ތިނަދޫ މައްސަލަ ބޭރުކޮށްލުމުން ހުށަހެޅި މައްސަލައިގެ އަޑުއެހުންތައް ނިންމާލައިފި

ގދ. ތިނަދޫގައި ހުޅުޖެހި މައްސަލަ ކްރިމިނަލް ކޯޓުން ބޭރުކޮށްލުމުން ދައުލަތުގެ ފަރާތުން އިސްތިއުނާފު ކުރި މައްސަލައިގެ އަޑުއެހުންތައް ނިންމާލައިފިއެވެ.

މިއަދުގެ ޝަރީއަތުގެ މަޖިލީސް ނިންމަވާލެއްވިއިރު ފަނޑިޔާރުންގެ ބެންޗުން ބުނީ އިތުރުކަމެއް ސާފުކުރަން ނުޖެހޭނަމަ ދެންއޮންނަ ޝަރީއަތުގެ މަޖިލީހެއްގައި އޮންނާނީ އެ މައްސަލައިގެ ހުކުމް އިއްވުން ކަމަށެވެ.

މިއަދުގެ ޝަރީއަތުގެ މަޖިލީހުގައި މައްސަލަ ހުށަހަޅުއްވަމުން ދައުލަތުގެ ވަކީލާ، ޕަބްލިކް ޕްރޮސިކިއުޓާ ޝަމްރާ ޝަމީމް ވިދާޅުވީ ކްރިމިނަލް ކޯޓުން އެ މައްސަލަ ބޭރުކޮށްލާފައި ވަނީ ވަކީލު ހާޒިރުކުރުމާއި ހެކީން ހާޒިރުކުރުމުގައި ދައުލަތުން އިހުމާލުވެފައިވާތީ ކަމަށް ބުނެ ކަމަށެވެ. އެހެންނަމަވެސް އެ މައްސަލައިގެ ހެކިބަސް ނަގަން ތާވަލްކުރި ދެ ދުވަހަށް ވެސް ދައުލަތުގެ ފަރާތުން ހެކީން ހާޒިރުކޮށްދީފައިވާ ކަމަށް ޝަމްރާ ވިދާޅުވިއެވެ.

އޭނާ ވިދާޅުވީ ކްރިމިނަލް ކޯޓުން އެ މައްސަލަ ބޭރުކޮށްލާފައި ވަނީ ކޯޓަށް މީހުން ހާޒިރުކުރުމުގައި އަމަލުކުރަންވީގޮތުގެ ގަވާއިދިުގެ 29 ވަނަ މާއްދާއާ ޚިލާފަށް ކަމަށެވެ. އެ ގަވާއިދުގައި ވާގޮތުން މައްސަލަ އަނބުރާ ފޮނުވާލެވޭނީ ކޯޓަށް ހާޒިރުވުމުގެ އަމުރު ހަވާލުކޮށްފައިވަނިކޮށް، މަގުބޫލު އުޒުރެއްނެތި ދައުވާ ކުރާ ފަރާތުން ކޯޓަށް ހާޒިރުނުވާނަމަ ކަމަށް ވެސް ދައުލަތުގެ ވަކީލާ ވިދާޅުވިއެވެ.

އެ މައްސަލަ ބޭރުކޮށްލާފައި ވަނީ ކޯޓަށް އެއްބާރުލުން ދެމުންދަނިކޮށް، ބަންދު ދުވަހެއްގައި ތާވަލްކުރި ޝަރީއަތުގެ މަޖިލީހަށް ވަކީލުން ހާޒިރުކުކޮށްދެވެން ނެތް ކަމަށް އެންގުމުން ކަމަށް ޝަމްރާ ވިދާޅުވިއެވެ.

އެ މައްސަލައިގެ ތެރެއަށް ދެ މީހަކު ވަނީ ތަދައްޚުލްވެފައެވެ. އެއީ ގދ. ތިނަދޫ އުޖާލާއާގޭ މުޙައްމަދު ޖިނާހު އަލީ އާއި އެރަށު ގްރީންވިލާ ޔޫޝައު އިސްމާއީލް އަޒީޒެވެ.

އެ ދެ މީހުންގެ ގާނޫނީ ވަކީލު ހިސާން ހުސައިން ވިދާޅުވީ އެ މައްސަލަ ބޭރުކޮށްލާފައި ވަނީ ކްރިމިނަލް ކޯޓުން އެކުލަވާލާފައިވާ އުސޫލެއްގެ 14 ވަނަ މާއްދާގައިވާ ގޮތުގެމަތިން ކަމަށެވެ. އެ މާއްދާގައިވާގޮތުން ކޯޓުން ކަނޑައަޅާ ގޮތަށް އަމަލުނުކުރާ ދައުވާތައް އަނބުރާ ފޮނުވާލެވޭނެ ކަމަށް ބަޔާންކޮށްފައިވާ ކަމަށް ހިސާން ވިދާޅުވިއެވެ.

އޭނާ ވިދާޅުވީ ހެކީން ހާޒިރުކޮށްދިނުމުގައި އެއްބާރުލުންދޭ ކަމަށް ދައުލަތުން ބުނާއިރު މިހާތަނަށް ހާޒިރުކޮށްދެވިފައި ވަނީ އެންމެ ދެ ހެކީން ކަމަށެވެ. އަދި ދައުލަތުން ހަވާލާދީފައިވާ ގަވާއިދުގެ މާއްދާ އަކީ މަދަނީ މައްސަލަތަކުގައި އަމަލުކުރާ މާއްދާއެއް ކަމަށް ވެސް އޭނާ ވިދާޅުވިއެވެ.