ގދ. ތިނަދޫގައި ހުޅުޖެހިމައްސަލަ ކްރިމިނަލް ކޯޓުން އަނބުރާ ފޮނުވާލި ފޮނުވާލުން ހައިކޯޓުން މިއަދު ބާތިލްކޮށްފި އެވެ.
ހައިކޯޓުން މިއަދު ކުރި ހުކުމްގައި ވަނީ ކޯޓުތަކަށް ހުށަހެޅިފައިވާ ޖިނާއީ މައްސަލަތަކާ ގުޅިގެން ފުރިހަމަކުރަންޖެހޭ އެހެނިހެން ކަންތައްތައް ފުރިހަމަކުރުމަށް އެކަށީގެންވާ ވަގުތު ދޭންޖެހޭނެ ކަމަށެވެ. އަދި އެފަދަ ކަންތައް ފުރިހަމަކުރުމަށް އެކަށީގެންވާ ވަގުތު ނުދީ ޖިނާއީ މައްސަލަތައް އަނބުރާ ފޮނުވާ ނުލެވޭނެ ކަމަށް ވެސް ހައިކޯޓުގެ ހުކުމްގައި ވަނީ ކަނޑައަޅާފައެވެ.
އެ ހުކުމްގައި ވަނީ ސިލްސިލާ އަޑުއެހުންތަކެއްގެ ގޮތަށް ތިނަދޫ މައްސަލަ ތާވަލްކޮށްފައިވާއިރު، ކުރިން ތާވަލްކޮށްފައިވާ ގޮތަށް އެއްވެސް ބަދަލެއް ގެންނަ ނަމަ، އެ ބަދަލެއް ގެންނަންވާނީ ޕީޖީ އޮފީހާއެކު މަޝްވަރާކުރުމަށްފަހު ކަމަށެވެ.
ބަންދު ދުވަހެއްގައި މައްސަލަ ތާވަލްކުރުމުން އެދުވަހު ވަކީލަކު ހަމަޖެއްސެން ނެތް ކަމަށް ޕީޖީ އޮފީހުން ކްރިމިނަލް ކޯޓަށް އެންގުމަކީ އެ މައްސަލައިގެ ޝަރީއަތް ހިންގުމަށް އެ އޮފީހުން އެއްބާރުލުން ނުދިނުން ކަމަށް ނުބެލެވޭނެ ކަމަށް ވެސް ހައިކޯޓުގެ ހުކުމްގައި ވެއެވެ.
އެ ހުކުމްގައި ވަނީ އިދާރީގޮތުން ހަމަޖައްސަން ޖެހޭ ކަމެއް ހަމަނުޖެހި އަދި ހަމަޖައްސަން ވަގުތު ނުދީ މައްސަލަ އަނބުރާ ފޮނުވާލެވޭނެ ކަމަށް ބަޔާންކުރާ އެއްވެސް ގާނޫނެއް ގަވާއިދެއް ނެތް ކަމަށެވެ.
date_range
ހޮނިހިރު 28 ޑިސެމްބަރ 2024