އެމެރިކާގެ ކެންޓަކީގެ އެކަހެރި ހިސާބެއްގައި ހުންނަ ވަންއައިޑާ ބެޕްޓިސްޓް އިންސްޓިޓިއުޓް (އޯބީއައި)ގެ ފިރިހެން ކުދިންގެ ދަނާލަށް ކޮންމެ ދުވަހަކު ވެސް އިރުއަރަނީ ބުރަ މަސައްކަތްތަކަކާ އެކުގައެވެ. އެ ސްކޫލުގެ ދަނޑުތަކުގައި ހައްދާ ދުންފަތުގެ މަސައްކަތުގައި ބޮޑެތި ކުދިން އަވަދިނެތި އުޅޭއިރު، ދަނާލުގެ ފާހާނާތައް ސާފުކުރުމުގެ ޒިންމާ ހަވާލުވެފައި އޮތީ އެ ތަނުގައި ހުރި އެންމެ ހަގު ކުއްޖާއަށެވެ. އެއީ އޭރު އުމުރުން އެންމެ ނުވަ އަހަރުގެ ކުޑަކުއްޖެކެވެ. އޭނާ ސާފުކުރަން ޖެހުނީ އެންމެ ފާހާނާއެއް ނުވަތަ ދެ ފާހާނާއެއް ނޫނެވެ. ސަތޭކައެއްހާ ފިރިހެން ކުދިން ބޭނުންކުރާ މުޅި ދަނާލުގެ ހުރިހާ ފާހާނާއެއް ކޮންމެ ދުވަހަކު ސާފުކުރުމަކީ އޭނާގެ ކޮނޑުގައި އެޅިފައި އޮތް ޒިންމާއެވެ.
ދުނިޔޭގެ އެންމެ އަގުބޮޑު ޓެކްނޮލޮޖީ ކުންފުނިތަކުގެ ތެރޭގައި ހިމެނޭ އެންވިޑިއާގެ ބާނީ ޖެންސެން ހުއާންގް، އުމުރުން ނުވަ އަހަރުގައި އެމެރިކާއަށް ހިޖުރަކުރުމަށް ފަހު ދަނާލުގެ ފާހާނާތައް ސާފުކުރި ކަމަށް ހުއާންގް ބުނެފައިވެއެވެ. އޭނާގެ ބޭބެއާ ހަވާލުކޮށްފައި އޮތީ ސްކޫލަށް އިތުރު އާމްދަނީ ހޯދުމަށް ހިންގި ދުންފަތް ދަނޑުގައި މަސައްކަތްކުރުމެވެ. އެ ދުވަސްވަރުގެ ހަނދާންތައް އާކުރަމުން ހުއާންގް ސިފަކުރި ގޮތުގައި، އެ މާހައުލަކީ ޖަލެއް ފަދަ ހަރުކަށި އުސޫލުތަކެއް އޮތް ތަނެކެވެ. އެހެން ކުދިން ފާހާނާ ބޭނުންކުރުމުގައި އިތުރަށް ފަރުވާތެރިވާނެ ނަމައޭ ހިތަށް އެރި ނަމަވެސް، ކުޑަވެސް ޝަކުވާއެއް ނެތި ކޮންމެ ދުވަހަކު އެ މަސައްކަތް ފުރިހަމަކުރިއެވެ.
ދުނިޔޭގައި އުފެދުނު އެންމެ ނުފޫޒުގަދަ ވިޔަފާރިވެރިންގެ ތެރޭގައި ހިމެނޭ ހުއާންގްގެ ދިރިއުޅުމުގެ މި ފެށުމަކީ، މިއަދު އާޓިފިޝަލް އިންޓެލިޖެންސް (އޭއައި) އާއި ޒަމާނީ ކޮމްޕިއުޓިންގެ ދާއިރާއިން އޭނާ ހޯދާފައިވާ ކާމިޔާބީއާ އަޅައި ބަލާއިރު ހައިރާންކުރުވަނިވި ތަފާތެކެވެ. މުއްސަނދި އާއިލާއަކުން ނުވަތަ ތަނަވަސްކަމުގެ ތެރެއިން ފެށުމުގެ ބަދަލުގައި، އޭނާގެ ދަތުރު ފެށީ ބީރައްޓެހި ގައުމެއްގައި، އާ ބަހަކާއި އާދަކާދަތަކެއްގެ ތެރޭގައި ކުރިމަތިލާން ޖެހުނު ގޮންޖެހުންތަކުންނެވެ. މިއީ ހަމައެކަނި ބިލިއަނަރަކަށް ވި ގޮތުގެ ވާހަކައެއް ނޫނެވެ. މިއީ ކެތްތެރިކަމާއި، ތިމާ ކުރާ މަސައްކަތަށް އިހުތިރާމުކުރުމާއި، ހިތްވަރާ އެކު ކުރިއަށް ދިއުމުގެ ނަތީޖާ ދައްކުވައިދޭ ހަގީގީ ނަމޫނާއެކެވެ.
