ކުރީގެ ނޫސްވެރިޔާ އަޙުމަދު ރިލުވާން ޢަބްދުالله ގެއްލުވާލި މައްސަލައިގައި އޭނާގެ ރިޕޯޓު އާއިލާއާ ހިއްސާކުރާނެކަން ނިންމަވާނީ ރައީސް ޑރ. މުހައްމަދު މުއިއްޒު ކަމަށް ބަންޑާރަ ނައިބު އަހުމަދު އުޝާމް މިރޭ ވިދާޅުވެއްޖެއެވެ.
ދައުލަތުގެ މީޑިއާއިން ބާއްވާ އަހާ ފޯރަމުގައި ފޯނު ކޯލެއް މެދުވެރިކޮށް ރިލުވާންގެ ދައްތަ ފާތިމަތު ޝެހެނާޒް ބުނީ، މިދިޔަ ސަރުކާރުގައި އުފެއްދި މަރު ކޮމިޝަނުން ހަދާފައިވާ، ރިލުވާނާ ބެހޭ ރިޕޯޓު އުޝާމާ ހަވާލުކޮށްފައިވާ ކަމަށް ނޫސްވެރިންގެ ބައްދަލުވުމެއްގައި ރައީސް ވިދާޅުވި ކަމަށެވެ.
އެހެންވެ، މީގެ ހަތަރު މަސް ކުރިން އުޝާމާ ބައްދަލުކުރުމަށް އެޕޮއިންޓުމަންޓަކަށް އެދުނު ނަމަވެސް މިހާތަނަށް ޖަވާބެއް ނުލިބޭ ކަމަށް ޝެހެނާޒް ބުންޏެވެ. އޭނާ ބުނީ، މަރު ކޮމިޝަނުން ހަދާފައިވާ ރިޕޯޓު އާއިލާއަށް ލިބުމަށް އެދޭ ކަމަށެވެ.
ރިލުވާންގެ މަންމައާއި ދައްތަ ޝެހެނާޒް ---ސަން ފޮޓޯ/ ފަޔާޒު މޫސާޖަވާބުގައި އުޝާމް ވިދާޅުވީ، މިދިޔަ ސަރުކާރު ނިމުނުއިރު ވެސް މަރު ކޮމިޝަނުގެ މަސައްކަތްތަކަށް ވަކި ގޮތެއް ނުނިންމާ ކަމަށާއި އެ މަސައްކަތްތައް ނިންމުމަށް ރައީސް ވެރިކަމާ ހަވާލުވެވަޑައިގަތުމަށް ފަހު އިރުޝާދު ދެއްވި ކަމަށެވެ.
އެހެންވެ، އެ މަސައްކަތްތައް ނިންމުމަށް މަރު ކޮމިޝަނުގެ މުއްދަތު 2024ގެ މެދުތެރެއާ ހަމައަށް އިތުރުކުރިކަން ފާހަގަކުރައްވަމުން އޭޖީ ވިދާޅުވީ، ކޮމިޝަން އުވުނުއިރު ބައެއް މައްސަލަތަކުގެ ރިޕޯޓުތައް ނިންމާފައި ހުރި ކަމަށެވެ.
އެ ހުރިހާ ރިޕޯޓުތަކެއް ރައީސް އޮފީހުން އޭނާއާ ހަވާލުކޮށްފައިވާ ކަމަށާއި އޭޖީ އޮފީހުގެ ޚާއްސަ ޓީމަކުން އެ ރިޕޯޓުތައް ދިރާސާކުރަމުން އަންނަކަން އޭނާ ފާހަގަކުރެއްވިއެވެ.
މިރޭގެ އަހާ ފޯރަމްގައި އޭޖީ އުޝާމް --- ފޮޓޯ/ ރައީސް އޮފީސް އެ ރިޕޯޓުތަކުގެ ތެރޭގައި، ގެއްލުވާލި ރިލުވާންގެ ރިޕޯޓު ހިމެނޭހެން ފާހަގަކުރައްވަމުން އުޝާމް ވިދާޅުވީ، އެކި ވައްތަރުގެ 'ދެތިން ރިޕޯޓެއް' އެ މައްސަލައިގައި އެބަ އޮތް ކަމަށެވެ. އޭޖީ ވިދާޅުވި ގޮތުގައި، އޭގެ ތެރެއިން އާންމުކުރެވޭނެ ރިޕޯޓުތައް ބެލުމުގެ މަސައްކަތްތައް އަންނަނީ ކުރަމުންނެވެ. އެއީ، އެ ރިޕޯޓުތަކުގެ ތެރޭގައި، ފުލުހުންގެ ސިއްރު މައުލޫމާތުތަކެއް ހިމެނޭ ރިޕޯޓުތަކެއް ހިމެނޭތީ ކަމަށް އޭޖީ ފާހަގަކުރެއްވިއެވެ.
