ސީއީއޯގެ އިސްތިއުފާއާއެކު، އެންވީޑިއާގެ މުސްތަގުބަލާ މެދު އުފެދިފައިވާ ކަންބޮޑުވުންތަކަށް ޖަވާބުދިނުމަށް ބައްދަލުވުމެއް ބާއްވަނީ

އެންވީޑިއާގެ ކުރީގެ ސީއީއޯ ޖެންސަން ހުއާންގް ---

ޗިޕް އުފައްދާ ދުނިޔޭގެ އެންމެ ބޮޑު އެއް ކުންފުނި ކަމަށްވާ އެންވީޑިއާގެ ސީއީއޯ ޖެންސަން ހުއާންގް ކުއްލި ގޮތަކަށް މަގާމުން އިސްތިއުފާ ދެއްވުމާ ގުޅިގެން، އެ ކުންފުނީގެ މުސްތަގުބަލާ މެދު އިންވެސްޓަރުންގެ މެދުގައި އުފެދިފައިވާ ކަންބޮޑުވުންތަކަށް ޖަވާބުދިނުމަށް ބާއްވާ ފުރަތަމަ މާލީ ބްރީފިން މާދަމާ ބާއްވަން ތައްޔާރުވެއްޖެއެވެ.

ޗައިނާގެ ވިޔަފާރިވެރިއެއް ކަމަށްވާ އެލިސް ހުއާންގްއާ އެކު އޮތް ނަހަމަ ގުޅުމުގެ ހަގީގަތް ކުންފުނީގެ އިސްވެރިންނަށް އޮޅުވާލެއްވި ކަމުގެ ތުހުމަތުތަކާ އެކު، ހުއާންގް މަގާމުން އިސްތިއުފާ ދެއްވީ މިދިޔަ ބުރާސްފަތި ދުވަހުއެވެ. މި މައްސަލައިގައި އޭނާ ވަނީ އަނބިކަނބަލުންނަށާއި ކުންފުންޏަށް ބޭވަފާތެރިވެވުނު ކަމަށް އެއްބަސްވެ މައާފަށް އެދިވަޑައިގެންފައެވެ.

https://sun.mv/230548

ހުއާންގް އިސްތިއުފާ ދެއްވުމާ ގުޅިގެން އެންވީޑިއާގެ ވަގުތީ ސީއީއޯގެ މަގާމާ މިހާރު ހަވާލުވެވަޑައިގެން ހުންނެވީ އެ ކުންފުނީގެ ޗީފް ފައިނޭންޝަލް އޮފިސަރު ކޮލެޓް ކްރެސްއެވެ. އަދި ކުންފުންޏަށް ދާއިމީ ސީއީއޯއެއް ހޯދުމުގެ މަސައްކަތް ބޯޑުން މިހާރު ވަނީ ފަށާފައެވެ.

އިންވެސްޓަރުންގެ މެދުގައި އުފެދިފައިވާ ކަންބޮޑުވުންތަކަށް މާދަމާ ޖަވާބެއް ލިބޭނެ ---

މާދަމާ ބާޒާރު ބަންދުވުމަށްފަހު އާންމުކުރާ ތިންވަނަ ކުއާޓަރުގެ މާލީ ހިސާބުތަކާ އެކު ބާއްވާ މި ބްރީފިންގައި، ވޯލް ސްޓްރީޓްގެ މާހިރުން އެންމެ ބޮޑަށް ސަމާލުކަން ދޭނީ ހުއާންގް ނެތް ހާލަތެއްގައި އެންވީޑިއާއިން އޭއައި ޗިޕްގެ ބާޒާރުގައި ހޯދާފައިވާ ކުރިއެރުން ދެމެހެއްޓޭނެ ގޮތަކާ މެދުގައެވެ. މީގެ އިތުރުން ހުއާންގް އަލުން ކުންފުނީގެ އިސް މަގާމަކަށް ވަޑައިގަތުމުގެ ފުރުސަތެއް އޮތްތޯ ވެސް އިންވެސްޓަރުން ސުވާލު ކުރާނެ ކަމަށް ބެލެވެއެވެ.

އެންވީޑިއާއިން ލަފާކުރާ ގޮތުގައި ތިންވަނަ ކުއާޓަރުގައި އެ ކުންފުންޏަށް އާމްދަނީގެ ގޮތުގައި 108 ބިލިއަން ޑޮލަރު ލިބޭނެއެވެ. ނަމަވެސް މިދިޔަ އޮކްޓޯބަރު މަހު އެ ކުންފުނީގެ ހިއްސާގެ އަގު އެންމެ މައްޗަށް ދިޔަ ފަހުން، މިހާތަނަށް ހިއްސާގެ އަގު ވަނީ 32 އިންސައްތަ ވެއްޓިފައެވެ.

https://sun.mv/230438

މި ދަނޑިވަޅުގައި އިންވެސްޓަރުން އެންމެ ބޮޑަށް ބަލާނީ އެންވީޑިއާގެ އާ "ވޭރާ ރުބިން" ޑޭޓާ ސެންޓަރު ޕްލެޓްފޯމުން ކުންފުނީގެ އާމްދަނީއަށް ހިއްސާކުރާ މިންވަރާއި، އޯޕަންއޭއައި ފަދަ ކުންފުނިތަކާ އެކު ވެފައިވާ ބޮޑެތި މާލީ އެއްބަސްވުންތައް ކުރިއަށް ގެންދާނެ ގޮތަކާ މެދު ވަގުތީ ސީއީއޯ ކްރެސް ދެއްވާ ޔަގީންކަމަށެވެ.

comment ކޮމެންޓް