ފެބްރުއަރީ 17، 1963 ގައި ޓައިވާނަށް އުފަންވި ހުއާންގްގެ ކުޑައިރުގެ ދިރިއުޅުން ބައްޓަންވެގެން ދިޔައީ އެއް ތަނުން އަނެއް ތަނަށް ކުރި ދަތުރުތަކާއި، ރަނގަޅު މުސްތަގުބަލެއް ހޯދުމަށް އާއިލާއިން ކުރި މަސައްކަތުގެ ތެރެއިންނެވެ. އޭނާގެ ބައްޕަގެ ވަޒީފާއާ ގުޅިގެން އާއިލާ ފަހުން ތައިލެންޑަށް ބަދަލުވިއެވެ. ނަމަވެސް އެ ދުވަސްވަރު ކުރިމަތިވި ސިޔާސީ ހަމަނުޖެހުންތަކުގެ ސަބަބުން ދަރިންގެ މުސްތަގުބަލާ މެދު ކަންބޮޑުވެ، މައިންބަފައިން ނިންމީ ހުއާންގާއި އޭނާގެ ބޭބެ އެމެރިކާގެ ވޮޝިންޓަން ސްޓޭޓުގެ ޓަކޯމާގައި ދިރިއުޅޭ ބޮޑުބޭބެގެ ގާތަށް ފޮނުވުމަށެވެ. އެ ދެބެން ކެންޓަކީގެ އޯބީއައިއަށް ފޮނުވީ، އެއީ ވަރަށް މަތީ ފެންވަރުގެ ބޯޑިން ސްކޫލެއް ކަމަށް ބޮޑުބޭބެއަށް އޮޅިގެން ގަބޫލުކުރެވިގެންނެވެ.
ހަގީގަތުގައި އެ ތަނަކީ އަހުލާގީ ގޮތުން އިސްލާހުކުރަން ޖެހޭ ކަމަށް ބެލެވޭ ކުދިން ބައިތިއްބައިގެން ތަރުބިއްޔަތުކުރާ ދީނީ މަރުކަޒެކެވެ. އޯބީއައިގެ ލިޔުންތަކުގައި ބަޔާންކޮށްފައިވާ ގޮތުގައި، 1970 ގެ އަހަރުތަކުގެ މެދުތެރޭގައި އެ ދެބެން އެ ތަނަށް ދިޔައިރު، އެ އިންސްޓިޓިއުޓް ހިންގަމުން ދިޔައީ ހަމައެކަނި ހައި ސްކޫލެއްގެ ގޮތުގައެވެ. އެހެންކަމުން، ދަނާލުގައި ދިރިއުޅެމުން ކިޔެވުމަށްޓަކައި ކޮންމެ ދުވަހަކު ކެންޓަކީ ކޯރުގެ މަތިން އަޅާފައި އޮންނަ އެލޭ ފާލަމެއް ހުރަސްކޮށް، އެ ސަރަހައްދުގައި ހުންނަ ވަންއައިޑާ އެލިމެންޓަރީ ސްކޫލަށް އެ ކުދިން ހިނގާފައި ދިޔައެވެ. ބިރުދެއްކުމާއި ނަސްލީ ގޮތުން ދިމާކޮށްލުން ފަދަ އުނދަގޫތަކާ އެ މާހައުލުގައި ކުރިމަތިލާން ޖެހުނު ނަމަވެސް، އޭގެ ދެ އަހަރު ފަހުން މައިންބަފައިން އެމެރިކާއަށް އައިސް އެ ކުދިން އެ ސްކޫލުން ވަކިކުރުމާ ހަމައަށް ހުއާންގް އެ ހުރިހާ ކަމަކަށް ކެތްތެރިވިއެވެ.
