީ، ވިލާތުގެ އިއްތިހާދުން އިނގިރޭސި ވިލާތް ވަކިވުމަށް ނިންމި މައްސަލާގައި ރައްޔިތުންގެ ނިންމުމަށް އިހްތިރާމު ކުރުމުގެ ގޮތުންނެވެ. ކެމެރަންއަކީ އިނގިރޭސިން އީޔޫއިން ވަކިވުމާ ދެކޮޅަށް ވަކާލާތު ކުރެއްވި ބޭފުޅެކެވެ. ނަމަވެސް އިނގިރޭސި ރައްޔިތުންގެ މެދުގައި ނެގި ފެންނަ ނުފެންނަ ވޯޓުގެ ނަތީޖާ ދެއްކި ގޮތުން މެޖޯރިޓީ ވޯޓު ލިބުނީ އިނގިރޭސި ވިލާތް އީޔޫއިން ވަކިވުމަށެވެ.
ތެރީސާ މޭ އިނގިރޭސި ޕާލަމެންޓަށް އެންމެ ފުރަތަމަ ފަހަރަށް ހޮވިވަޑައިގަތީ 1997 ވަނަ އަހަރު އެވެ. އޭނާ ހޯމް ސެކްރެޓަރީގެ މަގާމަށް އައްޔަނު ކުރެވިގެން ދިޔައީ 2010 ވަނަ އަހަރު އެވެ. އޭނާއަކީ ހޯމް ސެކްރެޓަރީގެ މަގާމު އެންމެ ގިނަ ދުވަހު އަދާކުރެއްވި ފަރާތެވެ.
ކެމެރަން އިސްތިއުފާ ދެއްވުމަށް ނިންމުމާ ގުޅިގެން ބޮޑުވަޒީރުގެ މަގާމަށް ކުރިމަތިލެއްވުމަށް ޝައުގުވެރިވެ ވާދަކުރެއްވީ ތެރީސާގެ އިތުރުން އިނގިރޭސި ހަކަތައާ ބެހޭ މިނިސްޓަރު އެންޑިއާ ލީޑްސަން އެވެ. ނަމަވެސް މިއަދު އެންޑްރިއާ ވަނީ އޭނާގެ ޝައުގުވެރިކަން އަނބުރައި ގެންގޮސް، ތެރީސާއާ އެކު މަސައްކަތް ކުރައްވާނެ ކަމަށް ވިދާޅުވެފަ އެވެ.