އިނގިރޭސި ބޮޑުވަޒީރުކަމުގެ މަގާމުން އިސްއިތުފާދެއްވި ޑޭވިޑް ކެމެރަން އިނގިރޭސި ވިލާތުގެ ގާނޫނު ހަދާ މަޖިލީހުން ވެސް އިސްތިއުފާ ދެއްވައިފި އެވެ.
އިނގިރޭސިވިލާތުގެ ގާނޫނު ހަދާ މަޖިލީހުގައި ވިޓްނީ ދާއިރާގެ މެމްބަރުކަން 2001 ވަނަ އަހަރުން ފެށިގެން ކުރައްވަމުން ގެންދެވި ކެމެރަން އެ މަގާމުން އިސްތިއުފާ ދެއްވީ މިއަދު އެވެ.
ނޫސްވެރިންނާ ބައްދަލުކުރައްވައި ކެމެރަން ވިދާޅުވީ، އެ ނިންމުމަކީ އޭނާއަށް ވަރަށް ދިގު އަދި އުދަނގޫ ނިންމުމެއް ކަމަށެވެ. ނަމަވެސް އިސްތިއުފާ ދެއްވަން ނިންމެވީ މިހާރުގެ ސަރުކާރުގެ މަސައްކަތަށް "އުދަނގުލަކަށް" ވާން ބޭނުން ނުވާތީ ކަމަށެެވެ.
"އަހަރެން ދެކޭ ގޮތުގައި ޒަމާނީ ސިޔާސީ ކަންކަމާއި އިސްތިއުފާ ދިނުމުން ކުރިމަތިވި ކަންކަމާ އެކު ކުރީގެ ބޮޑުވަޒީރުގެ ގޮތުގައި ސަރުކާރާ އެއްކޮޅު މަޖިލިސް މެންބަރެއްގެ ގޮތުގައި ހުރުމަކީ އެދެވޭ ކަމެއް ނޫން. އެ މަގާމުގައި ހުރެ ކުރާ ހުރިހާ ކަމަކީ ސަރުކާރުން ގައުމަށް ގެންނަން ބޭނުންވާ ކަންތައްތައް ގެނައުމަށް ބޮޑު އުނދަގުލެއް އަދި ބޮޑު ބަދަލުތަކެއް އަތުވެދާނެ ކަމެއް ކަމުގައި އަހަރެން ދެކެން،" ކެމަރަން ވިދާޅުވި އެވެ.
އޭނާ ވިދާޅުވީ، އެ ނިންމެވުން ބޮޑުވަޒީރުކަމުގެ މަގާމުގައި މިހާރު ހުންނެވި ތެރީސާ މޭ އަށް ހުށަހަޅުއްވާފައިވާ ކަމަށެވެ. އަދި އޭނާގެ ނިންމެވުން ތެރީސާ މޭ ގަބޫލުފުޅުކުރައްވާފައިވާ ކަމަށް ވިދާޅުވި އެވެ. އަދި މަޖިލިސް މެމްބަރުކަން ކެމެރަން އިސްތިއުފާ ދެއްވަމުން އޭނާ ތަމްސީލުކުރައްވާ ދާއިރާގެ ބައި އިލެކްޝަނެއް ބާއްވަން ޖެހޭނެ އެވެ.
ކެމެރަން މިއަދު އިސްތިއުފާ ދެއްވި ނަމަވެސް މީގެ ކުރިން އޭނާ ވަނީ ކުރިއަށް އޮތް އާއްމު އިންތިހާބަކާ ހަމައަށް މަޖިލިސް މެމްބަރެއްގެ ގޮތުގައި ހުންނަވާނެ ކަމަށް ވިދާޅުވެފަ އެވެ.
އިނގިރޭސި ބޮޑުވަޒީރުކަމުގެ މަގާމުން މިދިޔަ ޖޫން މަހުގެ ތެރޭގައި ކެމެރަން އިސްތިއުފާ ދެއްވަން ނިންމީ، ވިލާތުގެ އިއްތިހާދުން އިނގިރޭސި ވިލާތް ވަކިވުމަށް ނިންމި މައްސަލާގައި ރައްޔިތުންގެ ނިންމުމަށް އިހްތިރާމު ކުރުމުގެ ގޮތުންނެވެ.
ކެމެރަންއަކީ އިނގިރޭސިން އީޔޫއިން ވަކިވުމާ ދެކޮޅަށް ވަކާލާތު ކުރެއްވި ބޭފުޅެކެވެ. ނަމަވެސް އިނގިރޭސި ރައްޔިތުންގެ މެދުގައި ނެގި ފެންނަ ނުފެންނަ ވޯޓުގެ ނަތީޖާ ދެއްކި ގޮތުން މެޖޯރިޓީ ވޯޓު ލިބުނީ އިނގިރޭސި ވިލާތް އީޔޫ އިން ވަކިވުމަށެވެ.