މައިންބަފައިން އެމެރިކާއަށް އައުމަށް ފަހު، އާއިލާ ދިރިއުޅުން ބަދަލުކުރީ އޮރެގަން ސްޓޭޓަށެވެ. ކެންޓަކީގެ އެކަހެރި ދަނާލުގައި ހޭދަކުރި ދަތި ދުވަސްތަކަށް ފަހު، ހުއާންގްގެ ތައުލީމީ ދަތުރުގައި އާ ސަފުހާއެއް ހުޅުވިގެން ދިޔައީ އެ ހިސާބުންނެވެ. ސްކޫލު ދައުރު ނިންމުމަށް ފަހު، މަތީ ތައުލީމު ހާސިލުކުރުމަށް އޭނާ ގުޅުނީ އޮރެގަން ސްޓޭޓް ޔުނިވަރސިޓީ (އޯއެސްޔޫ) އާއެވެ. އެ ޔުނިވަރސިޓީން އިލެކްޓްރިކަލް އިންޖިނިއަރިންގެ ދާއިރާއިން ފުރަތަމަ ޑިގްރީ ހާސިލުކުރިއިރު، ކޮމްޕިއުޓަރު ޓެކްނޮލޮޖީއާއި ޗިޕް ފަރުމާކުރުމުގެ އިލްމަށް އޭނާގެ ހިތުގައި އޮތް ޝައުގުވެރިކަން އިތުރަށް ފުޅާވެގެން ދިޔައެވެ.
އޯއެސްޔޫއިން ފުރަތަމަ ޑިގްރީ ނިންމުމަށް ފަހު، އިލްމީ ގޮތުން އިތުރަށް ކުރިއަށް ދިއުމުގެ އަޒުމުގައި ހުއާންގް ދެން ދިޔައީ އެމެރިކާގެ އެންމެ ޝަރަފުވެރި ތައުލީމީ މުއައްސަސާތަކުގެ ތެރޭގައި ހިމެނޭ ސްޓެންފޯޑް ޔުނިވަރސިޓީއަށެވެ. ސްޓެންފޯޑް ޔުނިވަރސިޓީން އިލެކްޓްރިކަލް އިންޖިނިއަރިންގެ ދާއިރާއިން މާސްޓާސް ޑިގްރީ ފުރިހަމަކުރުމަކީ، ސިލިކަން ވެލީގެ ޓެކްނޮލޮޖީ ސިނާއަތުގެ އެންމެ މަތީ ފަންތިއަށް ވަނުމަށް އޭނާއަށް ހުޅުވުނު މުހިންމު ދޮރެކެވެ. ކުޑައިރު ދަނާލުގެ ފާހާނާތައް ސާފުކުރަން ޖެހުނު ކުއްޖާ، އޭރު ހުރީ ދުނިޔޭގެ އެންމެ ކުރިއަރާފައިވާ އިންޖިނިއަރިންގެ އިލްމު އުނގެނިގެން، މުސްތަގުބަލުގެ ޓެކްނޮލޮޖީ ބައްޓަންކުރުމަށް ތައްޔާރުވެގެންނެވެ.
ތައުލީމީ މަރުހަލާއަށް ފަހު ހުއާންގްގެ އަމަލީ މަސައްކަތް ފެށީ ސެމީކޮންޑަކްޓަރު ސިނާއަތުންނެވެ. އޭނާ ފުރަތަމަ މަސައްކަތްކުރީ މަޝްހޫރު ޗިޕް ކުންފުންޏެއް ކަމަށްވާ އެޑްވާންސްޑް މައިކްރޯ ޑިވައިސަސް (އޭއެމްޑީ) ގައި މައިކްރޯޕްރޮސެސަރު ފަރުމާކުރާ އިންޖިނިއަރެއްގެ ގޮތުގައެވެ. އޭގެ ފަހުން އެލްއެސްއައި ލޮޖިކްގައި ޑިރެކްޓަރެއްގެ މަގާމު އަދާކޮށް، ޗިޕް އުފެއްދުމާއި ކޮމްޕިއުޓަރު ހާޑްވެއާގެ ދާއިރާއިން ފުން ތަޖުރިބާތަކެއް ހޯދިއެވެ. ނަމަވެސް، ބޮޑެތި ކުންފުނިތަކުގެ ތެރޭގައި ހަމައެކަނި ވަޒީފާއެއް އަދާކޮށްގެން ހުރުމަކީ އޭނާ ހިތްހަމަޖެހޭ ކަމަކަށް ނުވިއެވެ. އޭނާ ބޭނުންވީ އަމިއްލަ ތަސައްވުރެއްގެ މައްޗަށް ބިނާކޮށް، މުޅިން އާ އެއްޗެއް ދުނިޔެއަށް ނެރުމަށެވެ.