އޭޖީ ފާހަގަކުރެއްވި ގޮތުގައި، ކުރިއަށް އޮތް މަހެއްހާ ދުވަހުގެ ތެރޭގައި އެ ރިޕޯޓަކުގެ މަސައްކަތް ނިންމައި، ރައީސަށް އޭނާގެ ލަފާއަރުވާނެއެވެ.
"ރައީސް ކަމަށް އަޅުގަނޑު ގަބޫލުކުރަނީ އެ ރިޕޯޓު އާއިލާއާ ހަވާލުކުރުމާ ގުޅޭ ގޮތުން ގޮތެއް. އަޅުގަނޑުގެ ލަފާ ރައީސަށް އަރުވާނަން،" އޭޖީ ފާހަގަކުރެއްވިއެވެ.
މީގެ އިތުރުން، އުޝާމް ވަނީ އެޕޮއިންޓުމަންޓަކަށް އެދިގެން ޝެހެނާޒާ ބައްދަލުނުކުރެވުމުން މައާފަށް އެދިވަޑައިގެން މި ހަފުތާގައި ރިލުވާނުގެ އާއިލާއާ ބައްދަލުކުރައްވައި، މައްސަލައިގެ ތަފުސީލުތައް ހިއްސާކުރައްވާނެކަން ހާމަކުރައްވާފައެވެ.
ފާހަގަކުރެވޭ ގޮތުގައި، ރިލުވާން ގެއްލުވައިލި މައްސަލައިގެ ތުހުމަތުގައި ބެލުމުގެ ދަށަށް ޖޫން 26، 2022ގައި ގެންދިޔައީ އިސްމާޢީލް ޢަބްދުއްރަޙީމް (އިސޫ)އާއި، އަޙްމަދު އިސްމާޢީލް (އަހަނދު)ގެ އިތުރުން، އަޙްމަދު މުޢާޒް (ގަޓު މުއާ)އެވެ.
އެ ތިން މީހުން ހައްޔަރުކުރީ ރިލުވާން ވަގަށް ނަގައި މަރާލައިފައިވާ މައްސަލައިގެ އިތުރުން، ބްލޮގަރު ޔާމީން ރަޝީދު މަރާލި މައްސަލައާ ގުޅޭ ޖިނާއީ ކުށްތައް ރާވައި ހިންގުމުގައާއި އެ ކުށް ހިންގުމަށް މަގުފަހިކުރުވައި ޓެރަރިޒަމްގެ އަމަލުތައް ހިންގާފައިވާ ކަމަށް ތުހުމަތުކުރެވޭ މައްސަލައާ ގުޅިގެން ކޯޓު އަމުރެއްގެ ދަށުންނެވެ.
ނަމަވެސް ތިން މީހުންގެ މައްޗަށް ކުށް ސާބިތުނުވާ ކަމަށް ކަނޑައަޅައި، ކޯޓުން ވަނީ ތިން މީހުންވެސް ދޫކޮށްލައިފައެވެ. އޭގެ ތެރެއިން ޖޫން 22، 2023ގައި އަހަނދު ދޫކޮށްލިއިރު، އިސޫ ދޫކޮށްލީ ޖެހިގެން އައި ޖުލައި މަހުގެ 12ވަނަ ދުވަހެވެ. އަދި ގަޓު މުއާ ދޫކޮށްލީ ރިޔާސީ އިންތިޚާބުގެ ދުވަސްވަރު، ސެޕްޓެންބަރު މަހުގެ 19ވަނަ ދުވަހެވެ.
ރިޔާސީ ކޮމިޝަނުން އާންމުކުރި ރިޕޯޓުގައިވާ ގޮތުން، ރިލުވާން ދިރިއުޅެމުން އައި އެޕާޓްމަންޓް ކައިރިން އޭނާ ރަހީނުކޮށް ކާރަކަށް އަރުވައި ޑިންގީއަކަށް އަރުވައިގެން ގެންގޮސް އޭނާ އެރުވީ ކަނޑު އުޅަނދަކަށެވެ. އަދި އެ އުޅަނދުގައި އޭނާގެ ކަރު ބުރިކޮށް ހަށިގަނޑު ކަނޑުފެއްތީއެވެ. އެއީ 2014 ވަނަ އަހަރުގެ އޮގަސްޓު މަހުގެ އަށްވަނަ ދުވަހުގެ ރެއެވެ.