ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ގާނޫނާ ޚިލާފަށް ހައްޔަރު ކުރި މައްސަލާގައި އެމްއެންޑީއެފްގެ ކުރީގެ ކާނަލް މުހައްމަދު ޒިޔާދުގެ މައްޗަށް ދައުލަތުން ކުރި ޓެރަރިޒަމްގެ ދައުވާ ސާބިތު ނުވާ ކަމަށް ކްރިމިނަލް ކޯޓުން މިރޭ ހުކުމްކޮށްފި އެވެ.
މައްސަލަ ބެއްލެވި ތިން ފަނޑިޔާރުންގެ އިއްތިފާގުން މިރޭ އިއްވި ހުކުމްގައި ވަނީ އެ މައްސަލާގައި ޒިޔާދު އަމަލުކޮށްފައި ވަނީ އެފަދަ މަގާމެއްގައި ހުރެ އެމްއެންޑީއެފްގެ އޮޕަރޭޝަންތަކުގައި އަމަލުކުރަންޖެހޭ އުސޫލުގެމަތިން ކަމަށެވެ. އަދި އެފަދަ ޖަރީމާއެއް ހިންގުމުގެ ނިޔަތެއް ޒިޔާދުގެ ކިބައިގައި އޮތްކަން އެނގެން ނެތް ކަމަށް ވެސް އެ ހުކުމްގައި ވެއެވެ.
ޒިޔާދުގެ މައްޗަށް ޓެރަރިޒަމްގެ ދައުވާ ސާބިތުނުވާ ކަމަށް ހުކުމް އިއްވާފައިވާއިރު، ކުރީގެ ޗީފް އޮފް ޑިފެންސް ފޯސް އަދި މިހާރުގެ ޑިފެންސް މިނިސްޓަރު މޫސާ އަލީ ޖަލީލުގެ މައްޗަށް ވެސް ކުށް ސާބިތުނުވާ ކަމަށް ވެސް ވަނީ ހުކުމް ކޮށްފަ އެވެ.
އަބްދުﷲ ގާޒީ ހައްޔަރު ކުރި މައްސަލާގައި ދައުލަތުން ކުރި ޓެރަރިޒަމްގެ ދައުވާ ސާބިތުވެފައި ވަނީ ކުރީގެ ރައީސް ނަޝީދާއި ކުރީގެ ޑިފެންސް މިނިސްޓަރު ތޮލްހަތު އިބްރާހީމް ކަލޭފާނުގެ މައްޗަށެވެ. އެ ދެ ބޭފުޅުންގެ ތެރެއިން ރައީސް ނަޝީދު 13 އަހަރަށް އަދި ތޮލްހަތު 10 އަހަރަށް ޖަލަށްލުމަށް ވަނީ ހުކުމް އިއްވާފަ އެވެ.