އެ އަޒުމުގައި، އުމުރުން 30 އަހަރުގައި ހުއާންގް ނިންމީ އަމިއްލަ ކުންފުންޏެއް އުފެއްދުމަށެވެ. އެޕްރީލް 5، 1993 ގައި ހުއާންގް އިސްވެ ހުރެ އެންވިޑިއާ އުފެއްދީ ސަން މައިކްރޯސިސްޓަމްސް އާއި އައިބީއެމް ފަދަ ކުންފުނިތަކުގައި މަސައްކަތްކުރި ތަޖުރިބާކާރު ދެ އިންޖިނިއަރުން ކަމަށްވާ ކްރިސް މަލަކައުސްކީ އާއި ކާޓިސް ޕްރީމްއާ ގުޅިގެންނެވެ. އެ ތިން މީހުންގެ އަމާޒަކަށް ވީ، ކޮމްޕިއުޓަރު ގޭމިން އާއި މަލްޓިމީޑިއާ މާކެޓަށް 3ޑީ ގްރެފިކްސް ޓެކްނޮލޮޖީ ތައާރަފުކޮށް، ކޮމްޕިއުޓަރުތަކުން މަންޒަރުތަކާއި ބޮޑެތި ހިސާބުތައް ޕްރޮސެސްކުރާ ގޮތަށް އިންގިލާބީ ބަދަލެއް ގެނައުމެވެ.
ކުންފުނި ބިނާކޮށްފައި ވަނީ ވަރަށް ސާދާ އެހެންނަމަވެސް ބޮޑު ތަސައްވުރެއްގެ މައްޗަށެވެ. އެއީ އާދައިގެ ކޮމްޕިއުޓަރު ޕްރޮސެސަރުތަކުން ފަސޭހައިން ނުކުރެވޭ ފަދަ ބުރަ މަސައްކަތްތައް، "އެކްސެލެރޭޓެޑް ކޮމްޕިއުޓިން" ނުވަތަ ހަލުވި ކޮމްޕިއުޓިން މެދުވެރިކޮށް ހާސިލުކޮށްދިނުމެވެ. އެންވިޑިއާގެ ފުރަތަމަ އަހަރުތަކަކީ ފަސޭހަ ދުވަސްތަކެއް ނޫނެވެ. މާލީ ގޮތުންނާއި ފަންނީ ގޮތުން ކުރިމަތިވި ބޮޑެތި ގޮންޖެހުންތަކުގެ ސަބަބުން ކުންފުނީގެ މުސްތަގުބަލާ މެދު ސުވާލު އުފެދުނު ވަގުތުތައް ވެސް ދިޔައެވެ. އެހެންނަމަވެސް، ޓެކްނޮލޮޖީއަށް އަންނަމުން ދިޔަ ބަދަލުތަކާ އެއްގޮތަށް ކުންފުނީގެ މިސްރާބު ބަދަލުކުރަމުން ހުއާންގް ކުރިއަށް ދިޔައެވެ.
އެ މަސައްކަތުގެ އެންމެ ބޮޑު ކާމިޔާބީއެއް ފެނިގެން ދިޔައީ 1999 ވަނަ އަހަރުއެވެ. އެ އަހަރު އެންވިޑިއާއިން ދުނިޔޭގެ ފުރަތަމަ ގްރެފިކްސް ޕްރޮސެސިން ޔުނިޓް (ޖީޕީޔޫ) އުފައްދައި ތައާރަފުކުރިއެވެ. ސްޓެންފޯޑް ގްރެޖުއޭޓް ސްކޫލް އޮފް ބިޒްނަސްގެ ދިރާސާއެއްގައި ބަޔާންކޮށްފައިވާ ގޮތުގައި، އެއްފަހަރާ ގިނަ މަސައްކަތްތަކެއް ހަލުވިކަމާ އެކު ކޮށްލުމުގެ ގާބިލުކަން ލިބިފައިވާ މި ޖީޕީޔޫ ފުރަތަމަ އަމާޒުކުރީ ކޮމްޕިއުޓަރު ގޭމްތަކަށެވެ. ނަމަވެސް، ހަމައެކަނި ގޭމިންއަށް ހާއްސަ އެއްޗެއްގެ ގޮތުގައި ބޭއްވުމުގެ ބަދަލުގައި، މަތީ ފެންވަރުގެ އެހެނިހެން ކޮމްޕިއުޓިން މަސައްކަތްތަކަށް ޖީޕީޔޫ ބޭނުންކުރެވޭނެ ގޮތް ހެދުމަށް ހުއާންގް ނިންމި ނިންމުން ވެގެން ދިޔައީ މުޅި ކޮމްޕިއުޓިން ސިނާއަތް ބަދަލުކޮށްލި ފިޔަވަޅަކަށެވެ.
ގިނަ އަހަރުތަކެއް ވަންދެން އާންމުންގެ މެދުގައި، ހާއްސަކޮށް ކޮމްޕިއުޓަރު ގޭމް ކުޅޭ މީހުންގެ މެދުގައި އެންވިޑިއާ މަޝްހޫރުވެފައި އޮތީ މޮޅު ގްރެފިކްސް ކާޑު އުފައްދާ ކުންފުންޏެއްގެ ގޮތުގައެވެ. ނަމަވެސް ހުއާންގްގެ ނަޒަރު ހުއްޓިފައި ހުރީ އެއަށް ވުރެ މާ ދުރަށެވެ. ސައިންޓިފިކް ދިރާސާތަކާއި، ޑީޕް ލާނިން އާއި، އަމިއްލައަށް ދުއްވާ އުޅަނދުތަކާއި، ރޮބޮޓިކްސް އަދި އޭއައިގެ ދާއިރާއަށް ޖީޕީޔޫއަކީ ކޮންމެހެން ބޭނުންތެރި އެއްޗަކަށް ވާނެ ކަމަށް އޭނާ ގަބޫލުކުރިއެވެ. އެ ތަސައްވުރު ހަގީގަތަކަށް ހެދުމަށްޓަކައި ބޭނުންވާ ހާޑްވެއާ އާއި ސޮފްޓްވެއާ އޮނިގަނޑު ތަރައްގީކުރުމަށް އެންވިޑިއާއިން ބޮޑެތި އިންވެސްޓްމަންޓްތަކެއް ކުރިއެވެ.
އެ ބަދަލުގެ މައި ތަނބަކަށް ވީ 2006 ވަނަ އަހަރު އެންވިޑިއާއިން ތައާރަފުކުރި ކޮމްޕިއުޓް ޔުނިފައިޑް ޑިވައިސް އާކިޓެކްޗާ (ކޫޑާ) އެވެ. އެކޫޑާއަކީ ހަމައެކަނި 3ޑީ މަންޒަރުތައް ކުރެހުމުގެ ބަދަލުގައި، ކޮންމެ ބާވަތެއްގެ ބޮޑު ހިސާބެއް އަދި ކޮމްޕިއުޓިން މަސައްކަތެއް ވެސް ޖީޕީޔޫގެ ބާރުވެރިކަން ބޭނުންކޮށްގެން ހަލުވިކަމާ އެކު ހިންގުމުގެ ފުރުސަތު ސޮފްޓްވެއާ އުފައްދާ ފަރާތްތަކަށް ފަހިކޮށްދިން ޕްލެޓްފޯމެކެވެ. އޭގެ ސަބަބުން، 2012 ވަނަ އަހަރު މަންޒަރުތައް ދެނެގަތުމަށް އުފެއްދި "އެލެކްސްނެޓް" ފަދަ ނިޒާމުތަކުން ޖީޕީޔޫ އާއި ކޫޑާ ބޭނުންކޮށްގެން ޑީޕް ލާނިންގެ ހަގީގީ ބާރު ދުނިޔެއަށް ދައްކާލިއެވެ.
ދުނިޔޭގައި އޭއައިގެ ޓެކްނޮލޮޖީ ހީނުކުރާހާ ހަލުވި މިނެއްގައި ކުރިއަރައިގެން ދިޔައިރު، އެ ނިޒާމުތައް ތަމްރީނުކުރުމަށާއި ހިންގުމަށް ބޭނުންވާ ކޮމްޕިއުޓިން ބާރު ފޯރުކޮށްދިނުމަށް އެންވިޑިއާ އޮތީ ފުރިހަމައަށް ތައްޔާރުވެފައެވެ. އެންވިޑިއާގެ ހިއްސާގެ އަގު އުފުލެމުން ގޮސް، އެ ކުންފުނީގެ ބާޒާރުގެ އަގު ހަތަރު ޓްރިލިއަން ޑޮލަރަށް އަދި ފަހުން 5.03 ޓްރިލިއަން ޑޮލަރަށް އަރައި ތާރީހީ ރެކޯޑުތަކެއް ގާއިމުކޮށްފައިވެއެވެ. މިއަދު ދުނިޔޭގެ އެންމެ ކުރިއަރާފައިވާ އޭއައި ނިޒާމުތަކާއި، ޑޭޓާ ސެންޓަރުތަކާއި، ސުޕަކޮމްޕިއުޓަރުތައް ހިންގުމުގެ މައި އިންޖީނަކީ އެންވިޑިއާގެ ޓެކްނޮލޮޖީއެވެ. އެއް ދުވަސްވަރެއްގައި ފާހާނާ ސާފުކުރި ކުޑަކުއްޖާ ވެގެން ދިޔައީ، ޒަމާނީ ތާރީހުގައި އުފެދުނު އެންމެ މުހިންމު އެއް ޓެކްނޮލޮޖީ ކުންފުނީގެ މޭސްތިރިއަށެވެ.
ޓެކްނޮލޮޖީގެ ދުނިޔޭގައި ހުއާންގް ފާހަގަކުރެވެނީ އޭނާ އަބަދުވެސް ލާ ކަޅު ކުލައިގެ ލެދަރު ޖެކެޓުންނެވެ. ނަމަވެސް އެ މަޝްހޫރު ސިފައިގެ ފަހަތުގައި ހުރީ ފަންނީ ކަންކަން ފުންކޮށް ދަންނަ، ބުރަކޮށް މަސައްކަތްކުރާ އަދި މަތީ ފެންވަރެއްގައި ކަންކަން ނިންމުމަށް ބާރުއަޅާ ލީޑަރެކެވެ. ކާމިޔާބީއަށް ފަހު ފަސޭހަކަމުގައި މަޑުޖެހިގެން ނުތިބުމަށާއި، ދަތި އުނދަގޫ ހާލަތްތަކުން އިންސާނާގެ އަޒުމު ވަރުގަދަކޮށްދޭ ކަމަށް އޭނާ އަބަދުވެސް ވަކާލާތުކުރެއެވެ. ހުއާންގް ބުނި ގޮތުގައި، ކުޑައިރު ސްކޫލުގައި ހުރިހާ ކުދިން ވެސް މަސައްކަތްކުރަން ޖެހުނުއިރު، ފާހާނާތައް ސާފުކުރަން ހުރި ހަމައެކަނި ކުއްޖަކީ އޭނާއެވެ.
އެއީ ބުރަ މަސައްކަތެއް ނަމަވެސް، އޭރު އެއީ އާދަޔާ ހިލާފު ބުރައެއް ކަމަށް ނުދެކި، އެއީ ކުދިން ކުރަންޖެހޭ ކަމެއްގެ ގޮތުގައި ބަލައިގެން އެ ޒިންމާ އަދާކުރީ ކަމަށް އޭނާ ބުންޏެވެ.
ކާމިޔާބީގެ އެންމެ އުހަށް ދިޔަ ނަމަވެސް، އެމެރިކާގައި އޭނާގެ ދިރިއުޅުން ފެށުނު މަރުކަޒު ހުއާންގް ހަނދާނެއް ނުނެތެއެވެ. އޯބީއައިގެ ރަސްމީ ވެބްސައިޓުގައި ބަޔާންކޮށްފައިވާ ގޮތުގައި، ހުއާންގާއި އޭނާގެ އަންހެނުން ލޯރީ ހުއާންގް ދިން 2 މިލިއަން ޑޮލަރުގެ އެހީއާ އެކު، އެ ސްކޫލުގައި އަންހެން ކުދިންގެ އާ ދަނާލަކާއި ކްލާސްރޫމް ހިމެނޭ އިމާރާތެއް ވަނީ ބިނާކޮށްފައެވެ. ޖުމުލަ 128 އަންހެން ކުދިންނަށް ތިބެވޭނެ 32 ކޮޓަރި އާއި 12 ކްލާސްރޫމް ހިމެނޭ "ޖެން-ސުން ހުއާންގް ހޯލް" ރަސްމީކޮށް ހުޅުވީ އޮގަސްޓް 2، 2019 ގައެވެ. އެއް ދުވަސްވަރެއްގައި އެ ސްކޫލުގެ ފާހާނާތައް ސާފުކުރި ދަރިވަރު، އެތައް އަހަރެއް ފަހުން އެ ތަނަށް އެނބުރި ދިޔައީ އެ މުއައްސަސާގެ މުސްތަގުބަލު އުޖާލާކޮށްދިން އެހީތެރިއެއްގެ ގޮތުގައެވެ.
އެންވިޑިއާގެ ވެރިކަމުގައި 33 އަހަރު ހޭދަކުރުމަށް ފަހު، ހުއާންގްގެ ދިގު ދަތުރަށް ފަހުން ވަނީ ބޮޑު ބަދަލެއް އައިސްފައެވެ. ދާދިފަހުން ކުންފުނީގެ ތެރޭގައި ފެންމަތިވި މައްސަލަތަކަކާ ގުޅިގެން ހުއާންގް ވަނީ އެންވިޑިއާގެ ސީއީއޯގެ މަގާމުން އިސްތިއުފާދީފައެވެ. އެންވިޑިއާގެ ބޯޑުން ބުނެފައިވާ ގޮތުގައި، ދާއިމީ ސީއީއޯއަކު އައްޔަންކުރެވެންދެން ވަގުތީ ސީއީއޯއެއްގެ ގޮތުގައި މިހާރު ހަމަޖައްސާފައި ވަނީ 2013 ވަނަ އަހަރުން ފެށިގެން އެ ކުންފުނީގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމު ފުރަމުން އަންނަ ކޮލެޓް ކްރެސްއެވެ. މަގާމުން ވަކިވުމަކީ އޭނާގެ ހަޔާތުގައި ކުރިމަތިވި ވަކި ހާދިސާއެއް ނަމަވެސް، އޭއައިގެ އިންގިލާބު ބިނާކުރުމުގައި އޭނާ ކޮށްދިން މަސައްކަތްތަކަށް ބަދަލެއް ނާދެއެވެ.
ޖެންސެން ހުއާންގްގެ މި ދަތުރުން ލިބިދޭ ފިލާވަޅަކީ ހަމައެކަނި ވިޔަފާރިއާއި ޓެކްނޮލޮޖީއަށް ހާއްސަ ފިލާވަޅެއް ނޫނެވެ. ދިރިއުޅުން ފަށަންޖެހޭ ހާލަތު ކިތަންމެ ދަތި ނަމަވެސް، އަދި ކުރަންޖެހޭ މަސައްކަތަކީ މުޖުތަމައުގެ ނަޒަރުގައި ކިތަންމެ އާދައިގެ މަސައްކަތެއް ނަމަވެސް، އެ ކަމަކުން އިންސާނާގެ މުސްތަގުބަލުގައި ސިއްކަ ނުޖެހޭނެކަން މި ވާހަކައިން ސާބިތުވެއެވެ. އުމުރުން ނުވަ އަހަރުގައި ކެންޓަކީގެ ދަނާލެއްގައި 100 ކުދިންގެ ފާހާނާ ސާފުކުރުމަކީ އޭނާގެ އަޒުމަށް ނުވަތަ ގަދަރަށް އުނިކަމެއް ގެނައި ކަމެއް ނޫނެވެ. އޭގެ ބަދަލުގައި، ހަލާލު ކޮންމެ މަސައްކަތަކީ ވެސް ޝަރަފުވެރި މަސައްކަތެއް ކަމުގައި ދެކިގެން ކުރިއަށް ދިއުމުގެ މުހިންމުކަން އޭނާގެ ހަޔާތުން ފެނިގެންދެއެވެ.
މިއަދު ފާހާނާ ސާފުކުރަން ނުވަތަ އެންމެ އާދައިގެ މަސައްކަތުގައި ހުރި މީހަކީ، މާދަމާ މުޅި ދުނިޔެއަށް ބަދަލެއް ގެނެސްދޭނެ މީހާއަށް ވެސް ވެދާނެއެވެ. މީހަކު މިއަދު ކުރަންޖެހިފައިވާ މަސައްކަތަށް ބަލައި، އޭނާގެ މާދަމާގެ މުސްތަގުބަލު ވަޒަންކޮށްގެން ނުވާނެއެވެ.